1 Misa! Nini da Hina Godema nodone sia:na:di.

Ninia da nini Gaga:su Gode Ema nodone gesami hea:la:di.

2 Ninia da Ea midadi misini, Ema nodone iasu ia:di,

amola hahawane nodone gesami hea:la:di.

3 Bai Hina Gode da Gadodafa

amola ‘gode’ huluane amo baligisa.

4 E da osobo bagade huluane amola osobo magufu gelabo gaga:i gududafa

amogainini heda:le, agolo gagai gadodafa amoga doaga:le,

amo huluane ouligisa.

5 E da hano wayabo Hi hahamoi amola soge Hi hahamoi

amo huluane ouligisa.

6 Misa! Ninia da Hina Gode nini hahamosu dunu,

Ema muguni fili guduli amola dialuma beguduli,

Ema nodone sia:ne gadola:di!

7 *E da ninia Gode! Amola E da nini gilisi dialebe dunu amo noga:le ouligili,

ninima ninia hanai liligi amo iana.

8 *Wali, Ea sia:be amo nabima! Dilia aowalali da Meliba sogega amogai esala,

ilia da amo haga Masa hafoga:i sogega esalebe agoane

asigi dawa:su gawamaga:i, amo agoane mae hamoma.

9 Amogai ilia Na ilima hamobe ba:i.

Be amomane, ilia da Nama adoba:i.

10 Ode 40 agoane Na da amo dunu ilia hamobe amoga hihini ba:lusu.

Na da amane sia:i, "Ilia da Nama hagasa!

Ilia da Na hamoma:ne sia:be amo nabimu higasa.

11 *Na da ougiba:le, dafawane hamomusa: sia: amane ilegei,

"Dilia da soge Na diligili helefima:ne imunusa: ilegele sia:i,

amoga da hamedafa doaga:mu."