1 Hina Gode! Ninia Hina Gode!

Osobo bagade fifi asi gala huluane da Dia gasa bagade hou ba:lala.

Dima nodosu hou da heda:le, muagadodafa amoga doaga:sa.

2 *Mano amola mano dudubu da Dima nodosu gesami hea:sa.

Dima ha lai da Di wadela:mu da hamedei.

Di da Dima ha lai dunu amo ilia Dima doagala:mu logo hedofasa.

3 Di da mu hahamoi dagoi amola oubi amola gasumuni huluane,

Di da ilia sogebi amoga bugisi.

Amo liligi huluane na ba:sea, na bagadewane agoane dadawa:sa,

4 *osobo bagade dunu da hamedei liligi agoane gala.

Amaiba:le, Di, Hina Gode, da abuliba:le

osobo bagade dunuma bagadewane dadawa:sala:?

Abuliba:le, Di da osobo bagade dunu asigiwane ouligisala:?

5 Be Di da osobo bagade dunu amo gaguia gadole,

ilia da Di hagudu fawane esaloma:ne hamoi.

Di da osobo bagade dunu ilima hadigi hou i dagoi.

Amola, Di da eno liligi huluane da ilima nodoma:ne,

Di da osobo bagade dunu gaguia gadoi.

6 *Dia da osobo bagade dunu ilia da liligi huluane Dia hamoi

amo ouligima:ne ilegei dagoi.

7,8 Dia da osobo bagade dunu ilia da sibi, bulamagau, sigua ohe huluane,

sio fi, menabo fi amola hano ganodini fi huluane

amo huluane ouligima:ne ilegei dagoi.

9 Hina Gode! Ninia Hina Gode!

Dia gasa bagade hou da osobo bagade huluane ganodini ba:lala.