1 Hina Gode! Da:ibidi amola ea se baligili nabasu,

amo mae gogolema!

2 Hina Gode! Di da Ya:igobe ea Gode Bagadedafa.

Da:ibidi ea Dima ilegele sia:i amo mae gogolema! E amane ilegele sia:i,

3-5 "Na da na diasua hame masunu amola hame golamu,

amola hele mae fili galeawane,

Hina Gode (Ya:igobe ea Gode Bagadedafa) Ea: diasu gagumu."

6 *Ninia da Bedeleheme moilaiga esaloba,

Dia Gousa:su Sema Gagili ea hou nabi.

Ninia da amo hogolala, Yialimi soge ganodini dialebe ba:i.

7 Ninia amane sia:i, "Ninia Hina Gode Ea diasuga afia:la:di.

Ninia Ea Fisu midadi nodone sia:ne gadomusa: afia:la:di.

8 Hina Gode! Debolo diasuga misa!

Amola Dia Gousa:su Sema Gagili

da Dia gasa bagade hou dawa:digima:ne olelesuba:le,

amo Dia gaguli misini, amogawi mae fisili, eso huluane esalalaloma!

9 Dia gobele salasu dunu da eso huluane moloidafa hou

abula agoane salimu da defea.

Dia fi dunu ilia hahawaneba:le gesami hea:mu da defea.

10 Di da Dia hawa: hamosu dunu Da:ibidi, ema ilegele sia:i dagoi.

Amaiba:le, Dia ilegei hina bagade amo higale mae yolesima.

11 *Di da Da:ibidima dafawanedafa ilegele sia:su hamoi,

amola amo ilegele sia:i Di da hamedafa bugimu.

Di amane ilegele sia:i,

"Na da dia mano afae amo hina bagade hamomu,

amola e da di bagia Isala:ili fi ouligilalumu.

12 Dia mano ilia Na gousa:su noga:le nabasea,

amola Na hamoma:ne sia:i ilima i, amo nabawane hamosea,

ilia mano amola da di bagia, eso huluane mae fisili, Isala:ili fi ouligilalumu."

13 Hina Gode da Saione Moilai Bai Bagade

amo ganodini E esaloma:ne, ilegei dagoi.

14 E amane ilegele sia:i, "Na da Saione Moilai Bai Bagade

amo ganodini eso huluane fifi ahoanumu.

Na da amogawi Isala:ili fi ouligilalumu hanai galebe.

15 Na da Saione fi dunu ilia esaloma:ne lamu liligi defele ilima imunu.

Na da Saione Moilai Bai Bagadega esalebe hame gagui dunu,

ilima sadima:ne ha:i manu imunu.

16 Na da Saione fi ilia gobele salasu dunu,

ilia hamobe huluane amo ganodini, gaga:su hou abula agoane ilima imunu.

Amola Saione fi dunu da hahawaneba:le, gesami hea:mu amola wele sia:mu.

17 *Goegawi, Na da Da:ibidi egaga fi Dunu afae amo Hina Bagadedafa hamomu.

Amola Na da Na ilegei Hina Bagade Ea ouligisu hou noga:le gaga:mu.

18 Na da Ea ha lai dunu amo gogosiama:ne hamomu.

Be Ea ouligibi da bagade gaguiwane heda:mu."