1 *Gode! Nama asigima!

Bai Di da mae fisili asigidafa hou amola gogolema:ne olofosu hou dawa:.

Amaiba:le, na wadela:i hou huluane doga:le fasima.

2 Na da bu foloai ba:ma:ne,

na wadela:i ledo hou amo dodofele fasima.

3 Na da ni giadofale hamosu amo ea bai amo ni ba:le, dawa:digisa.

Na da eso huluane wadela:i hou na hamoi, amo dawa:digisa.

4 *Na da enoma hame wadela:le hamoi, be Dima fawane wadela:le hamoi.

Amola Dia higa:i ba:su, amo na da giadofale hamoi.

Amaiba:le Dia nama fofada:mu da defea,

amola Di da moloidafaba:le nama fofada:ne, diwaneya udidili,

nama se dabe imunu da defea.

5 Na da na lalelegei esoha amogaini wadela:i hou hahamona misi.

Na da na:me ea hagomoga mano hahamoia amoganini wali,

wadela:i hou hahamona misi.

6 Dia da moloidafa amola dafawanedafa hou amo ilegesa.

Amaiba:le Dia na asigi dawa:su amo Dia bagade dawa:su amoga nabalesima.

7 Na wadela:i hou hamoi amo Dia doga:le fasima.

Amasea na wadela:i hou da doga:iba:le, na da foloai dagoi ba:mu.

Na wadela:i hou dodofelesima.

Amasea na da foloaidafa mu gohona: amo baligi ba:ma:ma.

8 Na da hahawane nodosu sia: amo nabima:ma,

be amomane Di da na dadalega:le amola dadamunisali galu.

Be na da bu hahawane hamoi ba:mu.

9 Di da na wadela:i hou hamoi amoga si sisigili mae ba:ma!

Amola na wadela:i hou hamoi huluane doga:le fasima!

10 Gode! Nama dogo gaheabolo hahamonesili, na da:i hodo ganodini salima!

Amola a:silibu gaheabolo amola Dima fa:no bobogesu fisisu hame dawa:

a:silibu, amo na da:i hodo ganodini salima.

11 Dia midadi amoga na mae fisiagama!

Dia A:silibu Ida:iwane Gala nama mae fadegale fasima!

12 Di da dunu gaga:sea, ilia da hahawane bagade ba:sa.

Amo hahawane hou nama bu ima.

Na da Dima bu nabawane fa:no bobogema:ne, Dia hahamonesima!

13 Amasea, na da wadela:i hamosu dunu ilima Dia hamoma:ne sia:i olelemu.

Amola ilia da amo nababeba:le, Dima bu sinidigimu.

14 Gode! Na esalusu gaga:ma!

Amasea na da nonodoia Dia moloidafa hou enoma sisia:i lamu.

15 Hina Gode! Na sia: sia:ma:ne fidima!

Amasea, Na da Dima nodone sia:mu.

16 Di da gobele salasu lamu hame hanai.

Di da amo lamu hanai ganiaba, na da amo Dima ia:noba.

Di da gobei gobele salasu amoma hame nodosa.

17 Gode! Na Dima gobele salasu da asaboi a:silibu fawane.

Na dawa:!

Di da asabole amola Dima sinidigimusa: dawa:su dunu amo hame higamu.

18 Gode!

Saione Moilai Bai bagade amoma asigima! E fidima!

Yelusaleme ea dobea fei amo bu gaguma!

19 Amasea, Di da gobele salasudafa

amola ninia gobei gobele salasu amo nodone ba:mu.

Amola bulamagau gawali da Dia oloda da:iya gobele salabe ba:mu.