1 Hina Gode da ninima liligi noga:idafa hahamoiba:le,

Ema nodone gesami gaheabolo hea:ma!

Ea hadigi gasa amoga fawane E da hasalasi dagoi.

2 Hina Gode da Ea Hisu hasalasi amo sisa:i lai.

Ea da Ea gaga:su gasa amo fifi asi gala ilia dawa:digima:ne hamoi.

3 E da Isala:ili dunu ilima Ea mae fisili asigi hou da ilima dialoma:ne sia:i.

Amola E da ea ilegele sia:i didili hamoi.

Fifi asi gala dunu huluane da ninia Gode Ea hasalasisu hou

amo huluane ba:i dagoi.

4 Osobo bagade fifi asi huluane! Hina Godema nodone gesami hea:ma!

Ema nodone gesami hea:ma

amola nodoiba:le wele sisia:ma!

5 Hina Godema nodone gesami hea:ma!

Sani baidama duni, Hina Godema nodone sia:ma.

6 Ninia Hina Bagade Godema nodone dalabede duni

amola fulabosu hono amo fulabosa, nodone wele sia:ma.

7 Hano wayabo bagade! Di ganodini esalebe liligi huluane, huma!

Amola osobo bagade di da:iya dialebe liligi huluane nodone gesami hea:ma!

8 Hano amola agolo huluane dilia da Gode Ea midadi aligili,

dilia lobo fane, Hina Godema nodone gesami hea:ma.

9 Bai E da osobo bagade fifi asi huluane ouligimusa: maha.

E da defeledafa Ea moloi fofada:su amoga fifi asi gala huluane ouligimu.