2 शमूएल 13

अम्रोन का कुकर्म

1 फिर तामार नाम की एक सुन्दर छोरी जो दाऊद के बेट्टे अबशालोम की भाण थी, उसपै दाऊद का बेट्टा अम्नोन मोहित होया। 2 अम्नोन अपणी सौतेल्‍ली भाण तामार कै कारण इसा बेचैन होग्या के बीमार पड़ग्या; क्यूँके वा कुवारी थी, अर उसकै गैल किमे करणा अम्नोन*13:2 अम्नोन यो कहणा ठीक होवैगा के "दाऊद के बेट्याँ म्ह तै एक" या हो सकै सै "दाऊद के बेट्याँ म्ह तै एक की दुसरी पत्नी।" अम्नोन दाऊद के घर अहीनोअम तै पैदा होया था, जो यहूदा के नगर यिज्रेल का था। (देखें 3:2) इसलिए अम्नोन अबशालोम अर तामार का सौतेला भाई था, अर वो दाऊद का सबतै बड़ा बेट्टा था। 3:2 नै मुश्किल जाण पड़ै था। 3 अम्नोन का योनादाब नाम का एक दोस्त था, जो दाऊद के भाई शिमआह*13:3 शिमआह 1 शमूएल 16:9 अर 17:13 का बेट्टा था, अर वो बड़ा होशियार था। 4 अर योनादाब नै अम्नोन तै कह्या, "हे राजकुमार, के कारण सै के तू रोज इसा माड़ा होन्दा जावै सै के तू मन्‍नै न्ही बतावैगा?" अम्नोन नै उसतै कह्या, "मै तो अपणे भाई अबशालोम की भाण तामार पै मोहित सूं।" 5 योनादाब नै उसतै कह्या, "अपणे पलंग पै लेट कै बीमार बण ज्या; अर जिब तेरा पिता तन्‍नै देखण नै आवै, फेर उसतै कहिये, ‘मेरी भाण तामार आकै मन्‍नै रोट्टी खुवावै, अर खाणा मेरै स्याम्ही बणावै, ताके मै उसनै देखकै उसके हाथ तै खाऊँ।’" 6 आखर अम्नोन लेट कै बीमार बणग्या; अर जिब राजा उसनै देखण आया, फेर अम्नोन नै राजा तै कह्या, "मेरी भाण तामार आकै मेरे देखदे दो पूरी बणावै, ताके मै उसकै हाथ तै खाऊँ।"

7 फेर दाऊद नै अपणे घर तामार कै धोरै यो कुह्वा भेज्या, "अपणे भाई अम्नोन कै घर जाकै उसकै खात्तर खाणा बणा।" 8 फेर तामार अपणे भाई अम्नोन कै घर गई, अर वो पलंग पै पड़या था। फेर उसनै आटा लेकै गूँध्या, अर उसकै स्याम्ही पूरियाँ पकाई। 9 फेर उसनै थाळ लेकै उन ताहीं उसकै खात्तर परोस्या, पर उसनै खाणे तै मना करया। फेर अम्नोन नै अपणे दास्सां तै कह्या, "मेरे आस्सै-पास्सै तै सारे माणसां नै लिकाड़ द्यो।" फेर सारे माणस उसके धोरै तै लिकड़ैंगे। 10 फेर अम्नोन नै तामार तै कह्या, "खाणे नै कोठड़ी म्ह ले आ, ताके मै तेरे हाथ तै खाऊँ।" तो तामार अपणी बणाई होई पूरियाँ नै ठाकै अपणे भाई अम्नोन कै धोरै कोठड़ी म्ह लेगी। 11 जिब वा उननै उसकै खाण कै खात्तर धोरै लेगी, फेर उसनै उस ताहीं पकड़कै कह्या, "हे मेरी भाण, आ, मेरे धोरै सो।" 12 उसनै कह्या, "हे मेरे भाई, यो ठीक कोनी, मन्‍नै भ्रष्ट ना करै; क्यूँके इस्राएल म्ह इसा काम होणा न्ही चाहिये; इसी मूर्खता का काम ना करै। 13 फेर मै अपणी इस बदनाम्मी नै लेकै कित्त जाऊँगी? अर तू इस्राएलियाँ म्ह एक मूर्ख गिण्या जावैगा। तू राजा तै बातचीत कर, वो मेरे ताहीं तेरै तै ब्याह करण खात्तर मना न्ही करैगा।" 14 पर अम्नोन नै उसकी न्ही सुणी; अर उसतै बलवान होण कै कारण उसके गैल कुकर्म करकै उस ताहीं भ्रष्ट करया।

15 फेर अम्नोन उसतै भोत घणा बैर राक्खण लाग्या; उरै तक के यो बैर उसके पैहले प्रेम तै बढ़कै होया। फेर अम्नोन नै उसतै कह्या, "उठकै चली जा।" 16 उसनै कह्या, "ना मेरे भाई, जो कुकर्म तन्‍नै पैहले मेरे गैल करया सै, उसतै बड़ा कुकर्म यो सै के तू मन्‍नै लिकाड़ण लागरया सै।" पर उसनै उसकी न्ही सुणी। 17 फेर उसनै अपणे खास नौक्‍कर ताहीं बुलाकै कह्या, "इस जनान्‍नी नै मेरे धोरै तै बाहर लिकाड़ दे, अर उसकै पाच्छै किवाड़ म्ह चिटकणी लगा दे।" 18 तामार तो रंगबिरंगी कुड़ती पहरे थी; क्यूँके जो राजकुमारियाँ कुँवारी रहवै थी वे इसे कपड़े पहरया करदी। आखर अम्नोन के टहलुए नै उस ताहीं बाहर लिकाड़कै उसकै पाच्छै किवाड़ म्ह चिटकणी लगा दी। 19 फेर तामार नै अपणे सिर पै राख गेरी, अर अपणी रंगबिरंगी कुड़ती ताहीं पाड़ लिया;*13:19 राख नै सिर पै गेरणा दुःख नै दिखावै सै (एस्तेर 5:3; योना 3:6; यहेजकेल 27:30) अर सिर पै हाथ धरे होए रोन्दी होये चली गई।*13:19 यहोशू 7:6, अय्यूब 2:12

20 उसके भाई अबशालोम नै उसतै पूछ्या, "के तेरा भाई अम्नोन तेरे गैल रह्या सै? परन्तु इब, हे मेरी भाण, चुप रह, वो तो तेरा भाई सै; इस बात की चिन्ता ना कर।" फेर तामार अपणे भाई अबशालोम कै घर म्ह मन मारकै बैठी रही। 21 जिब ये सारी बात दाऊद राजा के कान म्ह पड़ी, फेर वो घणाए छो म्ह भरग्या। 22 अर अबशालोम नै अम्नोन तै भला-बुरा किमे न्ही कह्या, क्यूँके अम्नोन नै उसकी भाण तामार ताहीं भ्रष्ट करया था, इस कारण अबशालोम उसतै नफरत करया करदा।

अम्नोन की हत्या

23 दो साल कै बाद अबशालोम नै एप्रैम कै धोरै के बाल्हासोर म्ह अपणी भेड्डां की ऊन कतरवाई अर अबशालोम नै सारे राजकुमारां ताहीं न्योन्दा दिया। 24 वो राजा कै धोरै जाकै कहण लाग्या, "बिनती या सै, के तेरे दास की भेड्डां की ऊन कतरी जावै सै, ज्यांतै राजा अपणे कर्मचारियाँ समेत अपणे दास के गैल चाल्‍लै।" 25 राजा नै अबशालोम तै कह्या, "हे मेरे बेट्टे, इसा न्ही; हम सारे न्ही चाल्‍लांगें, इसा ना हो के तन्‍नै घणा नुकसान हो।" फेर अबशालोम नै बिनती करकै उसपै दबाव गेरया, पर उसनै जाण तै इन्कार करया, तोभी उस ताहीं आशीर्वाद दिया। 26 फेर अबशालोम नै कह्या, "जै तू न्ही तो मेरे बड़े भाई अम्नोन नै म्हारे गैल जाण दे।" राजा नै उसतै पूछ्या, "वो तेरे गैल क्यूँ जावै?" 27 पर अबशालोम नै उस ताहीं इसा आग्रह करया के उसनै अम्नोन अर सारे दुसरे राजकुमारां ताहीं उसकै गैल जाण दिया। 28 फेर अबशालोम नै अपणे सेवकां ताहीं हुकम दिया, "सावधान रहो अर जिब अम्नोन दाखमधु पीकै नशा म्ह आ जावै, अर मै थारे तै कहूँ, ‘अम्नोन नै मार दियो।’ के इस हुकम का देणआळा मै न्ही सूं? हियाव बाँधकै पुरुषार्थ करणा।" 29 आखर अबशालोम के सेवकां नै अम्नोन कै गैल अबशालोम के हुकम कै मुताबिक करया। फेर सारे दुसरे राजकुमार उठ खड़े होए, अर अपणे-अपणे खच्‍चर पै चढ़कै भाजगे।

30 वे रास्ता ए म्ह थे, के दाऊद नै यो समाचार मिल्या, "अबशालोम नै सारे राजकुमारां ताहीं मार गेरया, अर उन म्ह तै एक भी न्ही बच्या।" 31 फेर दाऊद नै उठकै अपणे कपड़े पाड़े, अर धरती पै गिर पड़या, अर उसके सारे कर्मचारी कपड़े पाड़े होए उसकै धोरै खड़े रहे। 32 फेर दाऊद के भाई शिमआह के बेट्टे योनादाब नै कह्या, "मेरा प्रभु या ना समझै के सारे जवान, यानिके राजकुमार मार दिये गए सैं, सिर्फ अम्नोन मारया गया सै; क्यूँके जिस दिन उसनै अबशालोम की भाण तामार नै भ्रष्ट करया, उस्से दिन तै अबशालोम के हुकम तै इसीए बात पक्‍की थी। 33 इस खात्तर इब मेरा प्रभु राजा अपणे मन म्ह या समझकै के सारे राजकुमार मरगे उदास ना हो; क्यूँके सिर्फ अम्नोन ए मारया गया सै।"

अबशालोम का भाजणा

34 इतणे म्ह अबशालोम भाज ग्या। अर जो जवान पैहरा देवै था उसनै नजर ठाकै देख्या, के पाच्छै की ओड़ तै पहाड़ कै धोरै के रास्ता तै घणे माणस चाल्‍ले आवै सैं। 35 फेर योनादाब नै राजा तै कह्या, "देख, राजकुमार तो आगे सैं; जिसा तेरे दास नै कह्या था उस्से तरियां होया।" 36 वो कह ए रह्या था, के राजकुमार पहुँचगे, अर रुक्‍के मार-मारकै रोण लाग्गे; अर राजा भी अपणे सारे कर्मचारियाँ समेत बिलख-बिलख कै रोण लाग्या।

37 अबशालोम तो भाजकै गशूर के राजा अम्मीहूद के बेट्टे तल्मै कै धोरै गया। अर दाऊद अपणे बेट्टे अम्नोन खात्तर दिन-रात बिलाप करदा रह्या।*13:37 3:3 कै मुताबिक गशूर का राजा अबशालोम का दादा था। 38 आखर अबशालोम भाजकै गशूर म्ह गया, फेर ओड़ै तीन साल ताहीं रह्या। 39 दाऊद के मन म्ह अबशालोम कै धोरै जाण की बड़ी लालसा रही; क्यूँके अम्नोन जो मर गया था, इस कारण उसनै उसके बारै म्ह शान्ति पाई।