1 फेर अहीतोपेल नै अबशालोम तै बिनती करी, "मन्‍नै बारहा हजार माणस छाँटण दे, अर मै उठकै आज ए रात नै दाऊद पै अचानक हमला करण खात्तर पिच्छा करुँगा। 2 अर जिब दाऊद थक्या-माँदा अर कमजोर होवैगा, फेर मै उसनै पकड़ूँगा, अर डराऊँगा; अर जितने माणस उसकै गैल सैं सारे भाजैंगे। अर मै राजा ए नै मारूँगा, 3 अर मै सारे माणसां नै तेरे धोरै बोहड़ा ले आऊँगा; जिस माणस नै तू टोहवै सै उसकै मिलण तै सारी प्रजा का मिलणा हो जावैगा, अर सारी प्रजा बेफिकर होकै रहवैगी।" 4 या बात अबशालोम अर सारे इस्राएली पुरनियां नै ठीक लाग्गी।

5 फेर अबशालोम नै कह्या, "एरेकी हूशै नै भी बुला ल्यो, अर जो वो कहवैगा हम उसकी भी सुणांगें।" 6 जिब हूशै अबशालोम कै धोरै आया, फेर अबशालोम नै उसतै कह्या, "अहीतोपेल नै तो इस तरियां की बात करी सै; के हम उसकी बात मान्‍ना के न्ही? जै न्ही, तो तू कह दे।" 7 हूशै नै अबशालोम तै कह्या, "जो सलाह अहीतोपेल नै इस बार दी, वा आच्छी कोनी।" 8 फेर हूशै नै कह्या, "तू तो अपणे बाप अर उसके माणसां नै जाणै सै के वे शूरवीर सैं, अर बच्‍चा छीनी होई रीछणी के बराबर छो म्ह होंगे। तेरा बाप योद्धा सै; अर और माणसां कै गैल रात न्ही बितान्दा। 9 इस बखत तो वो किस्से गड्ढे, या किसी दुसरी जगहां म्ह छुप्या होवैगा। जिब इन म्ह तै पैहले ए हमले म्ह कोए-कोए मारे जावै, फेर इसके सारे सुणण आळे कहवैंगे, ‘अबशालोम के पक्ष आळे हारगे।’ 10 फेर वीर का दिल, जो शेर का बरगा होवै सै, उसका भी साहस टूट जावैगा, सारा इस्राएल जाणै सै के तेरा बाप वीर सै, अर उसके साथी बड़े योद्धा सैं। 11 ज्यांतै मेरी सलाह या सै कै दान तै लेकै बेर्शेबा* तक रहणआळे सारे इस्राएली तेरे धोरै समुन्दर तट के रेतकणा के तरियां कठ्ठे करे जावै, अर तू आप ए युद्ध म्ह जावै। 12 अर जिब हम उस ताहीं किसे ना किसे जगहां म्ह जित्त वो मिलै ज्या पकड़ागें, फेर जै ओस धरती पै गिरै सै उस्से तरियां हम उसपै टूट पड़ैगें; फेर ना तो वो बचैगा, अर ना उसके साथियाँ म्ह तै कोए बचैगा। 13 जै वो किसे नगर म्ह घुस्या हो, तो सारे इस्राएली उस नगर कै धोरै रस्सियाँ ले आवैंगे, अर हम उसनै नदी म्ह खींच्‍चागे, उरै ताहीं के उसका एक छोट्टा सा पत्थर भी ना रह जावैगा।" 14 फेर अबशालोम अर सारे इस्राएली माणसां नै कह्या, "एरेकी हूशै की सलाह अहीतोपेल की सलाह तै ठीक सै।" यहोवा नै तो अहीतोपेल की आच्छी सलाह ताहीं बेकार करण की ठाणी थी, के वो अबशालोम ए पै मुसीबत्त गेरै।

15 फेर हूशै नै सादोक अर एब्यातार याजकां तै कह्या, "अहीतोपेल नै तो अबशालोम अर इस्राएली पुरनियां नै इस-इस ढाळ की सलाह दी; अर मन्‍नै इस-इस ढाळ की सलाह दी सै। 16 इस करकै इब फुर्ती करकै दाऊद कै धोरै कुह्वा भेज्जो, ‘आज रात जंगळी घाट कै धोरै ना ठहरियो, जरुर पार ए हो जाईयो; इसा ना हो के राजा अर जितने माणस उसकै गैल हों, सारे नाश हो जावैं।’" 17 योनातान अर अहीमास एनरोगेल कै झरणे कै धोरै ठैहरे रहवै; अर एक दास्सी जाकै उन ताहीं सन्देसा दे आवै थी, अर वे जाकै राजा दाऊद नै सन्देसा दिया करदे; क्यूँके वे किसे कै देखदे नगर म्ह न्ही जा सकै थे। 18 एक छोरे नै उननै देखकै अबशालोम ताहीं बताया; पर वे दोन्‍नु फुर्ती तै चले गए, अर एक बहूरीमवासी माणस कै घर पोहचकै जिसके आँगण म्ह कुआँ था उस म्ह बड़गे। 19 फेर उसकी जनान्‍नी नै कपड़ा लेकै कुएँ कै मुँह पै बिछाया, अर उसकै उप्पर दळया होया नाज फैला दिया; इस करकै कै किसे नै बेरा ना पाट्टै*। 20 फेर अबशालोम के सिपाही उस घर म्ह उस जनान्‍नी कै धोरै जाकै कहण लाग्गे, "अहीमास अर योनातान कित्त सैं?" फेर उस जनान्‍नी नै उनतै कह्या, "वे तो उस छोट्टी नदी के पार गए।" फेर उननै उन ताहीं ढूँढ्या, अर ना पाकै यरुशलेम म्ह बोहड़गे।

21 जिब सिपाही चले गए, फेर योनातान और अहीमास कुएँ म्ह तै लिकड़े, अर जाकै दाऊद राजा ताहीं खबर दी; अर दाऊद तै कह्या, "थम चाल्‍लों, फुर्ती करकै नदी कै पार हो जाओ; क्यूँके अहीतोपेल नै तेरी हानि की इसी-इसी सलाह दी सै।" 22 फेर दाऊद अपणे सारे साथियाँ समेत उठकै यरदन नदी पार होग्या; अर सबेरै ताहीं उन म्ह तै एक भी न्ही रह्या जो यरदन पार ना होग्या हो।

23 जिब अहीतोपेल नै देख्या के मेरी सलाह के मुताबिक काम न्ही होया, फेर उसनै अपणे गधे पै काठ्ठी कसी, अर अपणे नगर म्ह जाकै अपणे घर म्ह गया। अर अपणे घराने के बारै म्ह जो-जो हुकम देणा था वो देकै अपणे-आपनै फाँसी लगा ली; अर वो मर ग्या, अर उसके बाप के कब्रिस्तान म्ह उस ताहीं माट्टी दे दी गई।

24 फेर दाऊद महनैम नगर म्ह पोहच्या। अर अबशालोम सारे इस्राएली माणसां समेत यरदन पार गया। 25 अबशालोम नै अमासा ताहीं योआब की जगहां पै प्रधान सेनापति ठैहराया। यो अमासा एक इस्राएली माणस का बेट्टा था जिसका नाम यित्रो था, अर वो योआब की माता, सरूयाह की भाण, अबीगैल नाम की नाहाश की बेट्टी कै गैल सोया था। 26 अर इस्राएली सिपाहियाँ नै अर अबशालोम नै गिलाद देश म्ह छावणी डाली

27 जिब दाऊद महनैम म्ह आया, फेर अम्मोनियाँ के रब्‍बाह के निवासी नाहाश का बेट्टा शोबी, अर लोदबरवासी अम्मीएल का बेट्टा माकीर, अर रोगलीमवासी गिलादी बर्जिल्‍लै, 28 खाट, तासळे, माट्टी के बरतन, गेहूँ, जौ, मैदा, लोबिया, मसूर, भूने चणे, 29 मधु, मक्खन, भेड़-बकरियाँ, अर गां के दूध का पनीर, दाऊद अर उसके साथियाँ ताहीं खाण नै या सोचकै ले आए, "जंगळ म्ह वे भूखे तिसाए अर थके-माँदे होवैंगे।"