2 शमूएल 14

अबशालोम की यरुशलेम म्ह वापसी

1 सरूयाह का बेट्टा योआब ताड़ ग्या के राजा दाऊद का मन अबशालोम की ओड़ लाग्या सै। 2 ज्यांतै योआब नै तकोआ नगर म्ह दूत भेजकै ओड़ै तै एक बुद्धिमान जनान्‍नी ताहीं बुलवाया, अर उसतै कह्या, "शोक करण आळी बण, यानिके शोक का पहरावा पहर, अर तेल ना लगा; पर इस तरियां की जनान्‍नी बण जो घणे दिन तै मरे होए माणस खात्तर बिलाप करदी रही हो। 3 फेर राजा कै धोरै जाकै इसी-इसी बात कहिये।" अर योआब नै उस ताहीं जो कुछ कहणा था वो सिखा दिया।

4 जिब तकोआ नगर की वा जनान्‍नी राजा कै धोरै गई, फेर मुँह कै बळ धरती पै गिरकै दण्डवत करकै कहण लाग्गी, "राजा की दुहाई।" 5 राजा नै उसतै पूछ्या, "तन्‍नै के चाहिये?" उसनै कह्या, "सचमुच मेरा पति मर ग्या, अर मै बिधवा होगी। 6 अर तेरी दास्सी के दो बेट्टे थे, अर उन दोनुआं नै मैदान म्ह मारपीट करी; अर उन ताहीं छुड़ाण आळा कोए ना था, ज्यांतै एक नै दुसरे ताहीं इसा मारया के वो मर ग्या। 7 इब सुण, सारे कुल के माणस तेरी दास्सी कै खिलाफ उठकै या कहवै सैं, ‘जिसनै अपणे भाई ताहीं घात करया उसनै म्हारे ताहीं सौंप दे, के उसके मारे होए भाई कै जान कै बदलै म्ह उस ताहीं मौत की सजा दें;’ अर इस तरियां वे वारिस नै भी नाश करैगें। इस तरियां वे मेरे अंगारे नै जो बच ग्या सै बुझावैगें, अर मेरे पति का नाम अर सन्तान धरती पै तै मिटा देवैंगे।"

8 राजा नै जनान्‍नी तै कह्या, "अपणे घर जा, अर मै तेरे बारै म्ह हुकम देऊँगा।" 9 फेर तकोआ की उस जनान्‍नी नै राजा तै कह्या, "हे मेरे प्रभु, हे राजा, दोष मेरे ताहीं अर मेरे पिता के कुण्बे ए नै लाग्गै; अर राजा अपणी गद्दी समेत निर्दोष ठहरै।" 10 राजा नै कह्या, "जो कोए तेरे तै किमे बोल्‍लै उसनै मेरे धोरै ल्या, फेर वो तेरे ताहीं छूण न्ही पावैगा।" 11 उसनै कह्या, "राजा अपणे परमेसवर यहोवा नै याद करै, के खून का पलटा लेण आळा अर नाश करण ना पावै, अर मेरे बेट्टे का नाश ना होण पावै।" उसनै कह्या, "यहोवा के जीवन की कसम, तेरे बेट्टे का एक बाळ भी धरती पै गिरण ना पावैगा।"*14:11 गिनती 35:19, 1 राजाओं 1:52

12 जनान्‍नी बोल्‍ली, "तेरी दास्सी अपणे प्रभु राजा तै एक बात कहण पावै।" 13 उसनै कह्या, "कहे जा।" जनान्‍नी कहण लाग्गी, "फेर तन्‍नै परमेसवर की प्रजा का नुकसान कै खात्तर इस तरियां की योजना क्यूँ करी सै? राजा नै जो यो वचन कह्या सै, इसतै वो दोषी सा ठहरै सै, क्यूँके राजा अपणे लिकाड़े होए नै बोहड़ा न्ही ल्यान्दा। 14 हमनै तो मरणा ए सै, अर धरती पै गिरे होए पाणी कै बराबर ठहरैगें, जो फेर उठाया न्ही जान्दा; तोभी परमेसवर जान न्ही लेन्दा, बल्के इसी योजना करै सै के लिकाड़या होया उसकै धोरै तै लिकाड़या होया ना रहवै। 15 अर इब मै जो अपणे प्रभु राजा तै या बात कहण नै आई सूं, इसका कारण या सै, के माणसां नै मेरे ताहीं डरा दिया था; ज्यांतै तेरी दास्सी नै सोच्या, ‘मै राजा तै बोल्‍लूँगी, कदे भी राजा अपणी दास्सी की बिनती नै पूरी करै। 16 बेशक राजा सुणकै जरुर अपणी दास्सी नै उस माणस कै हाथ तै बचावैगा, जो मन्‍नै अर मेरे बेट्टे दोन्‍नु नै परमेसवर के भाग म्ह तै नाश करणा चाहवै सै।’ 17 आखर तेरी दास्सी नै सोच्या, ‘मेरे प्रभु राजा के वचन तै शान्ति मिलै;’ क्यूँके मेरा प्रभु राजा परमेसवर के किसे दूत कै बराबर भले-बुरे म्ह भेद कर सकै सै; ज्यांतै तेरा परमेसवर यहोवा तेरे गैल रहवै।"

18 राजा नै जवाब देकै उस जनान्‍नी तै कह्या, "जो बात मै तेरे तै पूच्छु सूं उसनै मेरे तै ना छुपा।" जनान्‍नी नै कह्या, "मेरा प्रभु राजा कहे जावै।" 19 राजा नै पूच्छया, "इस बात म्ह के योआब तेरा साथी सै?" जनान्‍नी नै जवाब देकै कह्या, "हे मेरे प्रभु, हे राजा, तेरी जान की कसम, जो कुछ मेरे प्रभु राजा नै कह्या सै, उसतै कोए ना दाई और मुड़ सकै सै अर ना बाई और। तेरे दास योआब ए नै मेरे ताहीं हुकम दिया, अर ये सारी बात उस्से नै तेरी दास्सी तै सिखाई सैं। 20 तेरे दास योआब नै यो काम ज्यांतै करया के बात का रंग बदलै। अर मेरा प्रभु परमेसवर कै एक दूत के बराबर बुद्धिमान सै, उरै तक के धरती पै जो कुछ होवै सै उन सारया नै वो जाणै सै।"

21 फेर राजा नै योआब तै कह्या, "सुण, मन्‍नै या बात मान्‍नी सै; तू जाकै उस जवान अबशालोम नै बोहड़ा ल्या।" 22 फेर योआब नै धरती पै मुँह कै बळ गिर दण्डवत कर राजा ताहीं आशीर्वाद दिया; अर योआब कहण लाग्या, "हे मेरे प्रभु, हे राजा, आज तेरा दास जाण ग्या के मेरे पै तेरे अनुग्रह की नजर सै, क्यूँके राजा नै अपणे दास की बिनती सुणी सै।" 23 आखर योआब उठकै गशूर म्ह गया, अर अबशालोम नै यरुशलेम ले आया।*14:23 गशूर गलील कै समुन्दर कै उत्तरी-पूर्वी इलाके के एक छोट्टे अरामी इलाके म्ह मौजूद था 24 फेर राजा नै कह्या, "वो अपणे घर जाकै रहवै; अर मेरा दर्शन ना पावै।" फेर अबशालोम अपणे घरा चल्या ग्या, अर राजा का दर्शन न्ही पाया।

अबशालोम का राजा के स्याम्ही जाणा

25 सारे इस्राएल म्ह सुन्दरता के कारण घणी प्रशंसा योग्य अबशालोम के बराबर और कोए ना था; बल्के उस म्ह सिर तै पाँ ताहीं कुछ दोष ना था। 26 वो साल कै आखर म्ह अपणा सिर मुण्डाया करदा; (उसके बाळ उसनै भारी जान पड़या करदे, इस कारण वो उस नै मुण्डाया करदा) अर जिब-जिब वो उसनै मुँण्डान्दा तब-तब अपणे सिर के बाळ तौल कै राजा के तौल के मुताबिक दो सौ शेकेल भर*14:26 दो सौ शेकेल भर लगभग दो किलो पान्दा था। 27 अबशालोम के तीन बेट्टे, अर तामार नाम की एक बेट्टी पैदा होई थी; अर या रुपवती जनान्‍नी थी।

28 आखर अबशालोम राजा का दर्शन बिना पाए यरुशलेम म्ह दो साल रह्या। 29 फेर अबशालोम नै योआब ताहीं बुलावा भेज्जा के उसनै राजा दाऊद कै धोरै भेज्जे; पर योआब नै उसकै आण तै मना कर दिया। अर उसनै उस ताहीं दुसरी बार बुलावा भेज्जा, पर फेर भी उसनै आण तै मना कर दिया। 30 फेर अबशालोम नै अपणे सेवकां तै कह्या, "सुणो, योआब का एक खेत मेरी जमीन कै धोरै सै, अर उस म्ह उसका जौ खड़या सै; थम जाकै उस म्ह आग लगाओ।" अर अबशालोम के सेवकां नै उस खेत म्ह आग लगा दी। 31 फेर योआब उठ्या, अर अबशालोम कै घर म्ह उसकै धोरै जाकै उसतै पूछण लाग्या, "तेरे सेवकां नै मेरे खेत म्ह क्यूँ आग लगाई सै?" 32 अबशालोम नै योआब तै कह्या, "मन्‍नै तो तेरे धोरै या कुह्वा भेज्या था, ‘उरै आणा के मै तन्‍नै राजा कै धोरै या कहण नै भेज्जूँ, "मै गशूर तै क्यूँ आया? मै इब तक ओड़ैए रहन्दा तो आच्छा होन्दा।" इस खात्तर इब राजा मेरे ताहीं दर्शन दे; अर जै मै दोषी सूं, तो वो मेरे ताहीं मार देवै।’" 33 फेर योआब नै राजा कै धोरै जाकै उस ताहीं या बात सुणाई; अर राजा नै अबशालोम ताहीं बुलवाया। आखर वो उसकै धोरै गया, अर उसकै स्याम्ही धरती पै मुँह कै बळ गिरकै दण्डवत करया; अर राजा नै अबशालोम ताहीं चुम्या।