2 शमूएल 18

अबशालोम की हार अर मौत

1 कुछ दिनां कै बाद फेर राजा दाऊद नै अपणे गैल के माणसां की गिणती करवाई, अर उनपै सहस्त्रपति अर शतपति ठहराए। 2 फेर दाऊद नै माणसां की एक तिहाई योआब के, अर एक तिहाई सरूयाह के बेट्टे योआब के भाई अबीशै के, अर एक तिहाई गती इत्तै के, हक म्ह करकै युद्ध म्ह भेज दिया। फेर राजा नै माणसां तै कह्या, "मै भी जरुर थारे गैल चाल्‍लूँगा।" 3 सिपाहियाँ नै दाऊद तै कह्या, "तू जाण ना पावैगा। क्यूँके चाहे हम भाज जावां, तोभी वे म्हारी चिन्ता न्ही करैगें; बल्के चाहे म्हारे म्ह तै आध्धे मारे भी जावैं, तोभी वे म्हारी चिन्ता न्ही करैगें। पर तू म्हारे जिसे दस हजार माणसां कै बराबर सैं; ज्यांतै आच्छा यो सै के तू नगर म्ह तै म्हारी मदद करण नै त्यार रहवै।" 4 राजा नै उनतै कह्या, "जो कुछ थमनै भावै वोए मै करुँगा।" ज्यांतै राजा फाटक की एक और खड़या रह्या, अर सारे माणस सौ-सौ, अर हजार, हजार करकै लिकड़ण लाग्गे। 5 राजा नै योआब, अबीशै, अर इत्तै ताहीं हुकम दिया, "मेरे निमित्त उस जवान, यानिके अबशालोम तै कोमलता करियो।" यो हुकम राजा नै अबशालोम के बारै म्ह सारे प्रधानां ताहीं सारे माणसां कै सुणान्दे होए दिया।

6 आखर माणस इस्राएल का सामना करण नै मैदान म्ह लिकड़े; अर एप्रैम नाम के बण म्ह युद्ध होया। 7 ओड़ै इस्राएली माणस दाऊद के माणसां तै हारगे, अर उस दिन इसा बड़ा संहार होया के बीस हजार मारे गए 8 युद्ध उस सारे देश म्ह फैलग्या; अर उस दिन जितने माणस तलवार तै मारे गए, उनतै भी घणे बण कै कारण मरगे

9 संयोग तै अबशालोम अर दाऊद के सैनिकां की भेंट होगी। अबशालोम एक खच्‍चर पै चढ़या होया था, के खच्‍चर एक बड़े बांज दरखत की घणी डाळियाँ के नीच्‍चै तै गया, अर उसका सिर उस बांज दरखत म्ह अटक ग्या, अर वो बीच म्ह लटक्या रहग्या, अर उसका खच्‍चर लिकड़ ग्या। 10 इसनै देखकै किसे माणस नै योआब ताहीं बताया, "मन्‍नै अबशालोम ताहीं बांज दरखत म्ह टँग्या होया देख्या।" 11 योआब नै बताण आळे तै कह्या, "तन्‍नै यो देख्या! फेर क्यूँ उस ताहीं ओड़ैए मारकै धरती पै न्ही गिरा दिया? तो मै तन्‍नै दस टुकड़े चाँदी अर एक कमर का पट्टा देन्दा।"*18:11 गामां कै इलाकै म्ह एक शेकेल एक दिन की मजदूरी कै बराबर सै 12 उस माणस नै योआब तै कह्या, "चाहे मेरे हाथ म्ह हजार टुकड़े चाँदी तौल कै दिए जावै, तोभी राजकुमार कै खिलाफ हाथ न्ही बढ़ाऊँगा; क्यूँके म्हारे सुणदे राजा नै तेरे ताहीं अर अबीशै अर इत्तै ताहीं यो हुकम दिया, ‘थारे म्ह तै कोए क्यूँ ना हो उस जवान यानिके अबशालोम ताहीं ना छुवै।’ 13 जै मै धोक्खा देकै उसकी जान ले लेन्दा, तो तू आप मेरा बिरोधी हो जान्दा, क्यूँके राजा तै कोए बात छिपी न्ही रहन्दी।" 14 योआब नै कह्या, "मै तेरे गैल इस तरियां ठहरया न्ही रह सकदा!" ज्यांतै उसनै तीन लाकड़ी हाथ म्ह लेकै अबशालोम के दिल म्ह, जो बांज दरखत म्ह जिन्दा ए लटक्या था, छेद दिया। 15 फेर योआब के दस हथियार ढोणआळे जवानां नै अबशालोम ताहीं घेर कै इसा मारया के वो मर ग्या।

16 फेर योआब नै लड़ाई रोकण खात्तर नरसिंगा फूँक्या, अर माणस इस्राएल का पिच्छा करण तै बोहड़े; क्यूँके योआब प्रजा नै बचाणा चाहवै था*18:16 योआब प्रजा नै बचाणा चाहवै था योआब नै सेना वापिस बुला ली। 17 फेर माणसां नै अबशालोम ताहीं तारकै उस बण के एक बड़े गड्ढे म्ह गेर दिया, अर उसपै पत्थरां का एक घणा बड़ा ढेर लगा दिया; अर सारे इस्राएली अपणे-अपणे डेरे म्ह भाजगे। 18 अपणे जिन्दे जी अबशालोम नै या सोचकै कै मेरे नाम की याद गिरी करवाण आळा कोए बेट्टा मेरा न्ही सै, अपणे खात्तर वो खम्बयाँ खड़या कराया था जो राजा की तराई म्ह सै; अर खम्बयाँ का अपणा ए नाम राख्या, जो आज कै दिन तक अबशालोम का खम्बयाँ कुहवावै सै।

दाऊद ताहीं अबशालोम की मौत की खबर मिलणा

19 फेर सादोक के बेट्टे अहीमास नै कह्या, "मन्‍नै दौड़कै राजा नै यो समाचार देण दे, के यहोवा नै न्याय करकै तेरे ताहीं तेरे दुश्मनां कै हाथ तै बचाया सै।" 20 योआब नै उसतै कह्या, "तू आज कै दिन खबर ना दे; दुसरे दिन समाचार देण पावैगा, पर आज खबर ना दे, इस करकै के राजकुमार मर ग्या सै।" 21 फेर योआब नै एक कूशी*18:21 कूशी एथोपियन दास तै दौड़ते होए कह्या, "जो कुछ तन्‍नै देख्या सै वो जाकै राजा नै बता दे।" तो वो कूशी योआब नै दण्डवत करकै चल्या गया। 22 फेर सादोक के बेट्टे अहीमास नै दुसरी बार योआब तै कह्या, "जो हो सो हो, पर मन्‍नै भी कूशी कै पाच्छै जाण दे।" योआब नै कह्या, "हे मेरे बेट्टे, तेरे सन्देस का कुछ ईनाम न्ही मिलैगा, फेर तू क्यूँ जाणा चाहवै सै?" 23 उसनै यो कह्या, "जो हो सो हो, पर मन्‍नै जाणे दे।" उसनै उसतै कह्या, "दौड़।" फेर अहीमास गया, अर तराई तै होकै कूशी कै आग्गै बढ़ ग्या।

24 दाऊद तो दो फाटकां कै बीच बैठ्या था, के रखवाळा जो फाटक की छात तै होकै शहरपनाह पै चढ़ ग्या था, उसनै निगांह ठाकै के देख्या, के एक माणस एक्ला भाज्या आवै सै। 25 जिब रखवाळे नै रुक्‍का मारकै राजा ताहीं बता दिया, फेर राजा नै कह्या, "जै एक्ला आन्दा हो, तो सन्देसा ल्यान्दा होवैगा।" वो भाजदे-भाजदे लिकड़ आया। 26 फेर रखवाळे नै एक और माणस ताहीं भाजदे होए देख फाटक के रखवाळे ताहीं रुक्‍का मारकै कह्या, "सुण, एक और माणस एक्ला दौड़या आवै सै।" राजा नै कह्या, "वो भी सन्देसा ल्यान्दा होवैगा।" 27 रखवाळे नै कह्या, "मन्‍नै तो इसा देख पड़ै सै के पैहले का भाजणा सादोक के बेट्टे अहीमास के जिसा सै।" राजा नै कह्या, "वो तो भला माणस सै, तो भला सन्देस ल्यान्दा होवैगा।"

28 फेर अहीमास नै रुक्‍का मारकै राजा तै कह्या, "सब ठीक-ठाक सै।" फेर उसनै धरती पै मुँह कै बळ गिर राजा ताहीं दण्डवत करकै कह्या, "तेरा परमेसवर यहोवा धन्य सै, जिसनै मेरे प्रभु राजा कै खिलाफ हाथ ठाणआळे माणसां ताहीं तेरे वश म्ह कर दिया सै!" 29 राजा नै पूच्छया, "के वो जवान अबशालोम ठीक-ठाक सै?" अहीमास नै जवाब दिया, "जिब योआब नै राजा के कर्मचारी ताहीं अर तेरे दास ताहीं भेज दिया, फेर मन्‍नै बड़ी भीड़ देख पड़ी, पर बेरा न्ही पाट्या के, के होया था।" 30 राजा नै कह्या; "हटकै उरैए खड़या रह।" अर वो हटकै खड़या रह्या।

31 फेर कूशी भी आ ग्या; अर कूशी कहण लाग्या, "मेरे प्रभु राजा खात्तर खबर सै। यहोवा नै आज न्याय करकै तेरे ताहीं उन सारया कै हाथ तै बचाया सै जो तेरे खिलाफ उठे थे।" 32 राजा नै कूशी तै पूच्छया, "के वो जवान यानिके अबशालोम सही-सलामत सै?" कूशी नै जवाब दिया, "मेरे प्रभु राजा के दुश्मन, अर जितने तेरी हानि खात्तर उठे सैं, उनकी दशा उस जवान की सी हो।" 33 फेर राजा घणा घबराया*18:33 राजा घणा घबराया इसतै राजा नै बेरा पाट ग्या के राजा मर ग्या सै, अर राजा घणा दुखी होग्या, अर फाटक कै उप्पर की अटारी पै रोन्दा होया चढ़ण लाग्या; अर चाल्दे-चाल्दे या कहन्दा गया, "हाय मेरे बेट्टे अबशालोम! मेरे बेट्टे, हाय! मेरे बेट्टे अबशालोम! भला होन्दा के मै आप तेरे बदलै मरदा, हाय! अबशालोम! मेरे बेट्टे, मेरे बेट्टे!"