2 शमूएल 21

गिबोनियाँ का बदला लिया जाणा

1 दाऊद के राज कै दिनां म्ह लगातार तीन साल ताहीं अकाळ पड़या; तो दाऊद नै यहोवा तै प्रार्थना करी अर पूच्छया। यहोवा नै जवाब दिया, "यो शाऊल अर उसके खून्‍नी घराने कै कारण होया, क्यूँके उसनै गिबोनियाँ ताहीं मरवा दिया था।" 2 फेर राजा नै गिबोनियाँ ताहीं बुलाकै उनतै बात करी। गिबोनी माणस तो इस्राएलियाँ म्ह तै न्ही थे, वे बचे होए एमोरियां म्ह तै थे; अर इस्राएलियाँ नै उनकै गैल कसम खाई थी, पर शाऊल नै जो इस्राएलियाँ अर यहूदियाँ खात्तर जळण होई थी, इसतै उसनै उन ताहीं मारण खात्तर कोशिश करी थी। 3 फेर दाऊद नै गिबोनियाँ तै पूच्छया, "मै थारे खात्तर के करुँ? अर के करकै इसा प्रायश्चित करुँ, के थम यहोवा के खास भाग नै आशीर्वाद दे सको?" 4 गिबोनियाँ नै उसतै कह्या, "म्हारे अर शाऊल या उसके घराने कै बीच म्ह रुपये-पईसे का किमे झगड़ा कोनी; अर ना म्हारा काम सै के किसी इस्राएली नै मार द्याँ।" उसनै कह्या, "जो कुछ थम कहो, वोए मै तेरे खात्तर करुँगा।" 5 उननै राजा तै कह्या, "जिस माणस नै म्हारे ताहीं नाश कर दिया, अर म्हारे खिलाफ इसी योजना करी के म्हारा इसा सत्यानाश हो जावै, के इस्राएल के देश म्ह आग्गै तै ना रह सकां, 6 उसके खानदान के सात माणस म्हारे ताहीं सौंप दिए जावैं, अर हम उननै यहोवा खात्तर यहोवा के चुणे होए शाऊल की गिबा नाम की बस्ती म्ह फाँसी देवांगे।" राजा नै कह्या, "मै उन ताहीं सौंप देऊँगा।"

7 पर दाऊद नै अर शाऊल के बेट्टे योनातान नै आप्पस म्ह यहोवा की शपथ खाई थी, इस कारण राजा नै योनातान के बेट्टे मपीबोशेत ताहीं जो शाऊल का पोत्ता था बचाए राख्या। 8 पर अर्मोनी अर मपीबोशेत नाम की, अय्या की बेट्टी रिस्पा के दोन्‍नु बेट्टे जो शाऊल तै पैदा होए थे; अर शाऊल की बेट्टी मेरब के पाँच बेट्टे, जो वो महोलवासी बर्जिल्‍लै के बेट्टे अद्रीएल की और तै थे, इन ताहीं राजा नै पकड़वाकै 9 गिबोनियाँ कै हाथ सौंप दिया, अर उन ताहीं उननै पहाड़ पै यहोवा कै स्याम्ही फाँसी दी, अर सात्तु एक साथ नाश होए। उनका मार गेरया जाणा तो कटणी के पैहले दिनां म्ह, यानिके जौ की कटणी के शरुआत म्ह होया।

10 फेर अय्या की बेट्टी रिस्पा नै टाट लेकै, कटणी के शरुआत तै लेकै जिब तक अकास तै उनपै खूब बारिस ना होई, जिब ताहीं चट्टान पै उसनै अपणे नीच्‍चै बिछाये रही; अर ना तो दिन म्ह अकास के पंछियाँ तै, अर न रात म्ह जंगळी-पशुआं तै उननै छूण दिया। 11 जिब अय्या की बेट्टी शाऊल की रखैल रिस्पा के इस काम की खबर दाऊद नै मिली, 12 तो दाऊद नै जाकै शाऊल अर उसके बेट्टे योनातान की हाड्डियाँ ताहीं गिलादी याबेश के माणसां तै ले लिया, जिन ताहीं उननै बेतशान के उस चौक तै चुरा लिया था, जित्त पलिश्तियाँ नै उन ताहीं उस दिन टाँग्या था, जिब उननै शाऊल ताहीं गिलबो पहाड़ पै मार गेरया था; 13 दाऊद ओड़ै तै शाऊल अर उसके बेट्टे योनातान की हड्डियाँ नै ले आया; अर सात फाँसी पाए होए माणसां की हड्डियाँ भी कठ्ठी करी गई। 14 अर शाऊल अर उसके बेट्टे योनातान की हड्डियाँ बिन्‍यामीन के देश की जेळ म्ह शाऊल के पिता कीश के कब्रिस्तान म्ह गाड्डी गई; अर दाऊद के सारे हुकम कै मुताबिक काम होया। उसकै बाद परमेसवर नै देश खात्तर प्रार्थना सुण ली।

दाऊद का पलिश्तियाँ पै जीत पाणा

15 कुछ बखत बाद पलिश्तियाँ नै इस्राएल तै फेर युद्ध करया, अर दाऊद अपणे सिपाहियाँ समेत जाकै पलिश्तियाँ तै लड़ण लाग्या; पर दाऊद थक ग्या। 16 फेर यिशबोबनोब, जो रपाई के खानदान का था, अर उसके भाले का फळ तौल म्ह तीन सौ शेकेल*21:16 तीन सौ शेकेल लगभग साढ़े तीन किलो पीतळ का था, अर वो नई तलवार बाँधे होए था, उसनै दाऊद ताहीं मारण की ठान ली थी। 17 पर सरूयाह के बेट्टे अबीशै नै दाऊद की मदद करकै उस पलिश्ती ताहीं इसा मारया के वो मर ग्या। फेर दाऊद के माणसां नै कसम खाकै उसतै कह्या, "तू फेर म्हारे गैल युद्ध म्ह जाण न्ही पावैगा, इसा न हो के तेरे मरण तै इस्राएल का दीवा बुझ जावै।"

18 इसकै बाद पलिश्तियाँ कै गैल गोब म्ह फेर युद्ध होया; उस बखत हूशाई सिब्बकै नै रपाईवंशी सप ताहीं मारया। 19 गोब म्ह पलिश्तियाँ कै गैल फेर युद्ध होया; उस म्ह बैतलहमवासी यारयोरगीम के बेट्टे एल्हनान नै गतवासी गोलियत ताहीं मार गेरया, दुश्मन कै बर्छे की छड़ जुलाहे की डोंगी कै बराबर थी। 20 फेर गत म्ह भी युद्ध होया, अर ओड़ै बड़े डील-डोल आळा एक रपाईवंशी दानव था, जिसके एक-एक हाथ पाँव म्ह, छः-छः आंगळी, यानिके गिणती म्ह चौबीस आंगळी थी। 21 जिब उसनै इस्राएलियाँ ताहीं ललकारा, तो दाऊद के भाई शिमआह के बेट्टे योनातान नै उस दानव ताहीं मारया। 22 येए च्यार गत म्ह उस रपाई तै पैदा होए थे; अर वे दाऊद अर उसके सिपाहियाँ कै जरिये मार दिये गए।