1 दाऊद के आखरी वचन ये सै:

"यिशै के बेट्टे की या वाणी सै, उस माणस की वाणी सै जो ऊँच्‍चे पर खड़या करया गया,

अर याकूब के परमेसवर का अभिषिक्त,

अर इस्राएल का मिठ्ठा भजन गाण आळा सै।"

2 "यहोवा के आत्मा नै मेरे म्ह होकै कह्या,

अर उस्से का वचन मेरे मुँह म्ह आया।*

3 इस्राएल के परमेसवर नै कह्या सै,

इस्राएल की चट्टान नै मेरे तै बात करी सैं,

के माणसां म्ह प्रभुता करण आळा एक धर्मी होवैगा,

जो परमेसवर का भय मान्दा होया प्रभुता करैगा,

4 वो मान्‍नो भोर का प्रकाश होवैगा जिब सूरज लिकड़ै सै,

इसा भोर जिस म्ह बाद्दळ ना हों,

जिसा बारिस कै बाद साफ मौसम के कारण धरती तै हरी-हरी घास उगै सै।

5 के मेरा घराना परमेसवर की नजर म्ह इसा न्ही सै?

उसनै तो मेरे गैल सदा का एक इसा करार करया सै,

जो सारी बात्तां म्ह ठीक करया होया अर अटल भी सै।

क्यूँके चाहे वो उसनै प्रगट ना करै,

तोभी मेरा पूरा उद्धार अर पूरी इच्छा का विषय वोए सै।

6 पर ओच्छे माणस सारे के सारे निकम्मी झाड़ियाँ

कै बराबर सैं जो हाथ तै पकड़ी न्ही जान्दी;

7 पर जो माणस उन ताहीं छुवै उसनै लोहे

अर भाले की छड़ तै सुसज्जित होणा चाहिये।

ज्यांतै वे अपणी ए जगहां म्ह आग तै भस्म कर दिए जावैंगे।"

8 दाऊद के शूरवीरां के नाम ये सैं: यानिके तहकमोनी योशेब्यश्शेबेत, जो सरदारां म्ह खास था; वो एस्‍नी अदीनो भी कुहाया करदा; जिसनै एक ए बखत म्ह आठ सौ माणस मार दिये।

9 उसकै बाद अहोही दोदो का बेट्टा एलियाजर था। वो उस बखत दाऊद के गैल के तीन्‍नु वीरां म्ह तै था, जब के उननै युद्ध खात्तर कठ्ठे होए पलिश्तियाँ ताहीं ललकारया, अर इस्राएली माणस चले गए थे। 10 वो कमर बाँधकै पलिश्तियाँ नै तब ताहीं मारदा रह्या जिब तक उसका हाथ थक न्ही गया, अर तलवार हाथ तै चिपट ना गई; अर उस दिन यहोवा नै बड़ी विजय कराई; अर जो माणस उसके पाच्छै हो लिए वे सिर्फ लूटण ए खात्तर उसके पाच्छै हो लिए।

11 उसकै बाद आगै नाम का एक हरारी का बेट्टा शम्मा था। पलिश्तियाँ नै कठ्ठे होकै एक जगहां म्ह दल बाँध्या, जित्त मसूर का एक खेत था; अर माणस उनके डर के मारे भाजे। 12 फेर उसनै खेत कै बीच म्ह खड़े होकै खेत ताहीं बचाया, अर पलिश्तियाँ ताहीं मारया; अर यहोवा नै बड़ी जीत दिलाई।

13 फेर तीसों खास सरदारां म्ह तै तीन माणस कटणी के दिनां म्ह दाऊद कै धोरै अदुल्‍लाम नाम की गुफा म्ह आए, अर पलिश्तियाँ का दल रपाईम नाम की तराई म्ह छावणी करे होए था। 14 उस बखत दाऊद गढ़ म्ह था; अर उस बखत पलिश्तियाँ की चौक्‍की बैतलहम म्ह थी। 15 फेर दाऊद नै बड़ी अभिलाषा कै गैल कह्या, "कौण मन्‍नै बैतलहम के फाटक कै धोरै के कुएँ का पाणी पियावैगा?" 16 आखर वे तीन्‍नु वीर पलिश्तियाँ की छावणी पै टूट पड़े, अर बैतलहम के फाटक के कुएँ तै पाणी भरकै दाऊद कै धोरै ले आए। पर उसनै पीण तै मना करया, अर यहोवा के स्याम्ही अर्घ करकै उण्डेल्या, 17 अर कह्या, "हे यहोवा, मेरे तै इसा काम दूर रहवै। के मै उन माणसां का लहू पीऊँ जो अपणी जान पै खेलकै गए थे?" ज्यांतै उसनै उस पाणी ताहीं पीण तै मना करया। इन तीन वीरां नै तो येए काम करे।

18 अबीशै जो सरूयाह के बेट्टे योआब का भाई था, वो तीनुआं तै खास था। उसनै अपणा भाला चलाकै दुश्मनां कै तीन सौ सिपाहियाँ ताहीं मार गेरया, अर तीन्‍नु म्ह नाम्मी होग्या। 19 के वो तीनुआं तै घणा प्रतिष्ठित न्ही था? अर इस्से तै वो उनका प्रधान होग्या; पर वो तीनुआं के पद ताहीं ना पोंहचा।

20 फेर यहोयादा का बेट्टा बनायाह था, जो कबसेलवासी एक बड़ा काम करण आळे वीर का बेट्टा था; उसनै शेर सरीखे दो मोआबियाँ* ताहीं मार गेरया। बर्फ गिरण कै बखत उसनै एक गड्ढे म्ह उतरकै एक शेर ताहीं मार गेरया। 21 फेर उसनै एक रुपवान मिस्री माणस ताहीं मार गेरया। मिस्री तो हाथ म्ह भाला लिए होए था; पर बनायाह एक लाठ्ठी ए लिए होए उसकै धोरै गया, अर मिस्री कै हाथ तै भाला खोसकै उस्से कै भाले तै उस्से ताहीं मार दिया। 22 इसे-इसे काम करकै यहोयादा का बेट्टा बनायाह उन तीन्‍नु वीरां म्ह नाम्मी होग्या। 23 वो तीसां तै घणा प्रतिष्ठित तो था, पर खास तीन्‍नु पद ताहीं ना पोहच्या। उस ताहीं दाऊद नै ए अपणे रखवाळेयाँ का प्रधान नियुक्त करया।

24 फेर तीसां म्ह योआब का भाई असाहेल; बैतलहमी दोदो का बेट्टा एल्हनान, 25 हेरोदी शम्मा, अर एलीका, 26 पेलेती हेलेस, तकोई इक्‍केश का बेट्टा ईरा, 27 अनातोती अबीएजेर, हूशाई मबुन्‍ने, 28 अहोही सल्मोन, नतोपाही महरै, 29 एक अर नतोपाही बानाह का बेट्टा हेलेब, बिन्‍यामीनियाँ के गिबा नगर के रीबै का बेट्टा इत्तै, 30 पिरातोनी, बनायाह, गाश के नाळयां कै धोरै रहण आळा हिद्दै, 31 अराबा का अबीअल्बोन, बहूरीमी अज्मावेत, 32 शालबोनी एल्यहबा, याशेन की पीढ़ी म्ह तै योनातान, 33 हरारी शम्मा, हरारी शारार का बेट्टा अहीआम, 34 माका

देश के अहसबै का बेट्टा एलीपेलेत, गीलोवासी अहीतोपेल का बेट्टा एलीआम, 35 कर्मेली हेस्रो, अराबी पारै 36 सोबा नातान का बेट्टा यिगाल, गादी बानी, 37 अम्‍मोनी सेलेक, बेरोती नहरै जो सरूयाह के बेट्टे योआब का हथियार ढोण आळा था, 38 येतेरी ईरा, अर गारेब, 39 अर हित्ती ऊरिय्याह था। सारे मिलाकै सैंतीस थे।