2 शमूएल 19

दाऊद का यरुशलेम म्ह बोहड़णा

1 फेर योआब नै या खबर मिली, "राजा दाऊद अबशालोम खात्तर रोण लाग रहया सै अर बिलाप करण लाग रहया सै।" 2 ज्यांतै उस दिन की जीत सारे माणसां की समझ म्ह बिलाप ए का कारण बणगी; क्यूँके माणसां नै उस दिन सुण्या, के राजा अपणे बेट्टे खात्तर दुखी सै। 3 ज्यांतै उस दिन माणस इसा मुँह चुराकै महनैम नगर म्ह आये, जिसा माणस युद्ध तै भाज आण तै शर्मिन्दा होकै मुँह चुरावै सैं।

4 अर राजा मुँह ढकै होए रुक्‍के मार-मारकै पुकारदा रह्या, "हाय मेरे बेट्टे अबशालोम! हाय अबशालोम, मेरे बेट्टे, मेरे बेट्टे!" 5 फेर योआब घर म्ह राजा कै धोरै जाकै कहण लाग्या, "तेरे कर्मचारियाँ नै आज कै दिन तेरा, अर तेरे बेट्टे-बेटियाँ का अर तेरी घर आळियाँ अर रखैल्‍लां की जान तो बचाई सै, पर तन्‍नै आज कै दिन उन सारया का मुँह काळा करया सै; 6 ज्यांतै के तू अपणे दुश्मनां तै प्यार अर अपणे प्यार करणियां तै बैर राक्खै सै। तन्‍नै आज यो प्रगट करया के तन्‍नै हाकिमां अर कर्मचारियाँ की किमे चिन्ता कोनी; बल्के मन्‍नै आज जाण लिया, के जै हम सारे आज मारे जान्दे अर अबशालोम जिन्दा रहन्दा, तो तू घणा खुश होन्दा। 7 इस करकै इब उठकै बाहर जा, अर अपणे सिपाहियाँ नै शान्ति दे; न्ही तो मै यहोवा की शपथ खाकै कहूँ सूं के जै तू बाहर न्ही जावैगा, तो आज रात नै एक माणस भी तेरे गैल न्ही रहवैगा; अर तेरे बचपन तै लेकै इब तक जितनी मुसीबत तेरै पै पड़ी सैं उन सबतै या मुसीबत बड़ी होवैगी।"

8 फेर राजा उठकै फाटक म्ह जा बैठ्या। जिब सारे माणसां ताहीं यो बताया ग्या, के राजा फाटक म्ह बैठ्या सै; फेर सारे माणस राजा कै स्याम्ही आए। इस बीच इस्राएली अपणे-अपणे डेरे म्ह भाज गए थे। 9 इस्राएल के सारे गोत्रां के सारे माणस आप्पस म्ह या कहकै झगड़ै थे, "राजा नै म्हारे ताहीं म्हारे दुश्मनां के हाथ तै बचाया था, अर पलिश्तियाँ के हाथ तै उस्से नै म्हारे ताहीं छुड़ाया; पर इब वो अबशालोम के डर के मारे देश छोड़कै भाज ग्या। 10 अबशालोम जिसनै म्हारे ताहीं अपणा राजा होण नै अभिषेक करया था, वो युद्ध म्ह मर ग्या सै। तो इब थम क्यूँ चुप रहो? अर राजा नै बोहड़ ल्याण की चर्चा क्यूँ न्ही करदे?"

11 फेर राजा दाऊद नै सादोक अर एब्यातार याजकां कै धोरै कुह्वा भेज्या, "यहूदी पुरनियां तै कहो, ‘थम राजा नै भवन पोहचाण खात्तर सबतै पाच्छै क्यूँ होवो सो जिब के सारे इस्राएल की बातचीत राजा के सुणण म्ह आई सै, के उसनै भवन म्ह पोहचावै 12 थम तो मेरे भाई, बल्के मेरी ए हाड्डी अर माँस सो; तो थम राजा नै बोहड़ाण म्ह सारया कै पाच्छै क्यूँ होवो सो?’ 13 फेर अमासा तै यो कहो, ‘के तू मेरी हाड्डी अर माँस न्ही सै? अर जै तू योआब की जगहां पै सदा खात्तर सेनापति ना ठैहरे, तो परमेसवर मेरे तै उसाए बल्के उसतै भी घणा करै’" 14 इस तरियां उसनै सारे यहूदी माणसां के मन इसे अपणी और खींच लिया के मानो एक ए माणस था; अर उननै राजा के धोरै कुह्वा भेज्या, "तू अपणे सारे सेना नै गैल लेकै बोहड़ आ।" 15 फेर राजा बोहड़कै यरदन ताहीं आ ग्या; अर यहूदी लोग गिलगाल शहर ताहीं गए के उसतै मिलकै उसनै यरदन पार ले आवै।

शिमी को क्षमादान

16 यहूदियाँ के गैल गेरा का बेट्टा बिन्‍यामीनी शिमी भी जो बहूरीम नगर का रहण आळा था फुर्ती करकै राजा दाऊद तै भेंट करण नै गया; 17 उसकै गैल हजार बिन्‍यामीनी माणस थे अर शाऊल के घराने का कर्मचारी सीबा अपणे पन्द्रह बेट्टे अर बीस दास्सां समेत था, अर वे राजा कै स्याम्ही यरदन पार पैदल उतरगे। 18 अर एक बेड़ा राजा के परिवार नै पार ले आण, अर जिस काम म्ह वो उस नै लगाणा चावै था उस्से म्ह लागण खात्तर पार गया। जिब राजा यरदन पार जाण पै था, तो गेरा का बेट्टा शिमी उसके पाँयां पै गिरकै, 19 राजा तै कहण लाग्या, "मेरा प्रभु मेरे दोष का लेखा ना ले, अर जिस दिन मेरा प्रभु राजा यरुशलेम नै छोड़ आया, उस दिन तेरे दास नै जो कुटिल काम करया, उस ताहीं याद ना करै अर ना राजा उसनै अपणे ध्यान म्ह राक्खै। 20 क्यूँके तेरा दास जाणै सै के मन्‍नै पाप करया; देख, आज अपणे प्रभु राजा तै भेंट करण खात्तर यूसुफ के सारे घराने म्ह तै मै ए पैहले आया सूं।" 21 फेर सरूयाह के बेट्टे अबीशै नै कह्या, "शिमी नै जो यहोवा के अभिषिक्त ताहीं श्राप दिया था, इस कारण के उसका वध करणा न्ही चाहिये?" 22 दाऊद नै कह्या, "हे सरूयाह के बेट्यो, मन्‍नै थारे तै के काम, के थम आज मेरे बिरोधी ठैहरे सो? आज इस्राएल म्ह के किस्से नै प्राणदण्ड मिलैगा? के मै न्ही जाणदा के आज मै इस्राएल का राजा होया सूं?" 23 फेर राजा नै शिमी तै कह्या, "तन्‍नै प्राणदण्ड न्ही मिलैगा।" अर राजा नै उसतै कसम भी खाई।

मपीबोशेत पै दाऊद की कृपादृष्टि

24 फेर शाऊल का पोत्ता मपीबोशेत राजा तै भेंट करण नै आया; उसनै राजा के चले जाणकै दिन तै उसके सही-सलामत फेर आण के दिन तक ना अपणे पैरां के नाखून काटे, अर ना अपणी दाढ़ी बणवाई, अर ना अपणे कपड़े धुवाए थे। 25 जिब यरुशलेमी राजा तै मिलण नै गए, फेर राजा नै उसतै पूछ्या, "हे मपीबोशेत, तू मेरे गैल क्यूँ न्ही गया था?" 26 उसनै कह्या, "हे मेरे प्रभु, हे राजा, मेरे कर्मचारी नै मेरे ताहीं धोक्खा दिया था; तेरा दास जो अपाहिज सै; ज्यांतै तेरे दास नै सोच्या, ‘मै गधे पै काठ्ठी कसवा कै उसपै चढ़ राजा के साथ चल्या जाऊँगा।’ 27 अर मेरे कर्मचारी नै मेरे प्रभु राजा के स्याम्ही मेरी चुगली करी सै। पर मेरा प्रभु राजा परमेसवर के दूत कै बराबर सै; अर जो कुछ तन्‍नै भावै वोए कर। 28 मेरे पिता का सारा घराना तेरी और तै प्राणदण्ड कै लायक था; पर तन्‍नै अपणे दास ताहीं अपणी मेज पै खाण आळयां म्ह गिण्या सै। मन्‍नै के हक सै कै मै राजा की दुहाई देऊँ?" 29 राजा नै उसतै कह्या, "तू अपणी बात की चर्चा क्यूँ करदा रहवै सै? मेरा हुकम या सै, के उस धरती नै तू अर सीबा दोन्‍नु आप्पस म्ह बाँट ल्यो।" 30 मपीबोशेत नै राजा तै कह्या, "मेरा माल्‍लिक राजा जो सही-सलामत अपणे घर आया सै, ज्यांतै सीबा ए सारा किमे ले ले।"

बर्जिल्‍लै पै दाऊद की कृपादृष्टि

31 फेर गिलादी बर्जिल्‍लै रोगलीम तै आया, अर राजा कै गैल यरदन नदी कै पार गया, कै उसनै यरदन पार पोहचावै। 32 बर्जिल्‍लै तो बुजुर्ग माणस था, यानिके अस्सी साल की उम्र का था जिब तक राजा महनैम नगर म्ह रह्या करदा जिब ताहीं वो उसका पालन-पोषण करदा रह्या; क्यूँके वो घणा साहूकार था। 33 फेर राजा नै बर्जिल्‍लै तै कह्या, "मेरे गैल पार चाल, अर मै तन्‍नै यरुशलेम म्ह अपणे धोरै राखकै तेरी सेवा-पाणी करुँगा।" 34 बर्जिल्‍लै नै राजा तै कह्या, "मन्‍नै कितणे दिन जिन्दा रहणा सै, के मै राजा के गैल यरुशलेम म्ह जाऊँ? 35 आज मै अस्सी साल का सूं; के मै भले-बुरे का पहचान कर सकूँ सूं? के तेरा दास जो कुछ खावै-पीवै सै उसका स्वाद पहचान सकै सै? के मन्‍नै गायकां या गायिकाओं का शब्द इब सुणै सै? तेरा दास इब अपणे स्वामी राजा खात्तर क्यूँ बोझ का कारण हो? 36 तेरा दास राजा कै गैल यरदन पार ए तक जावैगा। राजा इसका इसा बड़ा ईनाम मेरे ताहीं क्यूँ दे? 37 अपणे दास नै बोहड़ण दे, ताके मै अपणे आई नगर म्ह अपणे माँ-बाप के कब्रिस्तान कै धोरै मरुँ पर मेरा बेट्टा जो तेरा दास सै किम्हाम हाजिर सै; मेरे प्रभु राजा के गैल वो पार जावै; अर जिसा तन्‍नै भावै उस्से तरियां उसतै बरताव करिये।" 38 राजा नै कह्या, "हाँ, किम्हाम मेरे गैल पार चाल्‍लैगा, अर जिसा तन्‍नै भावै उसाए मै उसतै बरताव करुँगा बल्के जो कुछ तू मेरे तै चाहवैगा वो मै तेरे खात्तर करुँगा।" 39 फेर सारे माणस यरदन पार गए, अर राजा भी पार होया; फेर राजा नै बर्जिल्‍लै ताहीं चूमकै आशीर्वाद दिया, अर वो अपणी जगहां म्ह बोहड़ ग्या। 40 फेर राजा गिलगाल की और पार गया, अर उसकै गैल किम्हाम पार होया; अर सारे यहूदी माणसां नै अर आध्धे इस्राएली माणसां नै राजा ताहीं पार पोहचाया। 41 फेर सारे इस्राएली माणस राजा कै धोरै आए, अर राजा तै कहण लाग्गे, "के कारण सै के म्हारे यहूदी भाई तन्‍नै चोरी तै ले आए, अर परिवार समेत राजा नै अर उसके सारे माणसां नै भी यरदन पार ले आए सैं।" 42 सारे यहूदी माणसां नै इस्राएली माणसां ताहीं जवाब दिया, "कारण यो सै के राजा म्हारे गोत्र का सै। तो थम माणस इस बात तै क्यूँ रुठगे सो? के हमनै राजा का दिया होया किमे खाया सै? या उसनै म्हारे ताहीं कुछ दान दिया सै?" 43 इस्राएली माणसां नै यहूदी माणसां ताहीं जवाब दिया, "राजा म्ह दस भाग म्हारे सैं; अर दाऊद म्ह म्हारा भाग थारे भाग तै बड़ा सै। तो फेर थमनै म्हारे ताहीं क्यूँ तुच्छ जाण्या? के अपणे राजा कै बोहड़कै ले आण की चर्चा पैहले हमनै न्ही करी थी?" अर यहूदी माणसां नै इस्राएली माणसां तै घणी कड़ी बात कही।