2 Samuel 8

दाऊद की जीत

1 कुछ दिनां कै बाद दाऊद नै पलिश्तियाँ ताहीं जीत कै अपणे अधीन कर लिया, अर दाऊद नै पलिश्तियाँ की राजधानी*8:1 मेथेग-अम्माह का नगर की प्रभुता उनकै हाथ तै छीन ली।

2 फेर उसनै मोआबियाँ ताहीं भी जीत लिया, अर इन ताहीं धरती पै लिटाकै डोरी तै नाप्या; फेर दो डोरियाँ तै माणसां ताहीं नाप के घात करया, अर डोरी भर के माणसां ताहीं जिन्दा छोड़ दिया। फेर मोआबी दाऊद के अधीन होकै भेंट ले आण लाग्गे।

3 फेर जिब सोबा का राजा रहोब का बेट्टा हदादेजेर फरात कै धोरै अपणा राज्य फेर ज्यों का त्यों करण नै जाण लाग रहया था, तो दाऊद नै उस ताहीं जीत लिया। 4 अर दाऊद नै उसतै एक हजार सात सौ घोड़े पै सवार सिपाही, अर बीस हजार पैदल चालण आळे सैनिक छीन लिए; अर सारे रथ आळे घोड़यां के घुटन्या कै पाच्छै की नस कटवाई, पर एक सौ रथ कै खात्तर घोड़े बचाए राक्खे। 5 जिब दमिश्क के अरामी सोबा के राजा हदादेजेर की मदद करण नै आए, फेर दाऊद नै अरामियां म्ह तै बाईस हजार माणस मारे। 6 फेर दाऊद नै दमिश्क के अराम म्ह सिपाहियाँ की चौकियाँ बिठाई; इस तरियां अरामी दाऊद कै अधीन होकै भेंट ले आण लाग्गे। अर जित्त-जित्त दाऊद जाया करदा ओड़ै-ओड़ै यहोवा उसनै जयवन्त करया करदा। 7 हदादेजेर के कर्मचारियाँ कै धोरै सोन्‍ने की जो ढाल थी उननै दाऊद लेकै यरुशलेम म्ह आया। 8 अर बेतह अर बेरौताई नाम के हदादेजेर के नगरां तै दाऊद राजा भोत सा पीतळ ले आया।

9 जिब हमात के राजा तोई नै सुण्या के दाऊद नै हदादेजेर की सारी सेना ताहीं जीत लिया सै, 10 फिर तोई नै योराम नाम के अपणे बेट्टे ताहीं दाऊद राजा कै धोरै उसका हाल-चाल पूछण, अर उस ताहीं ज्यांतै बधाई देण नै भेज्या, के उसनै हदादेजेर तै लड़कै उस ताहीं जीत लिया था; क्यूँके हदादेजेर तोई तै लड़या करदा। अर योराम चाँदी, सोन्‍ने अर पीतळ के पात्र लिए होए आया। 11 इन ताहीं दाऊद राजा नै यहोवा कै खात्तर पवित्र करकै राख्या; अर उसे तरियां ए अपणी जित्ती होई सारी जात्तां के सोन्‍ने-चाँदी तै भी करया, 12 यानिके अरामियां, मोआबियाँ, अम्मोनियाँ, पलिश्तियाँ, अर अमालेकियाँ के सोन्‍ने-चाँदी ताहीं, अर रहोब के बेट्टे सोबा के राजा हदादेजेर की लूट ताहीं भी राख्या।

13 जिब दाऊद नमक की तराई म्ह अठारह हजार अरामियां नै मारकै बोहड़ आया, तो उसका बड़ा नाम होग्या। 14 फेर उसनै एदोम म्ह सिपाहियाँ की चौक्‍की बैठाई; पूरे एदोम म्ह उसनै सैनिकां की चौक्‍की बैठाई, अर सारे एदोमी दाऊद के अधीन होगे। अर दाऊद जित्त-जित्त जाया करदा ओड़ै-ओड़ै यहोवा उसनै जयवन्त करया करदा।

दाऊद के कर्मचारियाँ की नामावली

15 दाऊद तो सारे इस्राएल पै राज्य करया करदा, अर दाऊद अपणी सारी प्रजा कै गैल न्याय अर धार्मिकता के काम करया करदा। 16 प्रधान सेनापति सरूयाह का बेट्टा योआब था; इतिहास का लिखण आळा अहीलूद का बेट्टा यहोशापात था; 17 प्रधान याजक अहीतूब का बेट्टा सादोक अर एब्यातार का बेट्टा अहीमेलेक थे; मंत्री सरायाह था; 18 करेतियां अर पलेतियां का प्रधान यहोयादा का बेट्टा बनायाह था; अर दाऊद के बेट्टे भी मंत्री थे।