बांके गाणे 3

बेचैन करने वाल़ी रात

1 राती रे बखते आऊँ आपणे माँजे पाँदे उठी की आपणे प्रेमिये खे टोल़दी रई;

आऊँ तेसखे टोल़दी तो रई;

पर से तेती नि मिलेया;*3:1 यशायाह 3:1

2 मैं आपणे आपू ते बोलेया, "मां एबे उठी की शईरो रे,

ओर तिना रिया सड़का रे ओर चौको रे कूमी की आपणा प्रेमी टोल़ना।"

आऊँ तेसखे टोल़दी तो रई, पर से माखे नि मिलेया।

3 शईरो रे कूमदे-कुमदे शईरो रा पईरा देणे वाल़े माखे मिले,

तो मैं तिना ते पूछेया, "क्या तुसे मेरा प्रेमी देखी राखेया?"

4 माखे तिना ते आगे चलदे ऊए थोड़ी जी देर ऊई री थी

कि मेरा प्रेमी माखे मिलीगा।

मैं से पकड़ी ला; जदुए तक तेसखे आपणी माया रे कअरे जेती तेसे माखे जन्म दित्तेया था, लई नि आई, से जाणे नि दित्तेया।

5 ओ यरूशलेमो री जवाणसो, आऊँ तुसा खे बारासींगिया

ओर मैदानो री ईरणियां री कसम देई की बोलूँई

कि तुसे म्हारे प्यारो दे बाधा नि डाल़ो।

तीजा गाणा

वधू

6 ये कुण ए जो तुएँ रे खम्बे जेड़ा,

गन्धरस ओर लोबानो साथे खुशबूदार

ओर बपारिए रे सबी किस्मा रे खुशबूदार पाऊडरो रा लेप लगाई की

सुनसाण जगा ते निकल़ी की आऊणे लगी रा?

7 देखो, ये राजा सुलैमानो री पालकी ए!

तेसरे चऊँ कनारे इस्राएलो रे चूणे रे शूरवीरा बीचा ते साठ वीर तेस साथे-साथे चलणे लगी रे।

8 सेयो सारे के सारे तलवार चलाणे वाल़े ओर युद्ध बिद्या रे निपुण ए।

राती दे ऊणे वाल़े आक्रमणो ते निपटणे खे बी हर एक मर्द तलवारी साथे लड़ने खे हमेशा त्यार रओआ।

9 राजा सुलैमाने आपणियां तँईं लबानोन प्रदेशो रे देवदारो री लकड़िया री एक बड़ी पालकी बणवाई।

10 तिने पालकिया रे खम्बे चाँदिए रे,

तिजी रा सरयाणा सूईने रा ओर गद्दी बैंगणी रंगो रे टाल्लेया ते मढ़ी की बणवाई

ओर तिजी रा बीचला इस्सा

यरूशलेमो री बेटिया रे जरिए बड़े

प्यारो साथे सजाई राखी।

11 ओ सिय्योनो री जवाणसो, आपणे-आपणे कअरो ते बारे निकल़ी की सुलैमान राजे खे देखो,

देखो, तिने सेई मुकुट पईनी राखेया

जो तेसरिये माये तेसरे ब्याओ रे

दिने ओर तेसरे मनो री खुशिया रे दिने, तेसरे सिरो पाँदे राखेया था।