उत्पत्ति 33

याकूबो रा एसाव ते मिलणा

1 जेबे याकूब तेथा ते जाणे लगेया तो तिने आखी चकी की ये देखेया कि एसाव 400 मर्दा खे साथे लई की आऊणे लगी रा। तेबे तिने बच्चेया खे लग-लग बांडी की लिआ ओर राहेल ओर दुँईं दासिया गे सम्बाल़ीते। 2 ओर तिने सबी ते आगे पाऊआ समेत दासिया खे, तिजी ते पीछे पाऊआ समेत लिआ खे ओर सबी ते पीछे राहेल ओर यूसुफ राखे, 3 ओर से आपू तिना सबी ते आगे गया ओर सात बार जमीना पाँदे चूकी की माथा टेकदा ऊआ आपणे पाईए गे पऊँचेया।

4 पर एसाव तेस साथे मिलणे खे दौड़ेया ओर तेसखे दिलो साथे लगाई की, तेसरे गल़े लगेया; फेर सेयो दोनो जणे रोणे लगे। 5 तेबे एसावे आखी चकी की जवाणसा खे ओर बच्चेया खे देखेया ओर पूछेया, "ये जो तां साथे ए, ये कुण ए?" तो याकूबे बोलेया, "ये तेरे दासो रे पाऊ ए, जो परमेशरे दया करी की माखे देई राखे।"

6 तेबे पाऊआ समेत दासिये नेड़े आई की माथा तेकेया। 7 फेर पाऊआ समेत लिआ नेड़े आई ओर तिने बी माथा तेकेया; आखरी रे यूसुफ ओर राहेले बी नेड़े आई की माथा तेकेया।

8 तेबे एसावे पूछेया, "तेरा ये डांगरा रा बड़ा चूण्ड जो माखे बाटा रे मिलेया इजी रा क्या मतलब ए?" तो याकूबे बोलेया, "ये कि मेरे यहोवे री दया-दृष्टि मां पाँदे ओ।"

9 पर एसावे बोलेया, "ओ मेरे पाई, मांगे तो बऊत ए; जो कुछ तेरा ए तिजी खे आपू गेई राख।"

10 याकूबे बोलेया, "ना, ना, जे तेरी दया मां पाँदे ओ, तो मेरी पेंट ग्रहण कर; कऊँकि तैं दया करी की इतणिया खुशिया साथे जो आऊँ अपनाया येई माखे बऊत ए, इजी खे माखे ताखे देखणा तो परमेशरो खे देखणे जेड़ा ए। 11 मईरबानी करी की जो पेंट तांगे पेजी राखी, एसा लओ; कऊँकि परमेशरे मां पाँदे दया करी की माखे आशीष देई राखी ओर मांगे बऊत ए।" जेबे तिने एसावो ते बऊत बिनती कित्ती, तेबे तिने से पेंट लई ली।

12 फेर एसावे बोलेया, "आओ, आसे आगे बाटा रिये चलूँए ओर आँऊ तां साथे चलूँआ।"

13 पर याकूबे तेसखे बोलेया, "ओ मेरे मालक, तूँ तो जाणेया कि मां साथे छोटे-छोटे बच्चे ए, जिना रा माखे ख्याल राखणा पड़ना ओर दूद देणे वाल़िया पेडा-बाकरिया ओर गायी आ; जे एड़े डांगर एकी दिनो ते जादा चलाईते तो, सारे ई मरी जाणे। 14 इजी खे मेरा यहोवा आपणे दासो ते आगे चली जाओ, आऊँ इना डांगरा री चाला रे मुताबिक, जो मांते आगे ए ओर बाल-बच्चेया री चाला रे मुताबिक आऊल़े-आऊल़े चली की सेईरो प्रदेशो रे आपणे यहोवे गे पऊँची जाऊँगा।"

15 तेबे एसावे बोलेया, "तो आऊँ आपू साथलेया बीचा ते कई जणेया खे तांगे छाडी जाऊँआ।" पर याकूबे बोलेया, "से कऊँ? मेरे यहोवा इतणा ई बऊत ए कि मेरे यहोवे री दया मां पाँदे बणी री रओ।" 16 तेबे एसाव तेसी दिने सेईर शईरो खे चली पड़ेया। 17 पर याकूब तेथा ते निकल़ी की सुक्कोत*33:17 सुक्कोत सुक्कोत मतलब शरणस्थान शईरो खे गया ओर तेती तिने आपू खे ओर आपणे परिवार वाल़ेया खे एक कअर ओर डांगरा खे चूँगड़िया बणाईया। इजी बजअ ते तेसा जगा रा नाओं सुक्कोत पड़ेया, सुक्कोतो रा मतलब ए चूँगड़िया।

याकूबो रा कनानो खे आऊणा

18 ओर याकूब जो पद्दनरामो ते आया था, तिने कनान प्रदेशो रे शकेम शईरो रे नेड़े सई-सलामत पऊँची की शईरो रे सामणे डेरे खड़े कित्ते। 19 ओर याकूबे 100 चाँदिए रे सिक्केया ते शकेमो रे बाओ हमोरो रे पाऊआ रे आथो ते जमीना रा कुछ इस्सा मोले लई की तिदे आपणा तम्बू खड़ा कित्तेया।*33:19 यूह. 4:5, प्रेरित 7:16 20 फेर तिने तेती एक बेदी बणाई की तिजी रा नाओं एल-एलोहे-इस्राएल*33:20 परमेशर इस्राएलो रा परमेशर ए राखेया, जेतेरा मतलब ए "परमेशर इस्राएलो रा परमेशर ए।"