1 तेबे यूसुफ तिना सबी सामणे, जो तेसरे नेड़े-तेड़े खड़ी रे थे, तेसरे रोणे ई वाल़ा था ओर आका पाई की आपणे दासा खे बोलेया, "मेरे नेड़े-तेड़े रे सबी लोका खे बारे करी देओ।" पाईया रे सामणे आपू खे प्रकट करने रे बखते यूसुफो साथे ओर कोई नि था। 2 तेबे से चींगी-चींगी की रोणे लगेया ओर मिस्रिए सुणेया ओर फिरौनो रे कअरो रे लोका खे बी इजी रा समाचार मिलीगा।

3 तेबे यूसुफ आपणे पाईया खे बोलणे लगेया, "आँऊ यूसुफ ए, क्या मेरा बाओ एबुए तक जिऊँदा ए?" इजी रा जबाब तेसरे पाई नि देई सके; कऊँकि सेयो तेस सामणे कबराई गे थे। 4 फेर यूसुफे आपणे पाईया खे बोलेया, "मईरबानी करी की मेरे नेड़े आओ।" ये सुणी की सेयो नेड़े आए। फेर तिने बोलेया, "आँऊ तुसा रा पाई यूसुफ ए, जो तुसे मिस्रिया रे आथो रे बेचीता था।* 5 एबे तुसे दु:खी नि ओ ओर तुसे जो आऊँ एती बेचीता, इजी ते उदास नि ओ; कऊँकि परमेशरे आऊँ तुसा रे प्राण बचाणे खे आगे पेजीता रा।* 6 कऊँकि एबे दो साला ते एते प्रदेशो रे अकाल़ ए ओर एबे पाँज साल ओर एड़े ई रणे कि तिना रे ना तो अल़ चलणा ओर ना ई फसल बाडी जाणी।* 7 तेबेई परमेशरे आऊँ तुसा ते आगे पेजेया था कि तुसे तरतिया पाँदे जिऊँदे रओ ओर तुसा रे प्राण बचणे ते तुसा रा वंश बढ़ो। 8 इजी खे एबे माखे एती पेजणे वाल़े तुसे नि परमेशर ई ठईरेया ओर तिने ई माखे फिरौनो रा बाओ जा ओर तेसरे सारे मईलो रा मालक ओर सारे मिस्र प्रदेशो रे लोका रा अधिकारी ठराईता रा। 9 इजी खे फटाफट मेरे बाओ गे जाई की बोलो, ‘तेरा पाऊ यूसुफ ईंयाँ बोलोआ कि परमेशरे आऊँ सारे मिस्र प्रदेशो रा मालक ठराई राखेया; इजी री खातर तूँ मांगे बिना देर कित्ते आईजा।* 10 ओर तेरे रणे री जगा गोशेन प्रदेशो रे ऊणी ओर तूँ पाऊआ, पोतेया, पेडा-बाकरिया ओर आपणा सब कुछ लई की मां नेड़े रणा। 11 ओर अकाल़ो रे जो पाँज साल ओर ऊणे, तिना रे मां तेरा पालण-पोषण तेथी करना; एड़ा नि ओ कि तूँ, ओर तेरा कराना बल्कि जितणे तेरे ए, सेयो सब पूखे मरी जाओ।’* 12 एबे देखो तुसे आपणी आखी ते देखोए ओर मेरा पाई बिन्यामीन बी आपणी आखी ते देखोआ कि जो आसा साथे गल्ला करने लगी रा से यूसुफ ए। 13 तुसे मेरे वैभवो रा, जो मिस्रो रे ए ओर जो कुछ तुसे देखी राखेया, से सब मेरे बाओ गे बताणा ओर तेबुई मेरा बाओ एती ली आऊणा।" 14 तेबे यूसुफ आपणे पाई बिन्यामीनो रे गल़े लगी की रोया ओर बिन्यामीन बी तेसरे गल़े लगी की रोया। 15 यूसुफ आपणे सबी पाईया रे गल़े लगी की रोया ओर इजी ते बाद तेसरे पाई तेस साथे गल्ला करने लगे। 16 एते गल्ला रा समाचार कि यूसुफो रे पाई आई रे, फिरौनो रे मईलो तक पऊँची गा ओर इजी ते फिरौन ओर तेसरे काम करने वाले़ खुश ऊईगे।* 17 तेबे फिरौने यूसुफो खे बोलेया, "आपणे पाईया खे बोल कि एक काम करो आपणे डांगरा पाँदे नज्ज लादी की कनान प्रदेशो खे चली जाओ। 18 ओर आपणे बाओ ओर आपणे-आपणे कअरो रे लोका खे लई की मांगे आई जाओ ओर मिस्र प्रदेशो रे जो कुछ अच्छे ते अच्छी जगा ए, से मां तुसा खे देणी ओर तुसा खे प्रदेशो रे खरिया ते खरिया चीजा खाणे खे मिलणिया।* 19 ओर फिरौने यूसुफो खे बोलेया कि आपणे पाईया खे आज्ञा दे, ‘तुसे एक काम करो कि मिस्र प्रदेशो ते आपणे बाल-बच्चेया खे ओर जवाणसा खे गडिया लई जाओ ओर आपणे बाओ खे ली आओ।* 20 ओर आपणी चीजा री चिन्ता नि करना; कऊँकि सारे मिस्र प्रदेशो रे जो कुछ अच्छे ते अच्छा ए से तुसा रा ईए।’ " 21 इस्राएलो रे माठेया तेड़ा ई कित्तेया ओर यूसुफे फिरौनो री आज्ञा मानी कि तिना खे गडिया दित्तिया ओर बाटा खे खाणे रिया चीजा बी दित्तिया। 22 तिना बीचा ते एकी-एकी जणे खे तो यूसुफे एक-एक जोड़ी टाल्लेया री बी दित्ती ओर बिन्यामीनो खे तीन सौ चाँदिए रे टुकड़े ओर पाँज जोड़िया टाल्लेया रिया दित्तिया। 23 आपणे बाओ गे जो तिने पेजेया से ये ए, मतलब मिस्रो री खरिया-खरिया चीजा ते लदे रे दस गह्दे, नज्ज ओर रोटी ओर तेसरे बाओ खे बाटा खे खाणे रिया चीजा ते लदी रिया दस गह्दिया। 24 तेबे यूसुफे आपणे पाई बिदा कित्ते ओर सेयो चलीगे; ओर तिने आपणे पाईया खे बोलेया, "बाटा रे केथी लड़ाई नि करेयो।"

25 मिस्र प्रदेशो ते चली की सेयो कनान प्रदेशो रे आपणे बाओ याकूबो गे पऊँचे। 26 ओर तेसगे ये बताया, "यूसुफ एबुए तक जिऊँदा ए ओर सारे मिस्र प्रदेशो रे लोका पाँदे राज सेई करोआ।" ये सुणी की याकूबो खे हैरानी ऊईगी पर तिने तिना रा विश्वास नि कित्तेया। 27 तेबे तिने आपणे बाओ याकूबो गे यूसुफो रिया सारिया गल्ला बताईया, जो तिने तिना गे बोलिया थिया; जेबे तिने सेयो गडिया देखिया, जो यूसुफे तेसखे ल्याऊणे खे पेजी राखिया थिया, तेबे तेसखे ईम्मत आईगी।

28 ओर इस्राएले बोलेया, "बस, माखे ये बऊत ए कि, मेरा पाऊ यूसुफ एबुए तक जिऊँदा ए; मां आपणे मरने ते पईले जाई की से देखणा।"