1 कुछ दिना ते बाद एड़ा ऊआ कि तेस प्रदेशो दे अकाल़ पड़ेया, ये तेस पईले अकाल़ो ते लग था जो अब्राहमो रे दिना रे पड़ेया था। इजी बजअ ते इसहाक पलिश्ती लोका रे राजा अबीमेलेको गे गरार शईरो खे गया।

2 तेती यहोवे इसहाको खे दर्शण देई की बोलेया, "तूँ मिस्र प्रदेशो रे नि जा, पर जो देश मां ताखे बताणा, तेसी प्रदेशो रे रओ। 3 तूँ एस ई प्रदेशो रे रओ ओर मां तां साथे रणा ओर मां ताखे आशीष देणी कऊँकि ये देश मां ताखे ओर तेरे वंशो खे देणा ओर जो कसम मैं तेरे बाओ अब्राहमो ते खाई थी, से मां पूरी करनी। 4 ओर मां तेरा वंश सर्गो रे तारेया जेड़ा करना ओर मां तेरे वंशो खे ये सारा प्रदेश देणा ओर तरतिया रे सारे देश तेरे वंशो री बजअ ते तन्य ऊणे।* 5 कऊँकि अब्राहमे मेरी गल्ल मानी ओर तिने मेरी आज्ञा, बिदिया ओर व्यवस्था रा पालण कित्तेया, जो मैं तेसगे समाल़ी थिया।"

6 इजी खे इसहाके यहोवे री गल्ल मानी ओर गरार शईरो रेई रईगा।

7 जेबे तेथो रे लोके तेसरी लाड़िया रे बारे दे पूछेया तेबे तिने ये सोचेया था कि जे आऊँ तेसा खे आपणी लाड़ी बोलूँ तो एथो रे लोका रिबका रिया बजअ ते, जो बऊत ई बांकी ए, आँऊ काई देणा, ईंयाँ डरो रे मारे सोची की तिने उतर दित्तेया कि ये मेरी बईण ए। 8 जेबे इसहाको खे तेती रंदे ऊए बऊत बखत ऊईगा, तेबे एक दिन पलिश्तिया रे राजे अबीमेलेके द्धारिया बीचा ते चांकी की देखेया कि इसहाक आपणी लाड़ी रिबका साथे प्यार करने लगी रा।

9 तेबे अबीमेलेके इसहाको खे बुलाई की बोलेया, "से तो जरूर तेरी लाड़ी ए! फेर तैं तेसा खे आपणी बईण कऊँ बोलेया?" इसहाके जबाब दित्तेया, "मैं सोचेया था कि एड़ा नि ओ कि तेसा रिया बजअ ते मेरी मौत ओ।"

10 तेबे अबीमेलेके बोलेया, "तैं आसा साथे ये क्या कित्तेया? ईंयाँ तो मेरी प्रजा बीचा ते कोई बी तेरी लाड़िया साथे सानिया ते गल़त काम करी सकोआ ओर तां आसे एते पापो रे फसाणे थे।" 11 एड़ा बोलणे ते बाद अबीमेलेके आपणी सारी प्रजा खे चेतावणी दित्ती कि जो कोई एस मर्दो खे ओर एसा जवाणसा खे छूँओगा तो से पक्का काया जाणा।

12 फेर इसहाके तेस प्रदेशो रे ताअन, कणक बीजे ओर तेस सालो रेई सौ गुणा फल़ पाया कऊँकि यहोवे तेसखे आशीष दित्ती। 13 ओर से बऊत अमीर ऊईगा ओर तेसरी तरक्की ऊँदी गई, एथो तक कि से एक अमीर माणूं ऊईगा। 14 जेबे इसहाको गे पेडा-बाकरिया, गाय-बल़द ओर बऊत सारे दास-दासिया ऊईगे तेबे पलिश्ती तेसते जल़ने लगे।

15 जितणे कुएँ तेसरे बाओ अब्राहमो रे दासे अब्राहमो रे जिऊँदे जिऊए खणे थे, सेयो सब पलिश्ती लोके माट्टिया साथे परी ते।

16 तेबे अबीमेलेक इसहाको खे बोलणे लगेया, "आसा गे ते चली जा; कऊँकि तूँ आसा ते जादा सामर्थी ऊईगा रा।"

17 तेबे इसहाक आपणे परिवारो साथे तेथा ते आगे चलीगा ओर गरारो री काट्टिया रे तम्बू खड़ा करी की तेती रणे लगेया। 18 तेबे जो कुएँ तेसरे बाओ अब्राहमो रे दिना रे खणे थे ओर अब्राहमो रे मरने ते बाद पलिश्तिए माट्टिया साथे परी ते थे, सेयो इसहाके फेर खणाए ओर तिना रे सेयो ई नाओं राखे जो तेसरे बाओ राखे थे। 19 फेर इसहाको रे दासा खे काट्टिया रे खणदे-खणदे ताजा पाणिए रा एक कुआँ मिलेया।

20 पर गरारो रे ग्वाल़ेया इसहाको रे ग्वाल़ेया साथे चगड़ा कित्तेया ओर बोलेया, "ये पाणी म्हारा ए।" इजी री खातर तिने तेस कुएँ रा नाओं एसेक* राखेया, कऊँकि सेयो तेसते चगड़े थे। 21 फेर तिने एक ओर कुआँ खणेया पर तिने तिजी रिया तँईं बी चगड़ा कित्तेया, इजी री खातर तिने तिजी रा नाओं सित्रा* राखेया। 22 तेबे तिने तेथा ते आगे चली की एक ओर कुआँ खणाया ओर तिजी रिया तँईं तिने चगड़ा नि कित्तेया, इजी खे तिने तिजी रा नाओं ये बोली की रहोबोत* राखेया, "एबे तो यहोवे आसा रिया तँईं बऊत जगा देई राखी ओर आसा एते प्रदेशो रे फूलणा-फल़णा।"

23 तेथा ते इसहाक बेर्शेबा खे गया।

24 तेसी ई दिने यहोवे राथिए खे तेसखे दर्शण देई की बोलेया, "आँऊ तेरे बाओ अब्राहमो रा परमेशर ए; तूँ डर नि, कऊँकि आऊँ तां साथे ए। मां आपणे दास अब्राहमो रिया बजअ ते ताखे आशीष देणी ओर तेरा वंश बढ़ाणा।" 25 तेबे इसहाके तेती एक बेदी बणाई ओर यहोवे रे नाओं री आराधना कित्ती ओर आपणा तम्बू तेथी खड़ा कित्तेया ओर तेती इसहाको रे दासे एक कुआँ खणेया।

26 तेबे अबीमेलेक आपणे सलाहकार अहुज्जत ओर आपणे सेनापति पीकोलो खे साथे लई की गरार शईरो ते इसहाको गे आया।

27 इसहाके तिना खे बोलेया, "एबे मांगे कऊँ आई रे? तुसे तो मां साथे दुश्मणी करी की आपू बीचा ते आऊँ निकयाल़ी ता था।"

28 तेबे तिने बोलेया, "आसे तो सामणे देखी राखेया कि यहोवा तां साथे रओआ; इजी खे आसे सोचेया कि आसा ओर तां बीचे कसम खाई जाओ ओर आसे तांते इजी रे बारे दे वाचा बनाईए; 29 कि जिंयाँ आसे ताखे नुकशाण नि पऊँचाया पर तां साथे सिर्फ पलाई ई कित्ती ओर तूँ ठीक-ठाक बिदा कित्तेया ओर एबे परमेशरो री तरफा ते तूँ आशीषित ए।"

30 तेबे इसहाके तिना खे भोज दित्तेया ओर तिने सबी खाया-पिया। 31 तिने सबी तड़के उठी की आपू बीचे कसम खाई; तेबे इसहाके सेयो बिदा कित्ते ओर सेयो ठीक-ठाक तेसगे ते चलीगे।

32 तेसी ई दिने अबीमेलेको रे जाणे ते बाद इसहाको रे दासे आई की तेस खणे रे कुएँ री गल्ल सुणाई ओर बोलेया, "आसा खे ताजे पाणिए रा एक कुआँ मिली रा।" 33 तेबे तिने तिजी रा नाओं शिबा* राखेया; इजी बजअ ते तेस शईरो रा नाओं आजो तक बेर्शेबा ए।

34 जेबे एसाव चाल़िया साला रा ऊआ, तेबे तिने हित्ती लोका बीचा ते बेरिये री बेटी यहूदीत ओर हित्ती एलोनो री बेटी बासमता साथे ब्या करी ला। 35 पर इना दुँईं बऊआ रिया बजअ ते इसहाक ओर रिबका रे मनो खे बऊत दुख ऊआ।