उत्पत्ति 8

जल-प्रलय रा अन्त

1 तेबे परमेशरे नूह ओर जितणे बणो रे डांगर ओर करेलू डांगर तेस साथे जाह्जो रे गये थे, तिना सबी री सम्माल़ लई ओर परमेशरे तरतिया पाँदे अवा चलाई जेते की पाणी कटणे लगेया। 2 तेबे तरतिया रिया गईरिया सूबल़ा ओर सर्गो रे चरोखे बंद ऊईगे ओर बर्खा रूकी गी। 3 ओर पाणी तरतिया पाँदा ते लगातार कटदा गया ओर 150 दिना ते बाद पाणी तरतिया पाँदे कटी गा। 4 सातुए मीन्ने रे सतारूए दिने जाह्ज अरारातो रिया पाह्ड़िया पाँदे रूकी गा। 5 पाणी दसुए मीन्ने तक लगातार कटदा गया ओर दसुए मीन्ने रे पईले दिने पाह्ड़ो रिया चूँडिया दिशणे लगिया।

6 फेर एड़ा ऊआ कि चाल़िया दिना ते बाद नूहे आपणे बणाए रे जाह्जो री द्धारी खोली। 7 ओर एक काओ उड़ाईता जदुओ तक पाणी तरतिया पाँदा ते नि सूकीगा, तदुओ तक काओ ओरे-पोरे उड़दा रया। 8 फेर तिने आपू गे ते एक कबूतरी उड़ाईती कि देखूँए कि पाणी तरतिया पाँदा ते कटेया कि नई। 9 पर तेसा कबूतरिया खे आपणे पैर राखणे खे कोई जगा नि मिली तो से नूओ गे जाह्जो रे वापस आईगी, कऊँकि सारी तरतिया पाँदे पाणी ई पाणी था। तेबे नूए आथ आगे करी की से पकड़ी ली ओर आपू गे जाह्जो रे लई ली। 10 नूए सात दिन ओर रूकी की सेई कबूतरी जाह्जो ते फेर उड़ाईती, 11 जेबे कबूतरी साँजके बखते तेसगे आईगी ओर तिने देखेया कि तेसा री चूंजा रे जैतूनो रा एक नवां पत्ता ए। इजी ते नूहे जाणी ला कि पाणी तरतिया पाँदा ते कटी गा रा। 12 फेर तिने सात दिन ओर रूकी की सेई कबूतरी उडाई ओर से तेसगे फेर कदी वापस नि आई।

13 फेर एड़ा ऊआ कि नूओ री उम्रा रे 601 वें सालो रे पईले मीन्ने रे पईले दिने पाणी तरतिया पाँदा ते सूकीगा। तेबे नूहे जाह्जो री छत खोली की देखेया कि तरती सूकी गी री। 14 ओर दूजे मीन्ने रे सताईये दिनो तक तरती पूरी तरअ ते सूकी गी।

परमेशरो री वाचा

15 तेबे परमेशरे नूओ खे बोलेया, 16 "तूँ आपणी लाड़ी, पाऊआ ओर बऊआ समेत जाह्जो ते बारे निकल़ी की आओ। 17 तिंयाँ ई क्या पंछी, क्या पशु, सबी किस्मा रे लूरने वाल़े जन्तु, जो तरतिया पाँदे लूरोए, ओर जितणे जीव-जन्तु शरीरो रे तां साथे ए, तिना सबी खे आपू साथे निकयाल़ी की ली आओ ताकि तरतिया पाँदे तिना रे जरीये बऊत सारे बच्चे पैदा ओ ओर सेयो फल़़ो-फूलो ओर तरतिया पाँदे फैली जाओ।" 18 तेबे नूह ओर तेसरे पाऊ ओर लाड़ी ओर बऊआ जाह्जो ते बारे निकल़ी की आईगे।*8:18 2 पत 2:5 19 ओर तिना साथे सारे जानवर, लूरने वाल़े जन्तु ओर पंछी ओर जितणे जीव-जन्तु तरतिया पाँदे चलो-फिरोए, सेयो सारे आपणी-आपणी जातिया रे मुताबिक जाह्जो ते निकल़ी की आईगे।

नूह रे जरीये होमबलि चढ़ाणा

20 तेबे नूहे यहोवे खे एक बेदी बणाई ओर सारे शुद्ध डांगर ओर शुद्ध पंछिया बीचा ते कुछ-कुछ लई की बेदिया पाँदे होमबलि चढ़ाई। 21 तेबे परमेशरे सुखदायक खुशबू पायी की सोचेया कि माणूंआ री बजअ ते मां फेर कदी जमीना खे स्राप नि देणा, कऊँकि माणूंआ रे मनो दे बचपनो ते जो कुछ पैदा ओआ, बुरा ई ओआ, तेबे बी जेड़े मैं सारे जिऊँदे प्राणी एबे काई राखे, तिना खे फेर कदी नि काऊँगा। 22 यबुओ ते जदुओ तक तरती बणी री रओगी, तदुए तक बाणे ओर बाडणे रा बखत ओर ईऊँद ओर तऊँदी, गर्मी ओर सेल़ा, दिन ओर रात, ऊँदे जाणे।