याकूबो खे लाबानो गे पेजणा
1 तेबे इसहाके याकूबो खे बुलाई की आशीर्वाद दित्तेया ओर आज्ञा दित्ती, "तूँ केसी कनानी बेटिया साथे ब्या नि करना। 2 तिजी रे बदले पद्दनरामो रे आपणे नाने बतूएलो रे कअरे जाई की तेती आपणे मामे लाबानो री बेटिया साथे ब्या करी लया। 3 सर्वशक्तिमान परमेशर ताखे आशीष देओ ओर फल़वंत करी की बढ़ाओ ओर तूँ राज्य-राज्य री मण्डल़िया रा मुखिया ओ। 4 से ताखे ओर तेरे वंशो खे बी अब्राहमो जेड़ी आशीष देओ कि तूँ एस प्रदेशो रा जिदे तूँ परदेशी ऊई की रओआ ओर जो परमेशरे अब्राहमो खे दित्तेया था, तिजी रा अक्कदार ऊई जाओ।" 5 फेर इसहाके याकूब बिदा कित्तेया ओर से पद्दनरामो खे अरामी जातिया रे माणूं बतूएलो रे तेस पाऊए लाबानो गे चलेया जो याकूब ओर एसावो री आम्मा रिबका रा पाई था।
एसावो रा इश्माएलो री बेटी महलता साथे ब्या
6 जेबे एसावो खे पता लगेया कि इसहाके याकूब आशीर्वाद देई की पद्दनरामो खे पेजीता कि से तेथा तेई लाड़ी ब्याई की ल्याओ ओर तेसखे आशीर्वाद देंदे बखते ये आज्ञा बी दित्ती, "तैं केसी कनानी बेटिया साथे ब्या नि करना," 7 ओर याकूब आपणे माया-बाओ री गल्ल मानी की पद्दनरामो खे चलीगा। 8 तेबे एसावे ये सब देखी की ओर ये बी सोची की कि कनानी बेटिया मेरे बाओ इसहाको खे कितणी बुरिया लगोईया, 9 इजी खे से अब्राहमो रे पाऊ इश्माएलो गे गया ओर इश्माएलो री बेटी महलत, जो नबायोतो री बईण थी, ब्याई की आपणी लाड़ी बणाई।
बेतेलो रे याकूबो रा सुफना
10 याकूब बेर्शेबा शईरो ते निकल़ी की हारान प्रदेशो री तरफा खे चलेया। 11 ओर तिने केसी जगा रे पऊँची की रात तेथी कटी कऊँकि सूरज डूबी गा था, इजी खे तिने तेसा जगा रे पात्थरा बीचा ते एक पात्थर लया ओर आपणा सरयाणा बणाईता ओर तेथी सईगा। 12 तेबे तिने सुफने रे देखेया कि एक संगा तरतिया पाँदे खड़ी रा ओर तिजी रा सिरा स्वर्गो तक पऊँची रा ओर परमेशरो रे दूत तेते पाँदा ते चढ़ोए ओर उतरो ए। 13 ओर यहोवा तिजी पाँदे खड़ा ऊई की बोलोआ, "आँऊ यहोवा, तेरे दादे अब्राहमो रा परमेशर ओर इसहाको रा बी परमेशर ए; जेते जमीना पाँदे तूँ लेटी रा, से मां ताखे ओर तेरे वंशो खे देणी। 14 तेरा वंश जमीना री तूड़ा री कणिंया जेड़ा बऊत ऊणा ओर पूर्व, पच्छम, उतर ओर दक्खणा रे चऊँ कनारे फैलदा जाणा ओर तेरे ओर तेरे वंशो रे जरीये तरतिया रे सारे कुला आशीष पाणी। 15 ओर देख, आँऊ तां साथे रणा ओर जेती केथी तूँ जाणा, तेती मां तूँ सम्बाल़ी की राखणा ओर तूँ एते प्रदेशो रे वापस ली आऊणा। आऊँ जदुओ तक, जो मैं बोली राखेया, पूरा नि करी लऊँगा, तदुओ तक ताखे नि छाड़ूंगा।"28:15 यशायाह 41:10
16 तेबे याकूब नींजा ते जागी की उठेया ओर बोलणे लगेया, "पक्का एते जगा दे यहोवा ए; ओर आऊँ एसा गल्ला खे नि जाणूं था।" 17 ओर डरो रे मारे तिने बोलेया, "ये जगा कितणी डराऊणी ए! ये तो परमेशरो रे भवनो खे छाडी की ओर कुछ नि ऊई सकदी; बल्कि ये तो स्वर्गो रा फाटक ई ऊणा।" 18 प्यागा तड़के ई याकूब उठेया ओर आपणे सरयाणे रा पात्थर लई की तिजी रा खम्बा जेड़ा खड़ा करिता ओर तिजी रे सिरे पाँदे तेल लटी ता। 19 ओर तिने तेसा जगा रा नाओं बेतेल28:19 बेतेल बेतेलो रा मतलब ए परमेशरो रा कअर राखेया; पर तेस शईरो रा नाओं पईले लूज था। कऊँकि बेतेलो रा मतलब ए परमेशरो रा कअर। 20 याकूबे ये मान्नत मांगी, "जे परमेशर मां साथे रई की एसा यात्रा दे मेरी रक्षा करो ओर माखे खाणे खे रोटी ओर पईनणे खे टाल्ले देओ, 21 ओर आऊँ आपणे बाओ रे कअरे सई-सलामत वापस आई जाऊँ; तो यहोवा मेरा परमेशर ठईरना। 22 ओर ये पात्थर जेतेरा मैं खम्बा खड़ा करी राखेया, ये परमेशरो रा भवन ठईरना ओर जो कुछ तूँ माखे देओगा, तिजी रा दसुआ इस्सा पक्का मां ताखे देया करना।"