उत्पत्ति 42

याकूबो रा आपणे पाऊआ खे मिस्रो खे पेजणा

1 जेबे याकूबे सुणेया कि मिस्रो रे नज्ज ए, तिने आपणे पाऊआ खे बोलेया, "तुसे एकी-दूजे रा मूँ कऊँ लगी रे देखणे।" 2 फेर तिने बोलेया, "मैं सुणी राखेया कि मिस्र प्रदेशो रे नज्ज ए, इजी री खातर तुसे तेती जाई की आसा खे नज्ज मोले ली आओ, जेते की आसे मरूँ नि, बल्कि जिऊँदे रईये।"*42:2 प्रेरित 7:12 3 तेबे यूसुफो रे दस पाई नज्ज मोले लणे खे मिस्रो खे गये। 4 पर यूसुफो रा पाई बिन्यामीन, याकूबे ये सोची की पाईया साथे नि पेजेया कि केथी एड़ा नि ओ कि तेस पाँदे कोई मुसीबत आई जाओ। 5 ईंयाँ जो लोक नज्ज मोले लणे गए तिना साथे इस्राएलो रे पाऊ बी गए, कऊँकि कनान प्रदेशो रे बी बऊत अकाल़ था।*42:5 प्रेरित 7:11 6 यूसुफ तो मिस्र प्रदेशो रा अधिकारी था ओर तेस प्रदेशो रे सबी लोका रे आथे सेई नज्ज बेचो था; तेबे जेबे यूसुफो रे पाई आए, तेबे जमीना पाँदे मुंए रे पारे चूकी की माथा तेकेया।

7 तिना खे देखी की यूसुफे सेयो पछयाणी तो लये, फेर बी तिना सामणे अणजाण बणी की तिना ते कड़ंग ऊई की पूछेया, "तुसे केथा ते आई रे?" तिने बोलेया, "आसे तो कनान प्रदेशो ते नज्ज खरीदणे आई रे।" 8 यूसुफे तो आपणे पाई पछयाणी ले, पर तिने से नि पछयाणा।

9 तेबे यूसुफ आपणे तिना सुफनेया खे याद करी की जो तिने तिना रे बारे दे देखे थे, तिना खे बोलणे लगेया, "तुसे पेतिए ए, एस प्रदेशो री बुरी दशा देखणे आई रे।"

10 तिने तेसखे बोलेया, "ना, ना, ओ यहोवा, तेरे दास खाणे रिया चीजा खरीदणे आई रे। 11 आसे सब एक ई बाओ रे पाऊ ए, आसे सीदे माणूं ए, तेरे दास पेतिए निए।"

12 यूसुफे आपणे पाईया खे बोलेया, "ना, ना, तुसे एस प्रदेशो री कमजोरिया खे पकड़ने आई रे।"

13 तिने बोलेया, "आसे तेरे दास बारा पाई ए ओर कनान प्रदेशो रे रणे वाल़े एक ई मर्दो रे पाऊ ए ओर छोटा एस बखते म्हारे बाओ गे ए ओर एक अया ई नि।"

14 तेबे यूसुफे तिना खे बोलेया, "मैं तो तुसा खे बोली ता रा कि तुसे पेतिए ए; 15 तुसे ईंयाँ ई परखे जाणे, फिरौनो री जिन्दगिया री कसम, जदुओ तक तुसा रा छोटा पाई एती नि आई जाओ तदुओ तक तुसे एथा ते निकल़ी नि सकदे। 16 इजी खे आपू बीचा ते एकी खे चूणी की पेजी देओ कि से तुसा रे पाईए खे ली आओ ओर तुसे बंदी ऊई की रणे; ईंयाँ ई तुसा रिया गल्ला परखिया जाणिया कि तुसा रे सच्चाई ए कि नई। जे तुसे सच्चे नि निकल़े, तो फिरौनो री जिन्दगिया री कसम तुसे पक्का पेतिए समजे जाणे।" 17 तेबे तिने सेयो तीन दिन तक जेला दे राखे। 18 तीजे दिने यूसुफे तिना खे बोलेया, "एक काम करो तेबे जिऊँदे रणे; कऊँकि आऊँ परमेशरो रा डर मानूँआ। 19 जे तुसे सच्चे माणूं ए, तो तुसा बीचा ते एक जणा एती जेला रे बंदुआ रओ; ओर बाकि आपणे कअरो वाल़ेया री पूख खत्म करने खे नज्ज लई जाओ। 20 ओर आपणे छोटे पाईए खे मांगे ली आओ; ईंयाँ तुसा रिया गल्ला सच्चिया ठईरनियां ओर तुसे काये नि जाणे।" तेबे तिने तेड़ा ई कित्तेया।

21 तिने आपू बीचे बोलेया, "इदे कोई शक निए कि आसे आपणे पाईए रे दोषी ए, कऊँकि जेबे तिने आसा ते गिड़गिड़ाई की बिनती कित्ती, तेबे बी आसे ये देखी की कि तेसरी जिन्दगी कितणी मुसीबता रे पड़ी री, तेसरी नि सुणी, इजी बजअ ते एबे आसे बी एते मुसीबता रे पड़ी रे।"

22 रूबेने तिना खे बोलेया, "क्या मैं तुसा खे बोलेया नि था कि यूसुफो रे पापी नि बणो? पर तुसे नि सुणेया। देखो, एबे तेसरे खूनो रा बदला मिलणे लगी रा।" 23 यूसुफो री ओर तिना री आपू बीचे गल्ला एक ओरी माणूंए रे जरीये ओ थी, इजी ते तिना खे पता नि लगेया कि से तिना री पाषा जाणोआ। 24 तेबे से तेथा ते कनारे अटी की रोणे लगेया; फेर तिना गे ते वापस आई की ओर तिना साथे गल्ला करी की तिना बीचा ते शिमोन छाँटी की निकयाल़ेया ओर तेस सामणे बंदुआ राखेया।

याकूबो रे पाऊआ रा कनानो खे वापस आऊणा

25 तेबे यूसुफे आपणे दासा खे आज्ञा दित्ती कि इना रे बोरे नज्जो साथे परो ओर एकी-एकी जणे रे बोरे रे तेसरे पैसे बी राखी देओ, फेर तिना खे बाटा खे खाणे रिया चीजा देओ। तेबे तिने तिना साथे तेड़ा ई कित्तेया। 26 तेबे सेयो आपणा नज्ज गह्देया पाँदे लादी की तेथा ते चलीगे। 27 जेबे सेयो रात कटणे रिया तँईं सरांयी रे रूके तेबे एकी जणे आपणे गह्दे खे चारा देणे खे आपणा बोरा खोलेया ओर तेसखे बोरे रे मुरे पाँदे तेसरे पैसे बाने रे दिखे।

28 तेबे तिने आपणे पाईया खे बोलेया, "मेरे पैसे तो वापस करीते रे, देखो, से मेरे बोरे रे ए," तेबे तिना रे जिऊए रे जिऊ नि रया ओर सेयो एकी दूजे खे डरो रे मारे देखणे लगे ओर बोलणे लगे, "परमेशरे ये आसा साथे क्या करी राखेया?" 29 तेबे सेयो कनान प्रदेशो रे आपणे बाओ याकूबो गे आए ओर आपणियां सारिया गल्ला तेसगे ईंयाँ बताईया, 30 "जो मर्द मिस्र प्रदेशो रा स्वामी ए, तिने आसा साथे सख्ताईया साथे गल्ला कित्तिया ओर आसा खे प्रदेशो रे पेतिए बोलेया। 31 तेबे आसे तेसखे बोलेया, ‘आसे सच्चे माणूं ए, पेतिए निए। 32 आसे बारा पाई एक ई बाओ रे पाऊ ए, एक तो अया नि, पर छोटा एस बखते कनानो रे म्हारे बाओ गे ए।’ " 33 तेबे तिने मर्दे, जो मिस्र प्रदेशो रा स्वामी ए, आसा खे बोलेया, "इजी ते पता लगी जाणा कि तुसे सीदे माणूं ए; तुसे आपू बीचा ते एकी खे मांगे छाडी की आपणे कअरो वाल़ेया री पूख मटयाणे खे कुछ लई जाओ, 34 ओर आपणे छोटे पाईए खे मांगे ली आओ। तेबे माखे विश्वास ऊई जाणा कि तुसे पेतिए निए, सीदे लोक ए। तेबे मां तुसा रा पाई तुसा गे सम्बाल़ी देणा ओर तुसे एते प्रदेशो रे लणा-दणा करी सकोगे।" 35 ये बोली की सेयो आपणे-आपणे बोरे ते नज्ज निकयाल़ने लगे, तेबे तिने क्या देखेया कि एकी-एकी जणे रे पैसेया री थैली तेसरे ई बोरे रेई राखी री ए। तेबे पैसेया री थैलिया देखी की सेयो ओर तिना रा बाओ बऊत डरीगे।

36 तेबे तिना रे बाओ याकूबे तिना खे बोलेया, "आँऊ तो तुसे निर्वंश करी ता, देखो, यूसुफ तो रया नि ओर शिमोन बी नि आया ओर एबे तुसे बिन्यामीनो खे बी निणा चाओए। यो सारिया मुसीबता मां पाँदे आई की पड़ी रिया।"

37 रूबेने आपणे बाओ खे बोलेया, "जे आऊँ एसखे तांगे नि ल्याऊँगा, तो तूँ मेरे दुँईं पाऊआ खे काई देया; तूँ एसखे मेरे आथो रे सम्बाल़ी दे, ओर मां ये तांगे फेर पऊँचाई देणा।"

38 याकूबे बोलेया, "मेरा पाऊ तुसा साथे नि जाणा; कऊँकि तेसरा पाई मरीगा रा ओर एबे से कल्ला रईगा रा, इजी री खातर जेते बाटा रिये तुसे जाओगे, तिदे जे कोई मुसीबत तेस पाँदे आईगी, तेबे तो आऊँ तुसा रिया बजअ ते स्याणदे बखते दु:खो साथे पताल़ो रे उतरी जाणा।"