1 तेबे परमेशरे नूह ओर तेसरे पाऊआ खे आशीष दित्ती ओर तिना खे बोलेया, "फल़ो-फूलो ओर बढ़दे ऊए तरतिया रे परी जाओ। 2 ओर तुसा रा डर ओर भय तरतिया रे सारे डांगरा पाँदे ओर सर्गो रे सारे पंछिया पाँदे ओर तरतिया पाँदे लूरने वाल़े सारे जन्तुआ पाँदे ओर समुद्रो रिया सारिया मछलिया पाँदे बणेया रा रणा। सेयो सारे तुसा रे वशो रे कित्ते जाओए। 3 जिंयाँ तुसा खे अरे-अरे डाल़-बूटे खाणे खे दित्ते थे तिंयाँ ई एबे सारे चलणे वाल़े जन्तु तुसा खे खाणे खे ऊणे, इजी खे एबे सब कुछ तुसा खे देऊँआ।* 4 फेर बी मासो खे प्राणो समेत मतलब लऊए समेत तुसे नि खाएओ कऊँकि लऊए रे प्राण ओआ।* 5 फेर बी मां पक्का तुसा रे खूनो रा बदला सारे डांगरा ओर माणूंआ बीचा ते लणा। माणूंआ रे प्राणो रा बदला मां एकी-एकी रे पाईया ते लणा। 6 जो कोई माणूंआ रा खून बाह्ओ गा, तेसरा खून माणूंआ तेई बाह्या जाणा कऊँकि परमेशरे माणूं आपणे ई रूपो रे मुताबिक बणाई राखेया।* 7 ओर तुसे लोक तो बच्चे पैदा करी की फूलो-फल़़ो ओर बढ़ी जाओ ओर तरतिया पाँदे बऊत जादा परी जाओ।"

8 तेबे परमेशरे नूह ओर तेसरे पाऊआ खे बोलेया, 9 "सुणो, आँऊ तुसा साथे ओर तुसा ते बाद जो तुसा रे जो बच्चे ऊणे, तिना साथे बी वाचा बानूँआ; 10 ओर सारे जिऊँदे प्राणिया साथे बी जो तुसा साथे ए मतलब पंछी, करेलू डांगर, तरतिया रे सारे बणो रे डांगर ओर जितणे जीव-जन्तु जाह्जो ते तां साथे बारे निकल़ी रे, तिना सबी साथे बी आऊँ येई वाचा बानूँआ। 11 ओर मां तुसा साथे आपणी ये वाचा पूरी करनी कि सारे प्राणी फेर जलप्रलय रे जरीये नाश नि ऊणे ओर तरतिया खे नाश करने खे फेर जलप्रलय नि ऊणा।"

12 तेबे परमेशरे बोलेया, "जो वाचा आऊँ तुसा साथे ओर जितणे जिऊँदे प्राणी तुसा साथे ए तिना सबी साथे बी युगो-युगो री पीढ़िया खे बानूँआ। तिजी रा ये चिह्न् ए: 13 कि तेसा वाचा रा ये चिह्न ए कि मैं बादल़ो रे आपणा बरखा रा धनुष राखी राखेया ओर ये मां ओर तरतिया बीचे वाचा रा चिह्न् ऊणा। 14 ओर जेबे आऊँ तरतिया पाँदे बादल़ फैलाऊँ, तेबे बादल़ो पाँदे धनुष दिशणा। 15 तेबे मेरी जो वाचा तुसा साथे ओर सारे जिऊँदे प्राणिया साथे बंदी री, से मां याद करनी, तेबे एड़ा जलप्रलय कदी नि ऊणा जेते कि सारे प्राणिया रा नाश ओ। 16 जेबे कदी मां बादल़ो बीचे धनुष देखणा तेबे मां सदा ये वाचा याद करनी, जो परमेशर ओर तरतिया पाँदले सारे जिऊँदे प्राणिया साथे बानी री ए।"

17 फेर परमेशरे नूओ खे आखरी रे बोलेया, "मैं जो वाचा सारी तरतिया पाँदले सारे प्राणिया साथे बानी राखी, तिजी रा चिह्न् येई ए।"

18 नूओ रे जो पाऊ जाह्जो ते निकल़े, सेयो शेम, हाम ओर येपेत थे ओर हाम कनानो रा बाओ ऊआ। 19 नूओ रे तीन पाऊ यो ईए ओर इना रा वंश सारी तरतिया पाँदे फैली गा। 20 नूह जिम्मीदारा करने लगेया ओर तिने अंगूरा रा बगीचा लगाया। 21 एकी दिने से शराब पी की मतवाल़ा ऊई की आपणे तम्बूए रे नांगा पड़ेया रा था। 22 तेबे कनानो रे बाओए हामे आपणा बाओ नांगा देखेया ओर बारे आई की आपणे दुँईं पाईया गे बताईता। 23 पर शेम ओर येपेते दुँईं जणेया चादर लई की आपणी कान्दा पाँदे राखी ओर पिछले कनारे खे उल्टा चली की आपणे बाओ रा नांगा तन टखी ता। तिने आपणा मूँ पिछले कनारे खे करी राखेया था, इजी बजअ ते तिने आपणा बाओ नांगा नि देखेया। 24 जेबे नूओ रा नशा उतरी गा, तेबे तेसखे पता लगी गा कि तेसरे छोटे पाऊए तेस साथे क्या करी राखेया।

25 तेबे नूए बोलेया,

"कनान स्रापित ओ,

से आपणे रिश्तेदारा रे दासा रा दास ओ।"

26 नूहे फेर बोलेया,

"शेमो रा परमेशर यहोवा तन्य ए

ओर कनान शेमो रा दास ओ।

27 परमेशर येपेतो रे वंशो खे फैलाओ

ओर से शेमो रे तम्बूए रे वशो

ओर कनान येपेतो रा दास ओ।"

28 जलप्रलय ते बाद नूह 350 साला तक जिऊँदा रया। 29 नूओ री कुल उम्र 950 साला री ऊई, तिजी ते बाद से मरी गा।