उत्पत्ति 44

यूसुफो रे जरीये आपणे पाईया री परीक्षा

1 तेबे यूसुफे आपणे कअरो रे पण्डारिये खे आज्ञा दित्ती, "इना माणूंआ रे बोरेया रे जितणी बी खाणे रिया चीजा आई सकोईया तितणी परी देओ ओर एकी-एकी जणे रे पैसे तिना रे बोरे रे मुरे रे राखी देओ। 2 ओर मेरा चाँदिए रा कटोरा छोटे पाईए रे बोरे रे मुरे रे तेसरे नज्जो रे पैसेया साथे राखी दे।" यूसुफो री एसा आज्ञा रे मुताबिक कअरो रे पण्डारिये कित्तेया। 3 प्याग ऊँदे ई तड़के सेयो माणूं तिना रे गह्देया साथे पेजी ते। 4 सेयो शईरो ते निकल़े ई थे ओर दूर नि पऊँची रे थे कि यूसुफे आपणे पण्डारिये खे बोलेया, "तिना माणूंआ पीछे जा ओर जेबे सेयो मिली जाओ तो तिना खे बोल, ‘तुसे पलाईया रे बदले बुराई कऊँ कित्ती? 5 क्या ये सेई चाँदिए रा कटोरा निए जिदे मेरा स्वामी पियोआ ओर तिदे से अनुमान बी लगाया करोआ? तुसे जो ये करी राखेया, से बुरा करी राखेया।’ " 6 जेबे कअरो रे पण्डारिये तिना रा पीछा करी की सेयो पकड़ी ले, तेबे तिने यूसुफो रे पाईया साथे एड़िया ई गल्ला कित्तिया।

7 तिने पण्डारिये खे बोलेया, "ओ म्हारे यहोवा, तूँ एड़िया गल्ला कऊँ लगी रा करने? एड़ा काम करना तेरे दासा ते दूर रओ। 8 देख, जो पैसे म्हारे बोरेया रे मुरे ते निकल़े थे, जेबे आसे तिजी खे कनान प्रदेशो ते ल्याई की ताखे वापस करी ते, तेबे पला, आसे तेरे स्वामिए रे कअरो ते कोई सूईने या चाँदिए री चीज किंयाँ चोरी सकूँए? 9 तेरे दासा बीचा ते जेस केसी गे बी से निकल़ो, से काया जाओ ओर आसे बी आपणे तेस यहोवे रे गुलाम ऊई जाईए।"

10 पण्डारिये बोलेया, "तुसा रा ई बोलणा ठीक ए, जेसगे बी से कटोरा निकल़ो से मेरा गुलाम ऊणा ओर बाकि लोक बेकसुर ऊणे।" 11 ईंयाँ सेयो फटाफट आपणे-आपणे बोरेया खे थाले जमीना पाँदे राखी की खोलणे लगे। 12 कअरो रे पण्डारिये बड़े पाईए रे बोरे ते शुरू करी की छोटे रे बोरे तक टोल़ेया ओर कटोरा बिन्यामीनो रे बोरे रे मिलेया। 13 तेबे पाईए आपणे-आपणे टाल्ले फाड़े ओर आपणा-आपणा गह्दा लादी की शईरो खे वापस ऊईगे। 14 जेबे यहूदा ओर तेसरे पाई यूसुफो रे कअरे पऊँचे ओर यूसुफ तेथी था तेबे सेयो तेस सामणे जमीना पाँदे पड़ी गे।

15 यूसुफे तिना खे बोलेया, "तुसे लोके ये केड़ा काम करी राखेया? क्या तुसे नि जाणो थे कि मां जेड़ा माणूं अनुमान लगाई की सब पता लगाई सकोआ?"

16 यहूदे बोलेया, "आसे लोक आपणे स्वामिए ते क्या बोलिये? आसे क्या बोली की आपू खे बेकसूर ठराईए? परमेशरे तेरे दासा रा पाप पकड़ी ला रा। आसे ओर जेसगे ये कटोरा मिलेया से बी, आसे सब के सब आपणे स्वामिए रे दास ईए।"

17 यूसुफे बोलेया, "एड़ा करना मांते दूर रओ। जेसगे ये कटोरा निकल़ी रा, सेई मेरा दास ऊणा ओर तुसे आपणे बाओ गे सई-सलामत चली जाओ।"

बिन्यामीनो रिया तँईं यहूदा री अर्ज

18 तेबे यहूदा यूसुफो रे नेड़े जाई की बोलणे लगेया, "ओ मेरे यहोवा, तेरे दासो खे आपणे स्वामिए ते एक गल्ल बोलणे री इजाजत ओ ओर तेरा गुस्सा तेरे दासो पाँदे नि पड़को; कऊँकि तूँ तो फिरौनो जेड़ा ए। 19 मेरे स्वामी, तुसे आपणे दासा ते पूछेया था, ‘क्या तुसा रा बाओ या ओर पाई ए?’ 20 तेबे आसे आपणे स्वामिए खे बोलेया, ‘आ, आसा रा स्याणा बाओ आए ओर तेसरे बुढ़ापे रा एक छोटा जा बाल़क बीए, पर तेसरा पाई मरीगा रा, इजी खे एबे से आपणी माया रा कल्ला ई रईगा रा ओर तेसरा बाओ तेसखे बऊत प्यार करोआ।’ " 21 तेबे तैं आपणे दासा खे बोलेया था, "तेसखे मांगे ली आओ, ताकि आँऊ तेसखे आपू देखी सकूँ।" 22 तेबे आसे आपणे यहोवे खे बोलेया, "से पाऊ आपणे बाओ खे नि छाडी सकदा; नई तो तेसरा बाओ मरी जाणा।" 23 पर तैं आपणे दासा खे बोलेया, "जे तुसा रा छोटा पाई तुसा साथे नि आया तो तुसे दुबारा मेरे सामणे नि आई सकदे। 24 इजी खे जेबे आसे आपणे बाओ तेरे दासो गे गये, तेबे आसे तेसगे आपणे यहोवे रिया गल्ला बताईया। 25 तेबे म्हारे बाओए बोलेया, ‘फेर जाई की आसा खे थोड़िया जिया खाणे रिया चीजा मोले ली आओ।’ 26 आसे बोलेया, ‘आसे नि जाई सकदे, आ, जे म्हारा छोटा पाई आसा साथे रओ, तेबे आसा जाणा, कऊँकि जे म्हारा छोटा पाई आसा साथे नि रओगा, तो आसे तेस मर्दो सामणे नि जाई सकदे।’ " 27 तेबे तेरे दासे म्हारे बाओ आसा खे बोलेया, "तुसे तो जाणोए कि मेरी लाड़िया ते दो पाऊ जम्मे। 28 ओर तिना बीचा ते एक तो माखे छाडी की चलीगा ओर मैं निश्चा करी ला कि से मारी ता ऊणा ओर तदुओ ते आऊँ तेसरा मूँ नि देखी सकेया। 29 जे एबे एसखे बी तुसे मेरी आखी ते दूर लई जाओगे ओर कोई मुसीबत एस पाँदे पड़ोगी, तो तुसा रिया बजअ ते आऊँ एस बुढ़ापे रिया उम्रा रे शोगो साथे पताल़ो रे उतरी जाणा।" 30 इजी खे जेबे आऊँ आपणे बाओ तेरे दासो गे पऊँचू ओर ये पाऊ आसा साथे नि रओ तो तेबे तेसरा प्राण, जो एसरे अटकेया रा रओआ, 31 इजी बजअ ते ये देखी की कि पाऊ निए, से तेबुई मरी जाणा। तेबे तेरे दासा रिया बजअ ते, तेरा दास म्हारा बाओ, जो स्याणदी वस्था रे ए, शोगो साथे पताल़ो रे उतरी जाणा। 32 फेर आऊँ यहूदा तेरा दास आपणे बाओ गे ये बोली की कि एस पाऊए रा जिम्मेबार आँऊ ए, "जे आँऊ एसखे तांगे नि पऊँचाई देऊँगा, तेबे तो आऊँ सदा खे तेरा पापी ठईरना।" 33 इजी खे एबे तेरा दास एस पाऊए रे बदले आपणे यहोवे रा दास ऊई की रणे री आज्ञा चाओआ ओर एस पाऊए खे आपणे पाईया साथे जाणे दे। 34 कऊँकि पाऊए खे बिना साथे लई की आऊँ आपणे बाओ गे किंयाँ जाई सकूँआ? एड़ा नि ओ कि मेरे बाओ पाँदे जो दु:ख पड़ना से माखे देखणा पड़ो।