उत्पत्ति 24

इसहाको रे ब्याओ रे बारे दे

1 अब्राहम एबे बऊत स्याणा ऊईगा था ओर यहोवे सबी गल्ला रे तेसखे आशीष दित्ती। 2 अब्राहमे आपणे कअरो रे खास पुराणे नौकरो ते जो तेसरे कअर ओर तेसरी सारी सम्पत्तिया पाँदे अधिकारी था बोलेया, "आपणा आथ मेरी खुटिया निठे राख। 3 ओर तूँ मांते सर्ग ओर तरतिया रे परमेशर यहोवे री इजी रे बारे दे कसम खा कि तूँ मेरे पाऊए खे कनानिया रिया बेटिया बीचा ते, जिना बीचे आऊँ रऊँआ, तिना केसी खे नि ल्याएगा। 4 पर तूँ मेरे ई प्रदेशो रे मेरे ई टब्बरो वाल़ेया गे जाई की मेरे पाऊ इसहाको खे एक लाड़ी ल्याया।"

5 नौकरे अब्राहमो खे बोलेया, "जे केथी से जवाणस एस प्रदेशो रे मां साथे आऊणा नि चाओ तो क्या माखे तेरा पाऊ तेस प्रदेशो रे जेथा ते तूँ आई रा तेथी निणा पड़ना?"

6 अब्राहमे तेसखे बोलेया, "ना, एसा गल्ला रा त्यान राख, मेरा पाऊ तेती कदी नि निणा।" 7 स्वर्गो रे परमेशर यहोवे, जिने आऊँ आपणे बाओ रे कअरो ते ओर मेरी जन्मपूमिया ते ल्याई की मां साथे कसम खाई की बोलेया, "मां ये देश तेरे वंशो खे देणा; तेस ई आपणा स्वर्गदूत तांते आगे-आगे पेजणा कि तूँ मेरे पाऊए खे तेथा ते एक लाड़ी ल्याओ। 8 जे से जवाणस तां साथे नि आऊणा चाओ, तो तूँ मेरी एसा कसमा ते छूटीगा; पर मेरा पाऊ तेती नि निणा।"

9 तेबे तिने नौकरे आपणे मालक अब्राहमो री खुटिया निठे आपणा आथ राखी की तेसते इजी रे बारे दे कसम खाई। 10 तेबे से दास आपणे मालको रे ऊँटा बीचा ते दस ऊँट छाँटी की तेसरी सारी खरिया-खरिया चीजा बीचा ते थोड़ा-थोड़ा लई की चलेया ओर अरम्नहरैमो रे नाहोर शईरो रे नेड़े पऊँचेया। 11 ओर तिने ऊँट शईरो ते बारे एक कुएँ गे बठयाल़े, से सांजका बखत था, जेबे जवाणसा पाणी परने खे निकल़ोईया। 12 फेर से प्रार्थना करने लगेया, "ओ मेरे स्वामी अब्राहमो रे परमेशर, आज मेरे कामो खे सफल कर ओर मेरे मालक अब्राहमो पाँदे दया कर। 13 देख, आँऊ पाणिए रिया एसा सूबल़ा गे खड़ी रा ओर शईरो रे रणे वाल़ेया रिया बेटिया पाणी परने आऊणे लगी रिया। 14 इजी री खातर एड़ा ऊणे दे कि जेसा बेटिया खे आऊँ बोलूँ कि आपणा कअड़ा मेरी तरफा खे टेडा करी देओ, ताकि आऊँ पीऊँ ओर से बोलो कि ‘लओ पी लो, बादो ते आऊँ तेरे ऊँटा खे बी पल़्याऊँगी’ ये सेई ओ जो तुसे आपणे दास इसहाको खे ठराई राखी। ईंयाँ मां जाणी लणा कि तुसे मेरे मालको पाँदे दया करी राखी।"

15 ओर एड़ा ऊआ कि जेबे से प्रार्थना करने ई लगी रा था कि रिबका जो अब्राहमो रे पाई नाहोरो री लाड़ी मिल्का रे पाऊ बतूएलो री बेटी थी, से कांदा पाँदे कअड़ा लई की आई। 16 रिबका बऊत बांकी ओर कुआँरी थी ओर तेसे केसी मर्दो साथे कोई शारीरिक सम्बन्द नि बणाई राखेया था। से कुएँ रे सूबल़ा गे उतरीगी ओर आपणा कअड़ा परी की फेर ऊबे आई।

17 तेबे से नौकर तेसा साथे मिलणे खे दौड़ेया ओर बोलेया, "आपणे कअड़े ते थोड़ा जा पाणी माखे पल़्याई दे।"

18 तेसे बोलेया, "ओ मेरे मालक, लओ, पी लो।" तेसे फटाफट कअड़ा उतारी की आथो रेई की तेसखे पाणी पल़्याया। 19 जेबे से तेसखे पल़्याई चूकी, तेबे बोलेया, "आँऊ तेरे ऊँटा खे बी तदुओ तक पाणी परी-परी की पल़्याऊँगी जदुओ तक सेयो पी खी रज्जी नि जाओगे।" 20 फेर से फटाफट आपणे कअड़े रा पाणी अऊदिया रे लटी की फेर कुएँ रे परने खे दौड़ी की गई ओर तेसरे सारे ऊँटा खे पूरा पाणी परीता। 21 ओर से मर्द तेसा रिया तरफा खे बिना कुछ बोले हैरानिया साथे ताकदा ऊआ ये सोचणे लगी रा था कि यहोवे मेरी यात्रा सफल करी राखी कि नि। 22 जेबे ऊँट पाणी पी चुके, तेबे तिने मर्दे आदा तोल़े सूईने रा एक बाल़ू निकयाल़ी की तेसा खे दित्तेया ओर दस तोल़े सूईने रे कड़े तेसा रे आथो रे पन्याईते।

23 फेर तिने तेसा ते पूछेया, "माखे ये बता कि तूँ केसरी बेटी ए? क्या तेरे बाओ रे कअरे आसा खे रूकणे खे जगा ए?"

24 तेसे जबाब दित्तेया, "आँऊ तो नाहोरो री लाड़ी मिल्का रे पाऊ बतूएलो री बेटी ए।" 25 फेर तेसे तेसखे बोलेया, "म्हारे कअरे पूऊ ओर चारा बऊत ए ओर रूकणे खे जगा बीए।"

26 तेबे तिने मर्दे आपणा सिर चुकाई की यहोवे री आराधना करी की बोलेया, 27 मेरे मालक अब्राहमो रा परमेशर यहोवे तन्य ए कऊँकि से विश्वासो जोगा ए इजी खे तिने आपणी दया ओर सच्चाई मेरे मालको पाँदा ते टाई नि। यहोवे आऊँ ठीक बाटा रे चलाई की मेरे मालको रे रिश्तेदारा रे कअरे पऊँचाई ता रा।

28 तेसे बेटिए दौड़ी की आपणी आम्मा गे यो सारिया गल्ला सुणाईया।

29 एबे लाबान जो रिबका रा बड़ा पाई था, से बारे कुएँ रे नेड़े तेस मर्दो गे दौड़दा ऊआ आया। 30 ओर एड़ा ऊआ कि जेबे तिने से बाल़ू ओर आपणी बईण रिबका रे आथो रे सेयो कड़े देखे ओर तेसा री ये गल्ल बी सुणी कि तिने मर्दे मां साथे एड़िया गल्ला बोलिया; तेबे से तेस मर्दो गे गया जो सूबल़ा रे नेड़े ऊँटा गे खड़ी रा था ओर देखेया कि से सच्च ए।

31 लाबाने अब्राहमो रे नौकरो खे बोलेया, "ओ यहोवे री तरफा ते तन्य पाई, तूँ बारे कऊँ खड़ी रा? मैं तुसा खे कअर ओर तेरे ऊँटा खे रणे खे बी जगा त्यार करी राखी।" 32 अब्राहमो रा नौकर तिना रे कअरे गया ओर लाबाने ऊँटो रिया काठिया खोली की पूऊ ओर चारा दित्तेया ओर तेसखे ओर तेस साथले संगी साथिया खे पैर तोणे खे पाणी दित्तेया।

33 तेबे अब्राहमो रे नौकरो रे आगे खाणे खे कुछ राखेया, पर तिने बोलेया, "आँऊ जदुओ तक आपणे आऊणे रा मतलब नि बोली देऊँगा, तदुओ तक कुछ नि खाऊँगा।" तेबे लाबाने बोलेया, "अच्छा बोली दे।"

34 तेबे तिने बोलेया, "आँऊ अब्राहमो रा नौकर ए। 35 यहोवे मेरे मालको खे बड़ी आशीष देई राखी। से अमीर माणूं ऊईगा रा; परमेशरे तेसखे पेडा-बाकरिया, गाय-बल़द, सूईना-चाँदी, दास-दासिया, ऊँट ओर गह्दे देई राखे। 36 मेरे मालको री लाड़ी सारा रे स्याणदे बखते तेसते एक पाऊ पैदा ऊआ ओर तेस पाऊए खे अब्राहमे आपणा सब कुछ देईता रा। 37 ओर मेरे मालके मांते ये कसम खुल़ाई कि आऊँ तेसरे पाऊए खे कनानिया रिया बेटिया बीचा ते, जिना रे प्रदेशो दे से रओआ, कोई जवाणस नि ल्याऊँगा। 38 पर आँऊ तेसरे बाओ रे कअर ओर कुलो रे लोका गे जाई की तेसरे पाऊए खे एक जवाणस ल्याऊँगा।" 39 तेबे मैं आपणे मालको खे बोलेया कि जे केथी से जवाणस मां पीछे नि आओ। 40 तेबे तिने माखे बोलेया, "यहोवे, जेस सामणे आऊँ विश्वासो साथे चलदा आई रा, तेस तां साथे आपणा दूत पेजी की तेरी यात्रा सफल बनाणी ताकि तूँ मेरे कुल ओर मेरे बाओ रे कराने ते मेरे पाऊए खे एक जवाणस ल्याई सको। 41 तेबेई तूँ मेरी कसमा ते छूटणा जेबे तूँ मेरे कुलो रे लोका गे पऊँचणा ओर जे सेयो ताखे कोई जवाणस नि देओ तेबेई तूँ मेरी कसमा ते छूटणा।" 42 आज जेबे मैं तेस कुएँ रे नेड़े आई की प्रार्थना कित्ती कि ओ मेरे मालक अब्राहमो रे परमेशर यहोवा, जे तुसे मेरी एसा यात्रा खे सफल करोए। 43 तो देख, आँऊ एस कुएँ रे नेड़े खड़ी रा, तो एड़ा ओ कि जो कुआँरी पाणी परने खे आओ ओर आऊँ तेसा खे बोलूँ, "आपणे कअड़े बीचा ते थोड़ा जा पाणी माखे पल़्या।" 44 ओर से माखे बोलो, पी लो, ओर मां तेरे ऊँटा खे पीणे खे बी पाणी परी देणा, से सेई जवाणस ओ, जो यहोवे मेरे मालको रे पाऊए खे चूणी राखी। 45 एड़ा आँऊ आपणे मन ई मनो रे बोलणे लगी रा था कि रिबका कांदा पाँदे कअड़ा लई की निकल़ी की आई, फेर से कुएँ गे उतरी की पाणी परने लगी ओर मैं तेसा खे बोलेया कि माखे पाणी पल़्याई दे। 46 तेसे फटाफट कांदा पाँदा ते आपणा कअड़ा उतारी की बोलेया कि लओ पी लो, बादो ते मां तेरे ऊँटा खे बी पल़्याणा। ईंयाँ मैं पी ला ओर तेसे मेरे ऊँटा खे बी पल़्याई ता। 47 तेबे मैं तेसा ते पूछेया, "तूँ केसरी बेटी ए?" तेसे बोलेया, "आँऊ तो नाहोरो री लाड़ी मिल्का रे पाऊ बतूएलो री बेटी ए।" तेबे मैं तेसा रे नाको रे से बाल़ू ओर तेसा रे आथो रे सेयो कड़े पन्याईते। 48 फेर मैं सिर चुकाई की यहोवे गे माथा तेकेया ओर आपणे मालक अब्राहमो रे परमेशर यहोवे खे तन्य बोलेया कऊँकि तिने आऊँ ठीक बाटा दे पऊँचाया कि आऊँ आपणे मालको रे पाऊए खे तेसरी पोतिया खे लई जाऊँ। 49 एबे जे तुसे मेरे मालको साथे दया ओर विश्वास दखाणा चाओए तो माखे बोली देओ ओर जे नई दखाणा चांदे तेबे बी बोली देओ ताकि आऊँ ये जाणी सकूँ कि आऊँ दाँणे कनारे जाऊँ या खूँजे कनारे।

50 तेबे लाबान ओर बतूएले जबाब दित्तेया, "ये गल्ल तो यहोवे री तरफा ते ऊई री, इजी री खातर आसे तांते ना तो पला बोली सकदे ओर ना ई बुरा। 51 देख, रिबका तां सामणे ए, एसा खे लई जा ओर ये यहोवे रे वचनो रे मुताबिक तेरे मालको रे पाऊए री लाड़ी ऊई जाओ।"

52 तिना री ये गल्ल सुणी की अब्राहमो रे नौकरे जमीना पाँदे थाले चूकी की यहोवे गे माथा तेकेया। 53 फेर तिने दासे सूईने ओर चाँदिए रे गईणे ओर किमती टाल्ले निकयाल़ी की रिबका खे दित्ते ओर इतणा ई नि तेसा रे पाई ओर आम्मा खे बी तिने कीमती-कीमती चीजा दित्तिया। 54 फेर तिने आपू साथे आए रे माणूंआ समेत रोटी खाई ओर रात तेथी बिताई। दूजे दिने तिने तड़के उठी की बोलेया, "माखे आपणे मालको गे जाणे खे बिदा करो।"

55 पर रिबका रे पाईए ओर माए बोलेया, "कन्या खे आसा गे कम से कम दसा दिना तक रणी देओ, फेर तिजी ते बाद से चली जाओगी।"

56 पर अब्राहमो रे नौकरे तिना खे बोलेया, "यहोवे जो मेरी यात्रा सफल करी राखी, इजी खे तुसे माखे नि रोको ओर माखे बिदा करी देओ कि आऊँ आपणे मालको गे जाई सकूँ।"

57 फेर तिने बोलेया, "आसे बेटिया खे पूछूँए कि से क्या बोलोई।" 58 तेबे तिने रिबका खे बुलाई की पूछेया, "क्या तां एस माणूंए साथे जाणा?" तेसे बोलेया, "आ, मां जाणा।"

59 तेबे तिने आपणी बईण रिबका, तेसा री दाई ओर अब्राहमो रे दास ओर तेसरे सब साथी बिदा करीते। 60 तिने रिबका खे आशीर्वाद देंदे ऊए बोलेया, "ओ म्हारी बईण! तूँ ह्जार लाखा री माए बणो ओर तेरा वंश आपणे बैरिया रे शईरो खे आपणे कब्जे रे लई लओ।" 61 फेर रिबका आपणी दासिया साथे त्यार ऊई की ओर ऊँटो पाँदे चढ़ी की तेस दासो साथे चलणे लगी। ईंयाँ से दास रिबका खे साथे लई की चली पड़ेया।

62 इसहाक जो नेगेबो रे रओ था, इजी खे लहैरोई नाओं रे कुएँ गे ते ऊई की आऊणे लगी रा था। 63 एक दिन साँजके बखते इसहाक मैदानो रे त्यान करने खे निकल़ी रा था ओर जिंयाँ तिने आखी चकी की देखेया तो ऊँट आऊणे लगी रे थे। 64 ओर रिबके बी आखी चकी की इसहाक देखेया ओर देखदे ई ऊँटो पाँदा ते उतरीगी। 65 ओर तेसे अब्राहमो रे दासो ते पूछेया, "जो माणूं मैदानो रे आसा साथे मिलणे आऊणे लगी रा, से कुण ए?" दासे बोलेया, "से तो मेरा मालक ए।" तेबे रिबके कूँडा पाई की आपणा मूँ टखी ता। 66 तेबे नौकरे जो कुछ तेस साथे ऊआ था सब गल्ला इसहाको गे बताईतिया। 67 तेबे इसहाक रिबका खे आपणी आम्मा सारा रे तम्बूए रे ली आया ओर तेसा साथे ब्या कित्तेया। तदुए ते रिबका इसहाको री लाड़ी बणीगी ओर से तेसा साथे प्यार करो था। ईंयाँ इसहाको खे आपणी माया रिया मौता ते बाद तेस दु:खो ते शान्ति मिली।