1 फेर याकूबे आपणे पाऊआ खे आपू गे ये बोली की बुलाया, "कट्ठे ऊई जाओ, आँऊ तुसा खे बताणा चाऊँआ कि आऊणे वाले़ दिना रे तुसा पाँदे क्या-क्या बीतणा। 2 ओ याकूबो रे पाऊओ, कट्ठे ऊई की मेरी सुणो, आओ आपणे बाओ इस्राएलो रिया गल्ला त्यानो साथे सुणो।"

3 ओ रूबेन, तूँ मेरा जेठा, मेरी तागत ओर मेरी मर्दानगिया रा पईला फल़ ए;

मान-सम्मानो रा खरा पाअग ओर तागती रे महान तूँई ए।

4 तूँ जो पाणिए जेड़ा ऊफणने वाल़ा ए,

इजी री खातर तूँ आपणे पाईया ते आगे नि बढ़ना;

कऊँकि तूँ आपणे बाओ रे माँजे पाँदे चढ़ेया,

तेबे तैं से अशुद्ध कित्तेया;

से मेरे बछौणे पाँदे चढ़ीगा।

5 शिमोन ओर लेवी तो पाई-पाई ए,

तिना री तलवारी ईंसा रे अथियार ए।

6 ओ मेरे जीव, तिना री गुप्त संगतिया रे नि बैठ,

ओ मेरी आत्मा, तिना री गुप्त योजना रे नि मिल;

कऊँकि तिने गुस्से ते माणूं काईते

ओर तिने आपू खे खुश करने रिया तँईं बल़द लंगड़े करीते।

7 तिना रे गुस्से खे धिक्कार ए, कऊँकि से प्रचण्ड था

ओर तिना रे रोषो खे, जो निर्दयी था;

मां सेयो याकूबो रे लग-लग

ओर इस्राएलो रे तित्तर-बित्तर करी देणे।

8 ओ यहूदा, तेरे पाईया तेरी सराईणा करनी,

तेरा आथ तेरे दुश्मणा रिया क्याड़िया पाँदे संवार ऊई की रणा;

तेरे बाओ रे पाऊआ तांगे माथा टेकणा।

9 यहूदा शेरो रा बच्चा ए।

ओ मेरे पाऊ, तूँ शिकार करी की गुफा रे गया;

से शेरो जेड़ा दुबकी की बैठी गा;

फेर केस से छेड़ना। *

10 जदुए तक शीलो नि आओ,

तदुओ तक ना तो यहूदा ते राजदण्ड छूटणा,

ना तेसरे वंशो ते बिधि-बिधान् देणे वाल़ा लग ऊणा

ओर राज्य-राज्य रे लोक तेसरे ऊई जाणे।*

11 तेस आपणा जवान गह्दा दाखा री बेला रे

ओर आपणी गह्दिया रे बच्चे खरी

जातिया री दाखा री बेला रे बानेया करने;

तिने आपणा टाल्ला अंगूरा रे रसो रे

ओर आपणा पईरावा दाखा रे रसो रे तोया।*

12 तेसरी आखी अंगूरा रे रसो ते जादा लाल

ओर तेसरे दाँद दूदो ते जादा सफेद ऊणे।

13 जबूलून रे वंशो रे लोक समुद्रो रे कनारे बसणे,

से जाह्जा रिया तँईं बन्दरगाह बणना

ओर तेसरा पोरला इस्सा सिदोनो रे नेड़े पऊँचणा।

14 इस्साकार एक बऊत बड़ा ओर तागतबर गह्दे जेड़ा ए

जो डांगरा रे बाड़े बीचे दबेया रा रओआ।

15 तिने एक राम करने री जगा देखी, कि ये अच्छी ए

ओर एक देश कि ये अच्छा ए,

आपणा कंदा बोज चकणे खे चुकाया

ओर मुफ्तो रे दासो जेड़े सेवा रा काम करने लगेया।

16 दानो, इस्राएलो रा एक गोत्र ऊई की आपणी

जातिया रे पाईया रा न्याय करना।

17 दान बाटा बीचला एक साप

ओर बाटा बीचला एक नाग ऊणा,

जो कोड़ेया री नल़िया खे डसोआ,

जेते की तेस पाँदे बैठी री सवारी धड़ाम करी की रूड़ोई।

18 ओ यहोवा, आँऊ तांते ई उद्धार पाणे री बाट देखदा आई रा।

19 गादो पाँदे एकी चूण्डो अमला तो करना;

पर तेस तेसी चूण्डो रे पैरो री आडिया रे डंग बाणा।

20 आशेरो ते जो नज्ज पैदा ऊणा,

से खरा ऊणा ओर तेस राजे जोगी स्वाद रोटी देया करनी।

21 नप्ताली एक छूटी री हिरीणी ए;

से बांकिया गल्ला बोलोआ।

22 यूसुफ रे वंशो रे लोक तागतबर बेला री एक पाँगटी ए,

से सूबल़ा गे लगी री फल़वंत बेला री एक पाँगटी ए;

तिजी री डाल़िया दवाला पाँदा ते चढ़ी की फैली जाओईया।

23 धनुष चलाणे वाल़ेया से नशाणा बणाया

ओर यूसुफो खे तीर बाए

ओर तेस पीछे पड़ी रे।

24 पर तेसरा धनुष मजबूत रया

ओर तेसरी बांयी ओर आथ याकूबो रे

तेसी शक्तिमान परमेशरो रिया बजअ ते फुर्तिले ऊए,

जेसगे ते से ग्वाला आऊणा, जो इस्राएलो रा पात्थर बी ठईरना।

25 ये तेरे बाओ रे तेस परमेशरो रा काम ए,

जेस तेरी मताद करनी,

तेस सर्वशक्तिमानो रा जो ताखे

ऊबा ते, सर्गो रिया आशीषा,

ओर थाला ते डूगे पाणिए रिया आशीषा,

ओर दूद ओर गर्भो रिया आशीषा देणियां।

26 तेरे बाओ रे आशीर्वाद

मेरे पितरा रे आशीर्वादा ते जादा बढ़ीगे रे

ओर सदा रणे वाल़िया पाह्ड़िया री मन-चायी चीजा

जेड़े बणे रे रणे। सेयो यूसुफो रे सिरो पाँदे,

जो आपणे पाईया बीचा ते न्यारा करी राखेया था,

तेसरे ई सिरो रे मुकुटो पाँदे फूलणे-फल़़ने।

27 बिन्यामीन फाड़ने वाल़े भेड़िए जेड़ा ए,

प्यागा तो तेस शिकार खाणा

ओर साँजा लूट बांडी लणी।

28 इस्राएलो रे बारा गोत्र येई ए ओर तिना रे बाओ जेस-जेस वचनो ते तिना खे आशीर्वाद दित्तेया, सेयो येई ए; एकी-एकी खे तिना रे आशीर्वादा रे मुताबिक तिने आशीर्वाद दित्तेया।

29 तेबे इस्राएले आपणे पाऊआ खे ये बोली की आज्ञा दित्ती, "आँऊ आपणे मरे रे लोका साथे मिलणे वाल़ा ए: इजी खे माखे हित्ती एप्रोनो री जमीना वाल़ी गुफा रे मेरे बाप-दादेया साथे माट्टी देणी,* 30 मतलब तेसी गुफा रे जो कनान प्रदेशो रे मम्रे रे सामणे वाल़ी मकपेला री जमीना रे ए; तेसा जमीन खे अब्राहमे हित्ती एप्रोनो ते इजी खेई मोले लई राखी थी कि से कब्रिस्तानो खे तेसरी आपणी जमीन बणी जाओ। 31 तेती अब्राहम ओर तेसरी लाड़ी सारा खे माट्टी दित्ती ओर तेथी इसहाक ओर तेसरी लाड़ी रिबका खे बी माट्टी दित्ती ओर तेथी मैं लिआ खे बी माट्टी दित्ती। 32 से जमीन ओर तिजी री गुफा हित्तिया ते मोले लई राखी।" 33 जेबे ये आज्ञा याकूब आपणे पाऊआ खे देई चुकेया, तेबे तिने आपणे पैर माँजे पाँदे कट्ठे करी की प्राण छाडी ते ओर आपणे बुजुर्गा साथे जाई की मिलीगा।*