उत्पत्ति 32

एसावो रा याकूबो ते मिलणे आऊणा

1 लाबानो रा वापस जाणे ते बाद याकूब बी आपणी बाटा रिये चलदा गया ओर परमेशरो रे स्वर्गदूत तेसखे मिले। 2 तिना खे देखदे ई याकूबे बोलेया, "ये तो परमेशरो रा चूण्ड ए।" तेसखे दो चूण्ड दिशे तेबेई तो तिने तेते जगा रा नाओं महनैम*32:2 महनैम मतलब दो चूण्ड राखेया। महनैमो रा मतलब ए दो चूण्ड। 3 तेबे याकूबे सेईर प्रदेशो रे, मतलब एदोम प्रदेशो रे, आपणे पाई एसावो गे आपू ते आगे संदेशा देणे वाल़े दूत पेजी ते। 4 ओर तिने तिना लोका खे ये आज्ञा देई की पेजेया, "मेरे मालक एसावो खे ये बोलणा कि तेरा दास याकूब ताखे ईंयाँ बोलोआ कि आऊँ लाबानो गे परदेशी ऊई की एबुओ तक रया। 5 एबे मांगे गाय-बल़द, गह्दे, पेडा-बाकरिया ओर दास-दासिया ए ओर मैं आपणे मालको गे संदेशा इजी खे पेजी राखेया ताकि तेरी दया मां पाँदे बणी री रओ।"

6 सेयो संदेशा देणे वाल़े दूत याकूबो गे वापस आई की बोलणे लगे, "आसे तेरे पाई एसावो गे गये थे ओर से बी ताखे मिलणे रिया तँईं 400 मर्द साथे लई की आऊणे लगी रा।" 7 तेबे याकूब बऊत डरीगा ओर मुसीबता रे पड़ीगा ओर तिने ये सोची की आपणे साथिया रे ओर पेडा-बाकरिया रे ओर गाय-बल़दा रे ओर ऊँटा रे बी लग-लग दो चूण्ड बणाईते, 8 तिने ये सोचेया कि जे मेरा पाई एसाव आई की पईले चूण्डो खे मारने लगो, तो दूजा चूण्ड नठी की बची जाणा।

9 फेर याकूबे प्रार्थना करी की बोलेया, "ओ यहोवा, ओ मेरे दादा अब्राहमो रे परमेशर, ओ मेरे बाओ इसहाको रे परमेशर, तैं तो माखे बोलेया था कि तूँ आपणे देश ओर आपणी जन्मपूमिया खे वापस चली जा ओर मां तेरी पलाई करनी, 10 तैं जो आपणी करूणा ओर वफादारी आपणे दासो साथे दखाई राखी ये बऊत बड़ी ए ओर आऊँ आपू खे एते जोगा पनि समजदा। जेबे मैं आपणा कअर छाडी की ये यरदन नदी पार कित्ती तेबे मेरे आथो रे एक सोठी छाडी की ओर कुछ नि था। पर एबे आऊँ इना दूई चूण्डा साथे एसा नदिया खे पार करने लगी रा! 11 एबे आऊँ बिनती करूँआ कि माखे मेरे पाई एसावो रे आथो ते बचा कऊँकि आऊँ तो तेसते डरूँआ, केथी एड़ा नि ओ कि से आई की माखे ओर माया समेत बाल-बच्चेया खे बी काई देओ। 12 तैं तो बोलेया था कि मां पक्का तेरी पलाई करनी ओर तेरा वंश समुद्रो रे बालूए री कणियां जेड़ा बऊत करना, कि बऊत जादा ऊणे रिया बजअ ते कोई गिणी नि सकणा।"

13 याकूबे से रात तेथी कटी ओर जो कुछ तेसगे था तिजी बीचा ते आपणे पाई एसावो खे पेंट देणे रिया तँईं ये डांगर छाँटी-छाँटी की निकयाल़े, 14 सेयो ये थे मतलब 200 बाकरिया ओर 20 बाकरे ओर 200 पेडा ओर बीई खाडू 15 ओर बच्चेया समेत दूद देणे वाल़िया 30 ऊँटणियां ओर तिना रे बच्चे ओर 40 गाय ओर 10 बाच्छूआ ओर 20 गह्दिया ओर तिना रे 10 गह्दे। 16 इना रे तिने चूण्ड-चूण्ड करी की आपणे दासा गे सम्बाल़ी की तिना खे बोलेया, "मांते आगे बढ़ी जाओ ओर चूण्डा बीचे फर्क राखो।" 17 फेर तिने सबी ते आगले चूण्डो रे रखवाल़े खे ये आज्ञा दित्ती, "जेबे मेरा पाई एसाव ताखे मिलो ओर पूछणे लगो, ‘तूँ केसरा दास ए ओर केई चली रा ओर यो जो डांगर तांते आगे-आगे ए, सेयो केसरे ए?’ 18 तेबे बोलणा, ‘यो तेरे दास याकूबो रे ए, तिने आपणे स्वामी एसावो गे पेंटा रे रूपो रे ये पेजी राखे ओर से आपू बी आसा पीछे-पीछे आऊणे लगी रा।’ " 19 ईंयाँ तिने दूजे ओर तीजे रखवाल़े खे बी, बल्कि तिना सबी खे बी जो चूण्डा रे पीछे-पीछे थे एड़ी ई आज्ञा दित्ती कि जेबे एसाव तुसा खे मिलो तो तेसखे ईंयाँ ई बोलणा। 20 ओर ये बी बोलणा, "तेरा दास याकूब आसा पीछे-पीछे आऊणे लगी रा।" कऊँकि तिने एड़ा सोचेया कि इना पेंटा रे जरीये मां तेसरा गुस्सा शांत करना ऊई सकोआ कि जेबे आऊँ तेसते मिलणे जाऊँ तो से माखे खुशिया साथे अपनाई लओ। 21 इजी खे याकूबे आपणी पेंट आपू तेई पईले पेजी ती ओर से आपू तेसा राती छावणिया रे जेते जगा रे तिने डेरा करी राखेया था रूकेया रा रया।

याकूबो री कुश्ती

22 तेसी राती याकूब उठेया ओर आपणियां दुँईं लाड़िया ओर दुँईं दासिया ओर तिना ग्यारा पाऊआ खे साथे लई की काअटो ते यब्बोक नदिया ते पार उतरी गा। 23 तिने सेयो तेसा नदिया ते पार उतारी ते, फेर तिने आपणा सब समान बी पेजीता। 24 ओर याकूब आपू तेती कल्ला रईगा; तेबे कोई मर्द आई की प्याग ऊणे तक तेस साथे कुश्ती करदा रया। 25 कुश्ती करदे बखते तिने माणूंए देखेया कि आऊँ याकूबो खे अराई नि सकदा, तो तिने तेसरी खुट्टिया री नसा पाँदे बाई; ओर याकूबो री खुट्टिया री नस चढ़ी गी।

26 तेबे तिने माणूंए बोलेया, "माखे जाणे दे, कऊँकि प्याग ऊणे वाल़ी ए।" पर याकूबे बोलेया, "जदुओ तक तूँ माखे आशीर्वाद नि देओगा, तदुओ तक मां तूँ जाणे नि देणा।" 27 तेबे तिने माणूंए याकूबो ते पूछेया, "तेरा नाओं क्या ए?" तिने बोलेया, "याकूब।" 28 तेबे तिने माणूंए बोलेया, "तेरा नाओं एबे याकूब नि रणा, पर इस्राएल*32:28 इस्राएल मतलब से परमेशरो साथे लड़ेया ऊणा, कऊँकि तैं माणूंआ ओर परमेशरो साथे बी कुश्ती करी की तेस पाँदे काबू पाया।"

29 तो याकूबे बोलेया, "आँऊ बिनती करूँआ कि माखे आपणा नाओं बता।" पर तिने बोलेया, "तूँ मेरा नाओं कऊँ पूछणे लगी रा?" तेबे तिने याकूबो खे तेथी आशीर्वाद दित्तेया। 30 तेबे याकूबे तेसा जगा रा नाओं पनीएल*32:30 पनीएल पनिएलो रा मतलब परमेशरो रा मूँ राखेया कऊँकि तिने बोलेया, "परमेशरो खे आमणे-सामणे देखणे ते बाद बी आँऊ जिऊँदा रया।" 31 पनिएलो गे ते चलदे-चलदे सूरज निकल़ी गा ओर याकूब खुट्टिया री बजअ ते लंगड़ा चलणे लगी रा था। 32 इस्राएली लोक जो डांगरा री खुट्टिया खे जोड़ने वाल़ी नसा खे आजो तक नि खांदे, इजी री बजअ येईए कि तिने मर्दे याकूबो री खुट्टिया री जोड़ा री नस छुँईं थी।