1 यहोवे जेड़ा वादा कित्तेया था तिंयाँ ई सारा री सम्बाल़ लई की तेसा साथे आपणे वादे रे मुताबिक कित्तेया। 2 सारा अब्राहमो रे स्याणदे बखते तेसते गर्भवती ऊई की एकी पाऊए खे जन्म दित्तेया। ये सेई ठराया रा बखत था जेड़ा परमेशरे तेसते वादा कित्तेया रा था। 3 अब्राहमे आपणे तेस पाऊए रा नाओं जो सारा ते जम्मेया था इसहाक राखेया।* 4 जेबे अब्राहमो रा पाऊ इसहाक आठा दिना रा ऊआ तेबे तिने परमेशरो रिया आज्ञा रे मुताबिक तेसरा खतना कित्तेया।* 5 जेबे अब्राहमो रा पाऊ इसहाक जम्मेया तेबे से 100 साला रा था।

6 ओर सारे बोलेया, "परमेशरे आऊँ खुश करी राखी ओर जेस ये गल्ल सुणनी सेयो बी मां साथे खुश ऊणे।" 7 फेर तेसे एड़ा बी बोलेया, "कदी कोई अब्राहमो खे बोली सको था कि सारा माठेया खे दूद पल़्याओगी? तेबे बी देखो, मैं तेसरे स्याणदे बखते एक पाऊ पैदा कित्तेया।" 8 से बच्चा बढ़ेया ओर तेसते दूद छुड़ाईता ओर जेस दिने इसहाको रा दूद छुड़ाया तेस दिने अब्राहमे बड़ी पाट्टी कित्ती।*

9 तेबे सारा खे मिस्री दासी हाजिरा रा पाऊ जो अब्राहमो ते पैदा ऊआ था, इसहाको रा मजाक ऊड़ांदा ऊआ दिशेया। 10 इजी बजअ ते तेसे अब्राहमो खे बोलेया, "एसा दासिया खे पाऊए समेत निकयाल़ी दे, कऊँकि एसा दासिया रा पाऊ मेरे पाऊ इसहाको साथे बरासत पाणे रे अक्कदार नि ऊणा।"* 11 ये गल्ल अब्राहमो खे आपणे पाऊए इश्माइलो रिया बजअ ते बऊत बुरी लगी कऊँकि इश्माईल बी तेसरा ई पाऊ था।

12 पर परमेशरे अब्राहमो खे बोलेया, "एस पाऊए ओर आपणी दासिया रे बारे दे तैं चिन्ता नि करनी। जो गल्ल सारा ताखे बोलोई तिजी खे मान कऊँकि इसहाको तेई तेरा वंश चलणा।* 13 दासिया रे पाऊए ते बी मां एक प्रदेश बनाणा कऊँकि से तेरा वंश ए।"

14 दूजे दिने अब्राहमे प्यागा तड़के उठी की कुछ रोटी ओर चामड़े री थैलिया रे पाणी परी की हाजिरा खे दित्तेया ओर तेसा रे कांदा पाँदे राखी ओर तेसा रे पाऊए साथे पेजी ती। से चली गी ओर बेर्शेबा गांव रे सुनसाण जगा रे पटकणे लगी। 15 जेबे थैलिया रा पाणी खत्म ऊईगा, तेबे तेसे से पाऊ एकी जाड़ो निठे राखी ता 16 फेर से आपू तेसते तकरीबन 200 आथो रिया दूरिया पाँदे जाई की तेस सामणे ये सोची की बैठी गी कि आँऊ पाऊए खे मरदे ऊए नि देखी सकदी। तेबे से तेस सामणे बैठी की जोरे-जोरे की रोणे लगी।

17 परमेशरे तेस पाऊए रा रोणा सुणेया ओर तेसरे स्वर्गदूते स्वर्गो ते हाजिरा खे आका पाई की बोलेया, "ओ हाजिरा ताखे क्या ऊआ? डर नि; जेती तेरा पाऊ पड़ेया राए, तेथा ते तेसरी आवाज परमेशरो खे सुणी गी री। 18 उठ, आपणे पाऊए खे चक ओर आपणे आथो साथे सम्बाल़ कऊँकि मां तेसरे जरीये एक बड़ी जाति बनाणी।" 19 परमेशरे तेसा रिया आखी खोली तिया ओर तेसा खे एक पाणिए रा कुआँ दिशेया, तेबे तेसे जाई की थैली पाणिए साथे परी की पाऊए खे पाणी पल़्याया। 20 ओर जिंयाँ पाऊ बढ़ने लगी रा था परमेशर तेस पाऊए साथे था ओर से सुनसाण जगा रे रंदे-रंदे धनुर्धारी बणीगा। 21 जेबे से पारान नाओं री सुनसाण जगा रे रया करो था तेबे तेसरिये माए तेसखे मिस्र प्रदेशो ते एक लाड़ी मुंगाई।

22 तिना दिना रे अबीमेलेके आपणे सेनापति पीकोलो साथे आई की अब्राहमो खे बोलेया, "तेरे हर कामो रे परमेशर तां साथे रओआ। 23 इजी खे एबे मां साथे परमेशरो खे सामणे जाणी की ये वादा कर कि तूँ कदी मां साथे, मेरे बच्चेया साथे ओर मेरे ऊणे वाल़े वंशो साथे छल नि करेगा। पर जेड़ी दया मैं तां पाँदे करी राखी, तेड़ी ई तूँ मां पाँदे ओर एस प्रदेशो पाँदे बी दखाया जिदे तूँ परदेशी ऊई की रएया।"

24 अब्राहमे बोलेया, "आँऊ वादा करूँआ।" 25 ओर अब्राहमे अबीमेलेको खे एक कुएँ रे बारे दे, जो अबीमेलेको रे दासे जबरदस्ती लई ला था, ऊल़ामा दित्तेया।

26 पर अबीमेलेके बोलेया, "आँऊ नि जाणदा कि ये काम किने करी राखेया। तैं बी मांगे नि बताया ओर आँऊ तो इजी रे बारे दे आज ई सुणने लगी रा।" 27 तेबे अब्राहमे पेडा-बाकरिया ओर गाय-बल़द अबीमेलेको खे दित्ते ओर दुँईं जणेया आपू बीचे वाचा बानी। 28 अब्राहमे तिना पेडा बीचा ते पेडा रिया सात बच्चिया लग करी की राखिया।

29 तेबे अबीमेलेके अब्राहमो ते पूछेया, "इना पेडा रिया सात बच्चिया रा जो तैं लग करी राखिया, क्या मतलब ए?"

30 तिने बोलेया, "तूँ इना पेडा रिया सात बच्चिया खे एसा गल्ला रा साक्षी जाणी की मेरे आथो ते लओ कि मैं ये कुआँ खणी राखेया।" 31 तिने दुँईं जणेया तेते जगा रे जो आपू बीचे वाचा बानी इजी बजअ ते तेथो रा नाओं बेर्शेबा पड़ेया। 32 जेबे तिने बेर्शेबा रे आपू बीचे वाचा बानी तेबे अबीमेलेक ओर तेसरा सेनापति पीकोल उठी की पलिश्तिया रे प्रदेशो खे वापस ऊईगे। 33 तेबे अब्राहमे बेर्शेबा रे एक डाल़ लगाया ओर तेती यहोवे ते जो सनातन परमेशर ए, आराधना कित्ती। 34 ओर फेर अब्राहम पलिश्तिया रे प्रदेशो रे बऊत दिना तक परदेशी ऊई की रया।