उत्पत्ति 13

अब्रामो रा कनान प्रदेशो खे आऊणा

1 तेबे अब्राम मिस्रो प्रदेशो खे छाडी की आपणी लाड़ी ओर आपणी सारी सम्पति ओर लूतो खे बी साथे लई की कनानो रे नेगेबो रे आया। 2 अब्राम आपणे डांगर ओर सूईने-चाँदिए ते बऊत तअनी ऊईगा था। 3 फेर से नेगेबो ते चलदे-चलदे एकी जगा ते दूजी जगा रे बेतेलो गे तेसा ई जगा रे पऊँचेया, जेती तिने पईले आपणा तम्बू खड़ा करी राखेया था, जो बेतेल ओर ऐ रे बीचे ए। 4 ये सेई जगा ए जेती अब्रामे पईले बेदी बणाई थी ओर तेती तिने फेर यहोवे रे नाओं ते आराधना कित्ती थी।

अब्राम ओर लूतो रा लग-लग ऊणा

5 लूत जो अब्रामो साथे जाणे लगी रा था, तेसगे बी पेडा-बाकरिया, गाय-बल़द ओर तम्बू थे। 6 पर तिना दुँईं खे तेते प्रदेशो रे कट्ठे रणे खे ओर तिना रिया पेडा-बाकरिया खे चुगणे खे जितणी जगा चाईयो थी तितणी नि थी। कऊँकि तिना गे बऊत सम्पत्ति थी। इजी बजअ ते सेयो कट्ठे नि रई सके। 7 तेबे एकी दिने एड़ा ऊआ कि अब्रामो री ओर लूतो रिया पेडा-बाकरिया ओर गाय-बल़दा खे चराणे वाल़ेया बीचे चगड़ा ऊईगा। तेस बखते तेस प्रदेशो रे कनानी ओर परिज्जी जातिया रे लोक रओ थे।

8 तेबे अब्राम तेस चगड़े रे बारे दे सुणी की लूतो खे बोलणे लगेया, "मां ओर तां बीचे ओर मेरे ओर तेरे ग्वाल़ेया बीचे चगड़ा नि ऊणा चाईयो, कऊँकि आसे एकी टब्बरो रे ए। 9 देख, सारी जमीन तां सामणे ए। तो तूँ मांते लग ऊई जा। जे तूँ खूँजे कनारे जाएगा, तो मां दाँणे कनारे चली जाणा ओर जे तूँ दाँणे कनारे जाएगा, तो मां खूँजे कनारे चली जाणा।" 10 तेबे लूते चऊँ कनारे कि कुणजी जगा अच्छी ए यरदन नदिया रे नेड़े सोअर शईरो री सारी सवीं जगा तक देखेया तो मिस्र प्रदेशो री नील नदिया रे कनारे जेड़ा अरा-फरा ओर यहोवे रे बगीचे जेड़ा दिशेया। ये सब यहोवे रे सदोम ओर गमोरा शईरो रा नाश करने ते पईले था। 11 तेबे लूत आपणियां तँईं यरदनो री सारी सवीं जगा चूणी की पूर्वो रिया तरफा खे चलेया ओर ईंयाँ सेयो दोनो जणे एकी-दूजे ते लग ऊईगे। 12 अब्राम तो कनान प्रदेशो रे रया, पर लूत तेसा सवीं जगा रे शईरो रे रणे लगेया ओर तिने आपणा तम्बू सदोम शईरो रे नेड़े खड़ा कित्तेया। 13 सदोमो रे लोक दुष्टता ओर पापो रे काम करी की यहोवे रे गुस्से खे पड़काणे लगी रे थे।

अब्रामो रा हेब्रोनो खे जाणा

14 लूतो रा अब्रामो ते लग ऊई जाणे ते बाद यहोवे अब्रामो खे बोलेया, "जेते जगा रे तूँ खड़ी रा तेथा ते उत्तर-दक्खण, पूर्व, पश्चिम, चऊँ कनारो खे आखी कुमाई की देख। 15 ये सारी जमीन जो ताखे दिशोई, से सारी मां ताखे ओर तेरे वंशो खे जुगो-जुगो तक देई देणी।*13:15 प्रेरित 7:5 16 ओर मां तेरा वंश तरतिया री तूड़ा री कणियां जेड़ा बऊत करी देणा, एथो तक कि जो कोई तरतिया री तूड़ा री कणिंया खे गिणी सकोगा तो सेई तेरा वंश बी गिणी सकणा। 17 उठ, एसा जमीना रिया पूरी लम्बाईया ओर पूरी चौड़ाईया रे चली-फिरी की देख;, कऊँकि से मां ताखे ई देणी।" 18 इजी ते बाद अब्राम आपणा तम्बू पट्टी की हेब्रोनो रे मम्रे रे बड़े डाल़ा बीचे जाई की रणे लगेया ओर तिने तेती बी यहोवे रिया तँईं बेदी बणाई।