1 इतिहास 20

रब्बाह नगरे पुड़ ज़ीत

1 फिरी नंव्वे सालेरी शुरुआती मां ज़ैखन राज़े जंग केरनेरे लेई गाते थिये, तैखन योआबे बड़ी भारी सेना साथी नेइतां अम्मोनी केरो मुल्ख उज़ाड़ो ते एइतां रब्बाह नगर भी घेरू। पन दाऊद यरूशलेम नगरे मां राव। ते योआबे रब्बाह नगर ज़ींतू ते तबाह कियूं।✝20:1 2 शमू. 11:1. 2 तैखन दाऊद राज़े तैन केरे राज़ेरू सोन्नेरू ताज तैसेरे क्रोड़ी पुड़ेरां*20:2 क्रोड़ी पुड़ेरां भोइ सकते कि आमोनी केरे देबते मूरती पुड़ां उसालेरू भोए। उसालू, ज़ेसेरो वज़न लगभग 35 किल्‍लो थियो, ते तैस मां मणि भी लेवरी थी। ते तैन दाऊदे लुवावं जेवं। फिरी तैस नगरे मां बड़ू सामान तैन लुटी मां मैल्हू। 3 तैनी तैस नगरे मां रानेबाले लोक केढतां आरन सेइं ते लोंहेरे फने सेइं ते मैक्‍कन सेइं कटाए। ते अम्मोनी केरे सारे नगरन सेइं भी दाऊदे तैन्ने कियूं। तैखन दाऊद सारे लोकन सेइं साथी यरूशलेम नगरे जो वापस जेव।

पलिश्ती बहादरां केरो नाश

4 इसेरे बाद गेजेर नगरे मां पलिश्ती सेना सेइं जंग भोइ। तैस मौके हूशाई सिब्बकै, सिप्पै मारो, ज़ै रपारे खानदाने मरां थियो। ते पलिश्ती हारे। 5 किछ वक्तेरां बाद पलिश्तन सेइं फिरी जंग भोइ। तैस मां याईरेरे मट्ठे एल्हनाने पलिश्ती केरे गत नगरेरे गोलियतेरो ढ्ला लहमी मारो, ज़ेसेरो भालो ज़ुलाहेरे डण्डे बराबर लम्मो थियो। 6 फिरी गत नगरे मां भी जंग भोइ, ते तैड़ी अक मैन्हु थियो ज़ै बड़ो लम्मो थियो, ज़ै रापारी खानदाने मरां थियो, ते तैसेरे हथ्थन ते पव्वन शा-शा एंगलोई थी मतलब सैरी मिलेइतां 24 एंगलोई थी। 7 ज़ैखन तैनी इस्राएली ललकारे, तैखन दाऊदेरे ढ्ला शिमारे मट्ठे योनाताने तै मारो। 8 एन्ना गत नगरे मां रापारे खानदाने मरां थिये, ते तैना दाऊद ते तैसेरे सिपैहेईं मारे।