प्रकाशित 22

ज़िन्दगरे पैनेरो दरिया

1 फिरी तैने मीं बिल्‍लौरेरे ज़ेरो अक चमकतो ज़िन्दगरे पैनेरो दरिया हिराव, ज़ै परमेशरेरे ते गबड़ेरे तखते करां निस्तां तैस नगरेरी सड़की तगर मझ़ामेई निस्तो थियो। 2 ते दरियारे इस पासे ते उस पासे, ज़िन्दगरो बुट थियो, तैस मां 12 किसमां केरे फल लगते थिये, ते तै हर महीने फलतो थियो; ते तैस बुट्टेरे पट्लन सेइं कौमां-कौमां केरे लोक बेज़्झ़ोते थी। 3 फिरी तैड़ी लानत न भोल्ही ते परमेशर ते गबड़ेरो तखत तैस नगरे मां भोल्हो, ते तैसेरे दास तैसेरी सेवा केरेले। 4 ते तैना परमेशरेरे आमने सामने लाहेले, ते परमेशरेरू नवं तैन केरे कुपाए पुड़ लिखोरू भोल्हु। 5 ते फिरी रात न भोल्ही, ते तैन दीयो ते दिहाड़ेरी ज़रूरत न भोल्ही, किजोकि प्रभु-परमेशर तैन लौ देलो, ते तैना हमेशा राज़ केरेले।