1 ज़ैखन अपुल्‍लोस कुरिन्थुस नगरे मां थियो, त पौलुस बेइएं सारे इलाकन मेइं इफिसुस नगरे मां अव, तैसेरी तैड़ी होरे भी काई चेलन सेइं मुलाकात भोइ। 2 तैनी तैन पुछ़ू, "कुन विश्वास केरते बार तुसन पुड़ पवित्र आत्मा उतरोरी थी?" तैनेईं जुवाब दित्तो, "असेईं त पवित्र आत्मारे बारे मां शुनेरू भी नईं।" 3 तैखन पौलुसे ज़ोवं, "फिरी तुसेईं कोस किसमेरो बपतिस्मो नियो?" तैनेईं जुवाब दित्तो, "यूहन्नारो।" 4 पौलुसे ज़ोवं, "यूहन्ना त तैन लोकन बपतिस्मो दित्तो ज़ैनेईं पापन करां मन फिराव, ते यूहन्ना इस्राएली लोकन ज़ोवं, ज़ै मेरे बाद एजनेबालोए, तैस पुड़ विश्वास केरा, ज़ै मसीह आहे।" 5 एन शुन्तां तैनेईं प्रभु यीशु मसीहेरे नंव्वे सेइं बपतिस्मो नियो। 6 ते ज़ैखन पौलुसे तैन पुड़ हथ रख्खे त पवित्र आत्मा तैन पुड़ उतरी, त तैना अलग-अलग भाषा केरने लगे, ते भविष्यिवाणी केरने लगे। 7 एना सब लगभग 12 मैन्हु थिये।

8 फिरी पौलुस प्राथना घरे मां गेइतां ट्लेइ महीन्न तगर बड़े निडर भोइतां परमेशरेरे राज़्ज़ेरे बारे मां लोकन सेइं बेंस केरने समझ़ाने लाव। 9 पन तैन मरां किछ सकत दिलेरे भोइ जे, ते तैनेईं विश्वास केरनेरे बजाहे इन्कार कमाव, ते एस पंथेरे बारे मां बुरू ज़ोने लगे, एल्हेरेलेइ पौलुस तैन करां कनारे भोइ जेव, ते चेले भी कनारे किये ते तुरन्नुसेरे सुकुले मां बेंस केरतो ते तैन शिखालतो राव। 10 दूई सालन तगर एरू भोतू राव, एड़ी तगर कि आसिया इलाकेरे रानेबाले कुन यहूदी ते कुन यूनानी सेब्भेईं प्रभुएरू वचन शुनू।

11 ते परमेशर पौलुसेरे ज़िरिये सेइं बडां-बडां कम्मां ते चमत्कार हिरातो थियो। 12 एड़ी तगर कि पौलुस ज़ैस रूमाले सेइं या फटके सेइं हथ लातो थियो, त तैना बिमारन पुड़ छ़डते थिये, त तैना बिमार बेज़्झ़ोते थिये, ते अगर तैन पुड़ भूतां केरो सैयो भोतो थियो, त तैना लोक ठीक भोते थिये। 13 पन किछ यहूदी मड़द ज़ैना झ़ाड़-फक केरते थी, ते एन केरने लगे कि, ज़ैन पुड़ भूतां केरो सैयो भी भोए तैन पुड़ यीशुएरे नंव्वे इन ज़ोइतां झ़ाड़ फक देने लगे, "ज़ैस यीशुएरो प्रचार पौलुस केरते, अवं तैसेरी कसम देताईं।" 14 यहूदी प्रधान याजक ज़ेसेरू नवं स्क्‍किवा थियूं, तैसेरां सत मट्ठां थियां, तैना एन्ने कम्मां केरतां थियां। 15 ते भूते जुवाब दित्तो ते ज़ोवं, "अवं यीशु मसीह भी ज़ानताईं ते पौलुसे भी ज़ानताईं, पन तुस कौन आथ?" 16 तैखन तै मैन्हु ज़ैस पुड़ भूतेरो सैयो थियो, तैन्न यीशुएरे नंव्वे सेइं झ़ाड़-फक देनेबालन जो पेव, ते तैना अपने कब्ज़े मां केरतां एत्रे कुट्टे कि तैना ज़खमी भोइतां नग्गे तैट्ठां नश्शे। 17 ज़ैखन इफिसुस नगरेरे रानेबाले यहूदन ते यूनानी लोकन एस गल्‍लरो पतो लगो, त तैना डेरि जे, ते प्रभु यीशु मसीहेरी बडीयाई की। 18 ते ज़ैनेईं विश्वास कियोरो थियो, तैनेईं एइतां अपने-अपने बुरे कम्मां केरो इकरार सेब्भी केरे सामने कियो। 19 ते केही लोकेईं ज़ैना जैदू केरते थिये, तैना किताबां सैरेईं एन्हतां सेब्भी केरे सामने फुक्‍की, ते ज़ैखन तैन किताबां केरि कीमतरो हिसाब लाव त कोई 50000 चैंदरे सिकन करां जादे थी। 20 एन्च़रे प्रभुएरू वचन बड़े तकड़े च़ारे फैलतू जेव ते भारी राव।

21 एन गल्‍लां केरे बाद पौलुसे फैसलो कियो, कि अवं मकिदुनिया ते अखाया इलाकां केरे विश्वासी लोकन सेइं मिलतां यरूशलेम नगरे जो गेईं, ते ज़ोवं, "यरूशलेम नगरे मां गेइतां रोम नगरे मां गानू भी ज़रूरीए।" 22 एल्हेरेलेइ अपने सैथन मरां तीमुथियुस ते इरास्तुस दूई मैन्हु मकिदुनिया इलाके जो एप्पू करां पेइले भेज़े, ते एप्पू भी किछ च़िरे आसिया इलाके मां राव।

23 तैस वक्ते तैस पंथेरे बारे मां हंगामो भोव। 24 किजोकि अक चैंदरो कारीगिर थियो, तैसेरू नवं दिमेत्रियुस थियूं, ते अरतिमिस* देबरे मन्दरेरी मूरती बनेइतां, कारीगिरन बड़ू कम दुवेरू थियूं, ज़ैस सेइं तैन केरो बड़ो बुपार च़लोरो थियो। 25 तैनी एन कम ज़ान्ने बाले सारे कारीगिर अकोट्ठे कमाए ते ज़ोने लगो, "हे मेरे ढ्लाव असां इन कम केरतां बड़े पेइंसे कमातम। 26 पन तुस हेरतथ ते शुन्तन कि एना दूई मैन्हु पौलुसेरे ज़ेरे केन्च़रे इफिसुस नगरे ते लगभग सारे आसिया इलाकेरे नगरन मां लोकन टपलाने लगोरेन ते ज़ोतन कि ज़ै हथ्थेरां केरि कारीगिरीए, तै ईश्वर नईं। 27 डर एस गल्‍लरो नईं, सिर्फ कि इश्शे पैशेरी बदनामी भोल्ही, बल्के पुरानी देबी अरतिमिस, ज़ै आहे तैसारू मन्दर भी घटिया समझ़ू गालू, ज़ेसेरी पूज़ा सारे आसिया इलाके मां ते सारे दुनियाई मां केरतन, तैसेरी इज़्ज़त भी खतम भोइ गानिये।"

28 ज़ैखन तैन लोकेईं शुनू त तैना सरकी सेइं भेरोई जे, ते ज़ोरे-ज़ोरे नहरे देने लगे, "इफिसी केरि देबी अरतिमिस, महाने!" 29 हेरते-हेरते सारे नगरे मां हलचल मेच़ि जेई, लोकेईं गयुस ते अरिस्तर्खुस, मकिदुनी इलाके ज़ैना पौलुसे सेइं साथी एवरे थिये, तैना ट्लेइतां घसीटते तमाशो हेरनेरी ठैरी जो दौड़ते ने। 30 पौलुस भी सभाई मां गानू चातो थियो पन चेलेईं तै रोको। 31 ते आसिया इलाकेरे हाकिमन मरां भी तैसेरे काई दोस्तेईं तैस जो बिस्तार भेज़तां ते मिन्नत केरतां ज़ोवं, कि तमाशो हेरने न गेइयां किजोकि तैड़ी बड़ो खतरोए। 32 तैड़ी पैन्चयती मां खलबली मच़ोरी थी, किजोकि किछ लोक नहरे देते थिये, ते बड़े लोकन पतो न थियो कि तैना तैड़ी किजो अकोट्ठे भोवरेन। 33 तैखन तैनेईं सिकन्दर, ज़ै यहूदी लोकेईं खड़ो कियोरो थियो, भीड़ी मरां किछ लोकेईं तै अग्रोवं कियो, ते सिकन्दर हथ्थे सेइं इशारो केरतां लोकां केरे सामने जुवाब देनो चातो थियो। 34 पन ज़ेरो लोकन पतो लगो कि ऐह यहूदीए, त सब ज़ोरे-ज़ोरे लगभग दूई घंटन तगर चिन्डां मारने लग्गे, "इफिसुस नगरेरे देबी अरतिमिस, महाने।" 35 तैखन अक मंत्री नगरेरे लोकन च़ुप करेइतां ज़ोने लगो, "कि इफिसुस नगरेरे रानेबालो कौन न ज़ांने कि इफिसुसी लोकां केरू नगर महान अरतिमिस देबरू मन्दरे, ते एसेरे मूरतरो बड्डो रखवालोए, ज़ै अम्बरेरां बिछ़ड़ोरी थी। 36 ज़ैखन एना गल्‍लां केरे खलाफ केन्चे किछ न ज़ोवं त ठीक थियूं कि तुस च़ुप राथ ते बगैर सोच सेमझ़तां किछ न केरेथ। 37 तुसेईं ज़ैना मैन्हु इड़ी आनोरेन तैनेईं न मन्दर लुटेरूए न इश्शी देबरे खलाफ तुहीन कियोरीए। 38 अगर दिमेत्रियुस ते एसेरे कारीगिरन केन्ची पुड़ दाओ केरनोए त आदालतरू दार खुल्‍लूए, ते हाकिम भी आन, ज़ैड़ी तुस एक्‍की होरि पुड़ दाओ केरि सकतथ। 39 पन अगर तुस होरि कोन्ची चीज़रे बारे मां पुछ़नू चातथ त तैसेरो फैसलो भी पंचाइती मां कियो गालो।" 40 मीं इस गल्‍लरो डरे कि अगर हाकिम इस हंगामेरे बारे मां शुनेलो त ज़ोलो कि अस रोमी सराकारारी खलाफवर्ज़ी केरनेरी कोशिश केरने लगोरेम, ते अस एत्रे लोकां केरे अकोट्ठे भोनेरो कुन जुवाब देमेले। 41 एन ज़ोनेरां बाद तैनी पैन्चैयत खतम कमाई।