Atos 2

पतरसेरू भाषण

14 तैखन पतरस 11 प्रेरितन सेइं साथी खड़ो भोव, ते बड़े ज़ोरे सेइं ज़ोने लगो, "हे लोकव, हे यहूदियारे रानेबालव ते हे यरूशलेम नगरेरे राने बालाव, मेरी गल ध्याने सेइं शुना, अवं तुसन ज़ोताईं इड़ी एन कुन भोने लगोरूए। 15 ज़ैन तुस बुझ़ने लगोरेथ तैन नईं, एना मैन्हु नशे मां नईं, किजोकि हुन्ना त झ़ेझ़ेरे नौ बज़ोरेन, 16 बल्के ऐह तै गल्‍ले, ज़ै परमेशरे योएल नेबेरे ज़िरिये ज़ोवरी थी,

17 परमेशर ज़ोते कि, आखरी दिहैड़न मां एरू भोल्हु,

अवं अपनि आत्मा सेब्भी लोकन देइलो,

ते तुश्शां मट्ठां कुइयां भविष्यिवाणी केरेलां,

ते तुश्शे नौजुवान दर्शन हेरेले,

ते बुढे सुपना हेरेले।

18 बल्के अवं तैन दिहैड़न मां अपने सेवादार मड़दन ते सेवादार कुआन्शन पुड़

अपनि आत्मा उतरेलो, ते तैना भविष्यिवाणी केरेले।

19 अवं अम्बरे मां बड्डां-बड्डां कम्मां

ते ज़मीनी पुड़ निशान,

यानी अग, खून ते काले तूएरी बिदलार हिरेइलो।

20 प्रभुएरी दिहाड़ी एजने करां पेइले,

दिहाड़ो आंधरो भोइ गानोए,

ते चाँदनी खूनेरी ज़ेरि भोनीए,

तै अक महान ते खास दिहाड़ी भोनीए।

21 ते ज़ै कोई परमेशरेरू नवं घिन्नेलो तैस मुक्ति मैल्हेली।

22 "हे इस्राएलेरे लोकव, इना गल्‍लां शुना, यीशु नासरत नगरेरो अक मैन्हु थियो, ज़ै परमेशर तुश्शे लेई भेज़ोरो थियो, ते एस गल्‍लरी तसदीक तैसेरे खास चमत्कारां केरे सबूतेईं सेइं भोचे, ज़ैना परमेशरे तैसेरे ज़िरिये सेइं इश्शे सामने हिरां, ज़ेन्च़रे कि तुस एप्पू भी ज़ानतथ। 23 ज़ैखन तै परमेशरेरे इंतज़ामेरे पूरे मौके पुड़ ज्ञानेरे हिसाबे सेइं ट्लुवाव, ते तुसेईं तै अधर्मी लोकां केरे हथ्थे क्रूसे पुड़ टंगेइतां माराव। 24 पन परमेशरे तै मौतरे सकेंजे मरां छुटेइतां ज़ींतो कियो, किजोकि एन भोइ न थियूं सकतु, कि तै मौतरे कब्ज़े मां राए। 25 किजोकि दाऊद मसीहेरे बारे मां एन ज़ोते,

हेरा, प्रभु हर वक्त मेरे सामने,

अवं तैन लोकन करां न डरेलो ज़ैना मेरो नुकसान चातन।

26 तांए मेरो दिल बड़ो खुश भोव, ते अवं खुशी सेइं ज़ोइलो,

बल्के मेरी जान उमीदी सेइं ज़ीएली।

27 किजोकि तू मेरे प्राणन पाताले मां राने न देलो,

ते न अपने पवित्र मैन्हु शड़ने देलो!

28 तीं मीं ज़िन्दगरी बत हिरेवरीए,

तू अपने हज़ूरी सेइं मीं भरपूर केरेलो।"

29 "हे मेरे ढ्लाव, अवं कौमरे बुज़ुर्ग दाऊदेरे बारे मां तुसन सेइं साफ-साफ ज़ोई सकताईं, कि तै मेरि भी जेव, ते दब्बो भी ते तैसेरी कब्र अज़ तगर इश्शे सामने मौजूद। 30 तै नबी थियो, ते तै ज़ानतो थियो, कि परमेशरे तैस सेइं वाधो कियोरो थियो, ‘अवं तेरी खानदेंनी मरां अक मैन्हु तैसेरे तखते पुड़ बिशैलेलो।’ 31 तैनी पेइले भोने बैली गल्‍लां ते मसीहेरे मुड़दन मरां ज़ींते भोनेरे बारे मां बियान कियेरू थियूं,

कि न तै पाताले मां राने देलो, ते न अपने पवित्र मैन्हु शड़ने देलो!

32 "एहे यीशु परमेशरे ज़ींतो कियो ज़ेसेरे अस सब गवाह आम। 33 ते हुना तै सुर्गे मां खास ठैरी यानी परमेशरेरे देइने पासे आहे। ते तैने बाजी परमेशरे करां पवित्र आत्मा हासिल की, ज़ेसेरो तैने वाधो कियोरो थियो, यीशुए असन पवित्र आत्मा भरपूरी सेइं दित्तोरीए, ज़ैन तुस लहतथ ते शुन्तथ। 34 किजोकि दाऊद त एप्पू सुर्गे मां नईं जेवरो, पन फिर भी तै एप्पू ज़ोते,

प्रभु परमेशरे मेरे प्रभु सेइं ज़ोवं, मीं सेइं साथी राज़ केर।

35 ज़ांतगर अवं तेरे दुश्मन तेरे अधीन न केरि।

36 "एल्हेरेलेइ, इस्राएलेरे सारे लोकन पतो लग्गे, कि परमेशरे, यीशु ज़ै तुसेईं क्रूसे पुड़ च़ाढ़ो तै प्रभु भी कियो ते मसीह भी कियो।" 37 एना गल्‍लां शुन्तां तैन बड़ो एसास भोव कि तैना पापिन, तैखन तैनेईं पतरसे ते होरि प्रेरितन सेइं ज़ोवं, "हे ढ्लाव अस कुन केरम?" 38 पतरसे तैन सेइं ज़ोवं, "पापन करां मन फिराथ ते तुसन मरां सारे यीशु मसीहेरे नंव्वे सेइं बपतिस्मो घिन्ना, त परमेशर तुसन माफ़ केरेलो ते पवित्र आत्मा तुसन इनामे मां मैल्हेली। 39 एल्हेरेलेइ कि ऐह वाधो तुसन त तुश्शी औलादी सेइं आहे ते तैन सेब्भन सेइं ज़ैना दूर-दूर रातन, ते ज़ैन इश्शो प्रभु परमेशरे एप्पू कां कुजाते।" 40 पतरसे होरि भी बेड़ि गल्‍लां केरि गवाही दित्ती, ते तैन बार-बार ज़ोवं, कि अपनो आप एस टैरी कौमी करां बच़ाथ। 41 ते तैनेईं तैसेरी गल्‍लां कबूल की, तैनी तैन बपतिस्मो दित्तो, तैस दिहैड़ी लगभग कोई 3000 मैन्हु तैन मां शामल भोए।