1 तैखन इसहाके याकूब एप्पु कां कुजेइतां तैस बरकत दित्ती, ते तैस हुक्म दित्तो, "तू कोन्ची कनानी कुइये सेइं ड्लाह न बनेइयां। 2 पद्दनरामे मां गेइतां अपने नाने बतूएलेरे घरे गा ते तैट्ठां अपने ममे लाबानेरी अक कुई ड्लेइतां ऐन्हां। 3 सर्वशक्तिमान परमेशर तीं बरकत दे, ते तीं कामयाब केरेलो, ते तेरे घरानेरी तैधात एत्री बधालो कि अक बड्डी कौम खड़ी भोए। 4 तै तेरी औलादी अब्राहमेरी ज़ेरि बरकत दे, ताके ज़ैस मुल्खे मां तू इस मौके परदेशी केरो ज़ेरो रहतस ते ज़ै परमेशरे अब्राहमे दित्तोरो थियो, तू अपने कब्ज़े मां केरस।" 5 तैखन इसहाके याकूब तैट्ठां भेज़ो, ते तै पद्दनराम अरामी बतूएलेरे मट्ठे लाबान कांजो च़लो जेव, ज़ै एसाव ते याकूबेरी अम्मा रिबकारो ढ्ला थियो।

6 ज़ैखन एसावे ऐह पतो लग्गो कि इसहाके याकूबे बरकत देइतां पद्दनरामे जो भेज़ोरोए, कि तैट्ठां कौन्श ड्लेइतां आने, ते एन भी कि इसहाके तैस बरकत देंते बार हुक्म दित्तोरो थियो कि, "तू कोन्ची कनानी कुइये सेइं ड्लाह न बनेइयां।" 7 ते याकूब अपने अम्मा बाजी केरे हुक्मेरे मुताबिक पद्दनरामे मांजो च़लो जेव। 8 एन सब किछ हेरतां तैखन एसावे ई एसास भोव कि मेरे बाजी इसहाके कनानी कुइयां केत्री बुरी लेगतिन। 9 एल्हेरेलेइ तै इश्माएले कां जेव ते इश्माएलेरि कुई महलत पेइली कौन्श ड्लाही, ज़ै नबायोतेरी बेइन ते अब्राहमेरे मट्ठे इश्माएलेरि कुई थी।

10 याकूब बेर्शेबारां निस्तां हारानेरे पासे जो च़लो। 11 ज़ैखन तै तैस ठारी पुड़ पुज़्ज़ो, त रात कटनेरे लेई तै तैड़ी रुकी जेव, किजोकि दिहाड़ो डुबी जेवरो थियो, तैनी तैट्ठेरे घोड़न मरां अक घोड़ एन्हतां अपने शिरेइंते रख्खो, ते झ़ुलनेरे लेई तै तैड़ी लेटी जेव। 12 तैखन तैनी तैड़ी अक सुपनु लावं, कि अक पवड़ी तल्‍ले मरां खड़ीए ते तैसारी च़ोट अम्बरे तगर पुज़ोरीए, ते परमेशरेरे स्वर्गदूत तैस पुड़मेइं किछ उबरे गातन ते किछ उन्ढे एइतन। 13 ते यहोवा परमेशर पेवड़ी पुड़* खड़ो थियो, ते एन ज़ोई राहोरो थियो, "कि अवं तेरे दादे अब्राहमेरो ते इसहाकेरो यहोवा परमेशर आईं अवं ऐह ज़मीन ज़ैस पुड़ तू झ़ुलोरोस तीं ते तेरे खानदाने देइलो। 14 तेरी औलाद रेतरी ज़ेरी एत्री जादे भोइ गाली कि, तै च़ेवरे पासन पश्चिम, पूरब, उत्तर, दक्षिणे मां फैलती गाली, ते तेरे खानदानेरे ज़िरिये सेइं ज़मीनरी सैरी कौमन बरकत मैल्हेली। 15 ते एन शुन, कि अवं तीं सेइं साथी भोल्हो, ते ज़ैड़ी कोन्च तू गालो, तैड़ी तेरी हिफाज़त केरेलो, ते अवं तीं इस मुल्खे मां वापस आनेलो, ते ज़ै वाधो मीं तीं सेइं कियोरोए तैस पूरे केरने तगर अवं तीं अकैल्‍ले न छ़डेलो।" 16 ज़ैखन याकूब निड्लारां बींझ़ो त तै एन लगो सोचने कि, "चाए ज़ैन किछ भी आहे, पन इस ठारी यहोवा ज़रूरे, पन मीं एल्हेरो कोई पतो न थियो।" 17 ते तै डेरि जेव, ते एन ज़ोने लगो, "कि ई ठार केत्री महिमाई सेइं भेरतांए, ई ठार यहोवा परमेशरेरे घरेरे अलावा होरि कौ भोइ सखचे? इन त सुर्गेरू फाटके।"

18 होरसां झ़ेझ़ां याकूबे तै घोड़ ज़ै तैनी अपने शिरेइंते रखोरो थियो खम्भेरो ज़ेरो खड़ो कियो, ते तैस उन्ढो तेल छ़डो। 19 एल्हेरेलेइ याकूबे तैस ठारारू नवं बेतेल* रख्खू, हांलाकि पेइले तैस नगरेरू नवं लूज थियूं। 20 तैखन याकूबे ऐह मन्नत मन्नी कि, "अगर यहोवा परमेशर इस सफरे मां मीं सेइं साथी राए ते मेरी हिफाज़त केरे ते मीं खानेरे लेई रोट्टी ते लानेरे लेई लिगड़ां दे। 21 ते अवं अपने बाजी केरे घरे सुखे सेइं पुज़्ज़ी गेईं, त यहोवा मेरो परमेशर भोल्हो। 22 ते ई घोड़, ज़ै मीं खम्भेरो ज़ेरो खड़ो कियोरोए, परमेशरेरू भवन भोल्हु, ते हे यहोवा, ज़ैन किछ तू मीं देलो, अवं तैसेरो दशोवं हिस्सो तींजो देइलो।"