1 तैस मौके यहोशूए रूबेनी लोकन, ते गादी लोकन, ते मनश्शेरे अध्धे गोट्लेरे लोकन कुजेइतां ज़ोवं, 2 "ज़ै-ज़ै हुक्म यहोवारे दास मूसे तुसन दित्तोरो थियो, तैना सारे हुक्म तुसेईं मन्ने, ते ज़ैना-ज़ैना हुक्म मीं तुसन दित्तोरेन तैना सब तुस मन्ना;✝22:2 गिन. 32:28-32;व्यव. 3:18-20. 3 तुसेईं अपने ढ्ला एत्रे दिहाड़न मां अज़्ज़ेरे दिहाड़े तगर न छ़डे, पन अपने परमेशर यहोवारो हुक्म तुसेईं ध्याने सेइं मन्नोरोए। 4 ते हुनी तुश्शे परमेशर यहोवाए तुश्शे ढ्ला बेइन्न अपने वाधेरे मुताबिक आराम दित्तोरोए; एल्हेरेलेइ हुनी तुस वापस एइतां अपने-अपने डेरन जो, ते अपनि-अपनि ज़मीनी मां, ज़ै यहोवारे दास मूसे यरदन दरियाएरे पार तुसन दित्तोरीए च़ले गाथ।✝22:4 इब्रा. 4:8. 5 सिर्फ एस गल्‍लरी पूरी एहतियात केरनी कि ज़ैना-ज़ैना हुक्म ते कानून परमेशर यहोवारे दासे मूसे तुसन दित्तोरेन तैना मेनतां अपने परमेशर यहोवा सेइं प्यार केरा, तैसेरे बत्ती पुड़ च़ला, तैसेरे हुक्म मन्ना, तैसेरी सेवाई मां लगोरे राथ, ते अपने सारे मन ते सारे प्राणे सेइं तैसेरी सेवा केरा।" 6 तैखन यहोशूए तैना आशिर्वाद देइतां भेज़े; ते तैना यरदन दरियारे पूरबेरे पासे अपने-अपने डेरे जो च़ले जे।

7 मनश्शेरे अध्धे गोट्ले मूसे बाशान प्रादेशे मां हिस्सो दित्तोरो थियो; पन होरे अध्धे गोट्ले यहोशूए तैन केरे ढ्ला बेइनां केरे मझ़ाटे यरदन दरियारे पश्चिमेरे पासे हिस्सो दित्तो। तैना ज़ैखन यहोशूए भेज़े कि अपने-अपने डेरे जो गाथ, 8 तैखन तैन जो भी आशिर्वाद देइतां ज़ोवं, "बड़े जानबर, ते चाँदी, सोन्नू, पितल, लोंह, ते बड़ां लिगड़ां ते बड़ी धन-दौलत एन्हतां अपने-अपने डेरे जो वापस एज्जा; ते अपने दुश्मना केरि लूटारी जाईदात अपने ढ्लान बेइन्न बन्टां।"✝22:8 गिन. 31:27;1 शमू. 30:21-25.

9 तैखन रूबेनी, गादी, ते मनश्शेरे अध्धे गोट्लेरे लोकेईं इस्राएली लोकन करां, मतलब कनान मुल्खेरे शीलो नगरे मरां, अपने गिलाद नंव्वेरी एपनी ज़मीनी मां, ज़ै मूसेरे ज़िरिये दित्ती जेई, यहोवारे हुक्मेरे मुताबिक तैन केरि अपनि ज़मीन भोइ जेई, गानेरे इरादे सेइं वापस जे।

10 ते ज़ैखन रूबेनी, गादी ते मनश्शेरे अध्धे गोट्लेरे लोक यरदन दरियाएरे तैस वैदी मां पुज़्ज़े ज़ै कनान मुल्खे मांए, तैखन तैनेईं तैड़ी हेरनेरे काबल अक बड़ी वेदी बनाई। 11 ते एसेरी खबर इस्राएली लोकां केरे शुन्ने मां अई, कि रूबेनी लोकेईं, गादी लोकेईं, ते मनश्शेरे अध्धे गोट्लेरे लोकेईं कनान मुल्खेरे सामने यरदन दरियारे वैदी मां, मतलब तैसेरे उस पार ज़ैन इस्राएली लोकां केरू आहे, अक वेदी बनेवरीए। 12 ज़ैखन इस्राएली लोकेईं एन शुनू, तैखन इस्राएली लोकां केरि सारी मण्डली तैन सेइं लड़नेरे लेई शीलो नगरे मां अकोट्ठी भोइ।

13 तैखन इस्राएली लोकेईं रूबेनी लोक, गादी लोक, ते मनश्शेरे अध्धे गोट्लेरे लोक गिलाद प्रादेशे मां एलीआजर याजकेरू मट्ठू पीनहास, 14 ते तैस सेइं साथी दश प्रधान, मतलब इस्राएली लोकां केरे एक्‍की-एक्‍की गोट्ले मरां बुज़ुर्गां केरे घरानेरो अक-अक प्रधान भेज़ो, ते तैना इस्राएली लोकां केरे हज़ारन मां अपने-अपने बुज़ुर्गां केरे घराना केरे खास मैन्हु थिये। 15 ते तैना गिलाद प्रदेशे मां रूबेनी लोकन, गादी लोकन, ते मनश्शेरे अध्धे गोट्लेरे लोकन नेड़े गेइतां ज़ोने लगे, 16 "यहोवारी सारी मण्डली इन ज़ोतीए कि ‘तुसेईं इस्राएलेरे परमेशर यहोवा सेइं ई केरहो धोखो कियोरोए; अज़ ज़ै तुसेईं अक वेदी बनेवरीए, एसमां तुसेईं तैसेरे पत्ती च़लनू छ़ेडतां तैसेरे खलाफ अज़ बगावत कियोरीए? 17 शुना, पोर पहाड़े पुड़ कियोरो पाप किछ घट थियो, एसेरे अलावा यहोवारी मेण्डली भारी सज़ाह मैल्ही फिरी भी अज़्ज़ेरे दिहाड़े तगर अस तैस अधर्मे करां शुद्ध नईं भोवरे, कुन तै तुश्शी नज़री मां अक निकड़ी गल्‍ले,✝22:17 गिन. 25:1-9. 18 कि अज़ तुस यहोवाए छ़ेडतां तैस पत्ती च़लनू छ़ेडी देतथ? कुन तुस यहोवा करां फिरी दूर भोतथ, ते तै कालां फिरी इस्राएली लोकन पुड़ क्रोधे भोल्हो। 19 पन अगर तुश्शी अपनि ज़मीन अशुद्ध भोए, त पार एइतां यहोवारी एपनी ज़मीनी मां, ज़ैड़ी यहोवारी रानेरी ठारे, इश्शे लोकां केरे मझ़ाटे अपनि-अपनि खास ज़मीन नेथ; पन इश्शे परमेशर यहोवारी वेदरे अलावा होरी कोई वेदी बनेइतां यहोवारी बगावत केरथ, ते न असन सेइं। 20 हेरा, ज़ैखन जेरहेरे मट्ठे आकाने अर्पण कियोरी चीज़ां केरे बारे मां धोखो कियोरो थियो, कुन तैखन यहोवारी सरक इस्राएली लोकां केरि पूरी मेण्डली पुड़ न भड़की?*22:20 इस्राएली लोकां केरि पूरी मेण्डली पुड़ न भड़की? पढ़नेरे लेई, यहोशू 7:1-26 ते तैस मड़दे अधर्मेरी सज़ाह अकैल्‍ले तैस न मैल्ही।’"

21 तैखन रूबेनी लोकेईं, गादी लोकेईं, ते मनश्शेरे अध्धे गोट्लेरे लोकेईं इस्राएलेरे हज़ारां केरे प्रधान मैन्हन ई जुवाब दित्तो, 22 "यहोवा ज़ै ईश्वरां केरो परमेशरे, ईश्वरां केरो परमेशर यहोवा एस ज़ानते, ते इस्राएली लोक भी एस ज़ानेले, कि अगर यहोवा करां मुड़तां या तैस सेइं धोखो केरतां असेईं इन कम कियोरू भोल्हु, त तू अज़ असन ज़ींते न छ़ेडां, 23 अगर अज़्ज़ेरे दिहाड़े असेईं वेदी एल्हेरेलेइ बनेवरी भोए कि यहोवा पत्ती च़लनू छ़ेडी देम, या एल्हेरेलेइ कि तैस पुड़ होमबलि, अन्नबलि, मेलबलि च़ढ़नेरे लेई ऐह वेदी असेईं अपने लेई बनेवरी भोए, त यहोवा एप्पु इसेरो हिसाब घिन्ने; 24 पन असेईं एस खियाले सेइं ते इरादे सेइं एन कियोरूए कि कोन्च एजने बाले मौके तुश्शी औलाद इश्शी औलादी सेइं एन न ज़ोए, ‘तुसन इस्राएलेरे परमेशर यहोवा सेइं कुन कम्मे? 25 किजोकि, हे रूबेनी लोकव, हे गादी लोकव, यहोवाए ज़ै इश्शे ते तुश्शे मझ़ाटे यरदन दरियाएरी हद बन्धी कियोरीए, एल्हेरेलेइ यहोवा मां तुश्शो कोई हिस्सो नईं।’ एरू ज़ोइतां तुश्शी औलाद इश्शी औलादी मरां यहोवारो डर छुटेई देली। 26 एल्हेरेलेइ असेईं ज़ोवं, ‘एज्जा, अस अपने लेई अक वेदी बनाम, तै होमबलि या मेलबलि देनेरे लेई नईं, 27 पन एल्हेरेलेइ कि इश्शे ते तुश्शे, ते इश्शे बाद ते तुश्शे खानदानेरे मझ़ाटे गवाहीयरू कम दे; एल्हेरेलेइ कि अस होमबलि, मेलबलि, ते बलिदान च़ेढ़तां यहोवारे सामने तैसेरी आराधना केरम; ते एजने बाले वक्ते तुश्शी औलाद इश्शी औलादी सेइं इन न ज़ोए, कि यहोवा मां तुश्शो कोई हिस्सो नईं।’ 28 एल्हेरेलेइ असेईं ज़ोवं, ‘ज़ैखन तैना लोक एजने बाले वक्ते असन सेइं या इश्शे खानदाने सेइं एन ज़ोन, तैखन अस तैन सेइं ज़ोमेले, कि यहोवारी इस वेदरी ज़ेरि बनोरी ई वेदी हेरा, ज़ै इश्शे बुज़ुर्गेईं होमबलि या मेलबलि देनेरे लेई नईं बनेवरीए; पन एल्हेरेलेइ बनेवरी थी कि इश्शे ते तुश्शे दरमियान गवाहीयरू कम दे।’ 29 इन असन करां दूर राए कि यहोवा करां दूर भोइतां अज़ तैस पत्ती च़लनू शारम, ते अपने परमेशर यहोवारी तैस वेदी छ़ेडतां ज़ै तैसेरे रानेरी ठारारे सामने होमबलि, ते अन्नबलि, या मेलबलि देनेरे लेई होरि वेदी बनाम।"

30 रूबेनी लोकेईं, गादी लोकेईं, ते मनश्शेरे अध्धे गोट्लेरे लोकेईं एना गल्‍लां शुन्तां पीनहास याजक ते तैस सेइं साथी मेण्डलरे प्रधान, ज़ैना इस्राएलेरे हज़ारां केरे खास मैन्हु थिये, तैना बड़े खुशी भोए। 31 ते एलीआजर याजकेरे मट्ठे पीनहासे रूबेनी लोकन, गादी लोकन, ते मनश्शेई लोकन सेइं ज़ोवं, "तुसेईं ज़ै यहोवारो एरहो धोखो नईं कियोरो, एस सेइं अज़ असेईं एन बुझ़ू कि यहोवा इश्शे दरमियाने मांए: ते तुसेईं लोकेईं इस्राएली लोक यहोवारे हथ्थेरां बच़ावरेन।" 32 तैखन एलीआजर याजकेरू मट्ठू पीनहास प्रधान्न समेत रूबेनी लोकन ते गादी लोकन करां गिलाद मुल्खे मांमेइं निस्तां कनान मुल्खे मरां इस्राएली लोकन कां वापस जेवं: ते ई बिस्तार तैन सेइं ज़ोइतां शुनावं। 33 तैखन इस्राएली लोक खुश भोए; ते परमेशरेरी तारीफ़ की, ते रूबेनी लोकन ते गादी लोकन सेइं लड़ने ते तैन केरे रानेरो मुल्ख उज़ाड़नेरे लेई चढ़ाई केरनेरी चर्चा फिरी न की। 34 ते रूबेनी लोकेईं ते गादी लोकेईं एन ज़ोइतां, "ई वेदी इश्शे ते तैन केरे मझ़ाटे एस गल्‍लरी शहादत राहोरीए, कि यहोवा ही परमेशरे;" ते तैस वेदरू नवं एद*22:34 एद ज़ेसेरो मतलब सबूते रख्खू।