1 फिरी यहोशूए इस्राएलेरे सारे गोट्ल शेकेम नगरे मां अकोट्ठे किये, ते इस्राएलेरे बुज़ुर्ग मैन्हु, ते प्रधान मैन्हु, ते न्याय केरनेबाले, ते सरदार कुजाए; ते तैना परमेशरेरे सामने हाज़र भोए। 2 तैखन यहोशूए तैन सेभी लोकन सेइं ज़ोवं, "इस्राएलेरो परमेशर यहोवा एन्च़रां सेइं ज़ोते, कि ‘पुराने ज़माने मां अब्राहम ते नाहोरेरो बाजी तेरह वगेरा, तुश्शे दादे पड़दादे फरात दरियाएरे उस पार रहंते होरी देबतां केरि आराधना केरते थिये। 3 ते मीं तुश्शे पूर्वज मैन्हु अब्राहमे फरात दरियारे तैस पारेरां एन्हतां कनान मुल्खेरी सैरी जगान मां फिराव, ते तैस इसहाक दित्तो; 4 फिरी मीं इसहाके याकूब ते एसाव दित्ते। ते फिरी मीं एसावे सेईर नंव्वेरो पहाड़ी मुल्ख दित्तो कि तै तैसेरो मालिक भोए, पन याकूब अपने खानदाने समेत मिस्र मुल्खे जो जेव। 5 ते फिरी बादे मां मीं मूसो ते हारून भेज़तां तैना सेभी कम्मां केरे ज़िरिये ज़ैन मीं मिस्र मुल्खे मां कियूं ते तैसेरां बाद तुस मीं केढतां आने। 6 ते मीं तुश्शे दादे पड़दादे मिस्र मुल्खे मरां केढतां आने, ते तुस समुन्दरे कां पुज़्ज़े; ते मिस्री लोकेईं रथ ते सुवारन सेइं साथी लाल समुन्दरे तगर तुश्शो पीछो कियो। 7 ते ज़ैखन तुसेईं यहोवा कां बिनती की तैखन तैनी तुश्शे पासेरां मिस्री लोकां केरे मझ़ाटे आंधरू कियूं, ते तैन पुड़ समुन्दर बगेइतां तैना डोबी छ़डे; ते ज़ैन किछ मीं मिस्र मुल्खे मां कियूं तैन तुसेईं एपनी एछ़्छ़ेईं सेइं हेरू; फिरी तुस बड़े दिहाड़न तगर सुनसान ठैरी मां राए। 8 तैखन मीं तुस तैन एमोरी लोकां केरे मुल्खे मां आने, ज़ैना यरदन दरियाएरे तैस पार बस्सोरे थिये; ते तैना तुसन सेइं लड़ोरे थिये, ते तैना मीं तुश्शे हथ्थे मां किये, ते तुस तैन केरे मुल्खेरे अधिकारी भोइ जे, ते मीं तैन केरो तुश्शे सामने सत्यानाश कियो। 9 ते फिरी मोआबेरो राज़ो सिप्पोरेरू मट्ठू बालाक उठतां इस्राएली लोकन सेइं लड़ो; ते तुसन लानत देनेरे लेई बोरेरू मट्ठू बिलाम कुजेइतां आनो, 10 पन मीं बिलामेरी बिनती न शुनी; ते तै तुसन बरकते-बरकत देंतो जेव; एन्च़रां सेइं मीं तुस तैसेरे हथ्थे करां बच़ाए। 11 तैखन तुस यरदन दरियाए पार यरीहो नगरे मां आए, ते ज़ैखन यरीहोएरे लोक, ते एमोरी, परिज्जी, कनानी, हित्ती, गिर्गाशी, हिब्बी, ते यबूसी लोक तुसन सेइं लड़े, तैखन मीएं तैना तुश्शे कब्ज़े मां किये। 12 ते मीं तुसन करां अग्री बड़ो डर* भेज़ो, ते तैनेईं एमोरी लोकां केरे दूईये राज़े तुश्शे सामनेरां केढतां छ़डे; हेरा, एन तुश्शी तलवार या धनुषेरू कम नईं भोवरू। 13 फिरी मीं तुसन एरहो मुल्ख दित्तो ज़ैस मां तुसेईं मेहनत न थी कियोरी, ते एरे नगर भी दित्ते ज़ैना तुसेईं न थिये बसेवरे, ते तुस तैन मां बस्सोरेथ; ते ज़ैना दाछ़ ते ज़ैतूनेरी बागां केरे फल तुस खातथ तैना तुसेईं न थी लेवरी।’

14 "यहोशूए लोकन सेइं ज़ोवं, हुनी यहोवारो डर मेनतां तैसेरी सेवा साफ नीती ते सच़्च़ाई सेइं केरा; ते ज़ैन देबतां केरि सेवा तुश्शे बुज़ुर्ग फरात दरियाएरे तैस पार ते मिस्र मुल्खे मां केरते थिये, तैन दूर केरतां यहोवारी सेवा केरा। 15 ते अगर यहोवारी सेवा केरनी तुसन बुरी लगे, त अज़ तुस च़ुना कि तुस केसेरी सेवा केरेले चाहे तैन देबतां केरि ज़ैन केरि सेवा तुश्शे बुज़ुर्ग बड्डे समुन्दरेरे तैस पार केरते थिये, ते चाहे एमोरी लोकां केरे देबतां केरि सेवा केरा ज़ैन केरे मुल्खे मां तुस रहतथ; पन अवं त अपने घराने समेत यहोवारी सेवा केरेलो।"

16 तैखन लोकेईं जुवाब दित्तो, "यहोवारी सेवा छ़ेडतां होरि देबतां केरि सेवा केरनी असन करां दूर राए; 17 किजोकि इश्शो परमेशर यहोवा तैए ज़ैनी असां ते इश्शे दादे पड़दादे गुलैमरे घरे मरां, मतलब मिस्र मुल्खे मरां केढतां आनोरेम, ते इश्शे सामने बडे-बडे चमत्कार किये, ते ज़ैस बत्ती पुड़ ते ज़ेत्री कौमन मांमेइं अस च़ेलतां निसोरे थिये तैन मां इश्शी हिफाज़त की; 18 ते इश्शे सामनेरां एस मुल्खे मां रानेबाले एमोरी वगेरा सैरी कौमां केढी; एल्हेरेलेइ अस भी यहोवा परमेशरेरी सेवा केरमेले, किजोकि इश्शो परमेशर तैए।"✝

19 यहोशूए लोकन सेइं ज़ोवं, "तुसन करां यहोवारी सेवा न भोइसखे; किजोकि तै पवित्र परमेशरे; तै जलन रखनेबालो परमेशरे; तै तुश्शे गेलती ते पाप माफ़ न केरेलो। 20 अगर तुस यहोवा छ़ेडतां बखले देबतां केरि सेवा केरेले, त अगर चाहे तै तुश्शू भलू केरतो एवरोए तांभी तै मुड़तां तुश्शो नुकसान केरेलो ते तुश्शो अन्त भी केरि छ़डेलो।" 21 लोकेईं यहोशू सेइं ज़ोवं, "नईं; अस यहोवारी सेवा केरमेले।" 22 यहोशूए लोकन सेइं ज़ोवं, "तुस एप्पु अपने गवाहथ कि तुसेईं एप्पु यहोवारी सेवा केरनी च़ुनोरीए।" तैनेईं ज़ोवं, "हाँ, अस गवाह अहम।" 23 यहोशूए ज़ोवं, "अपने दरमियाने मरां होरे बखले देबतां केरि मूरती दूर केरतां अपनो-अपनो मन इस्राएलेरे परमेशर यहोवारे पासे लाथ।" 24 लोकेईं यहोशू सेइं ज़ोवं, "अस त अपने परमेशर यहोवारी सेवा केरमेले, ते तैसेरी गल्‍लां मनमेले।" 25 तैखन यहोशूए तैस्से दिहाड़े तैन लोकन सेइं करार कियो; ते शेकेम नगरे मां तैन केरे लेई विधि ते नियम ठहराए।

26 ऐह सारो बिस्तार यहोशूए परमेशरेरे कानूनेरे किताबी मां लिखतां छ़डो; ते अक बड्डो घोड़ तैड़ी तैस बंज़ेरे बुट्टे हैठ खड़ो कियो, ज़ै यहोवारे पवित्र ठारी मां थियो। 27 तैखन यहोशूए सैरी लोकन सेइं ज़ोवं, "शुना, ई घोड़ असन लोकन कां गवाह रालो, किजोकि ज़ेत्रे वचन यहोवा असन सेइं ज़ोवरेन तैना एनी शुनोरेन; एल्हेरेलेइ ई तुश्शो गवाह रालो, एरू न भोए कि तुस अपने परमेशरेरो इन्कार केरथ।" 28 तैखन यहोशूए लोक अपने-अपने हिस्सन पुड़ गानेरे लेई भेज़े।

29 यहोशूएरे लोकन सेइं इन गल्‍लां ज़ोनेरे किछ दिहाड़ना बाद यहोवारो दास, नूनेरू मट्ठू यहोशू, 110 सालां केरो भोइतां मेरि जेवं। 30 ते तैस तिम्नत्सेरह नगरे मां, ज़ै एप्रैमेरे पहाड़ी मुल्खे मां गाश नंव्वेरे पहाड़ेरे उत्तरे मांए, तैस्सेरे हिस्से मां दब्बो जेव।

31 ते यहोशूएरे ज़िन्दगी भर, ते ज़ैना बुज़ुर्ग लोक यहोशूएरे मरनेरे पत्ती ज़ींते राए ते तैना ज़ानते थिये कि यहोवा इस्राएली लोकां केरे लेई केरां-केरां कम्मां कियोरां थियां, तैन केरे भी ज़िन्दगी भर इस्राएली लोक यहोवारी सेवा केरते राए।✝

32 फिरी यूसुफेरी हेड्डी ज़ैना इस्राएली लोकेईं मिस्र मुल्खे मरां एन्होरी थी, तैना शेकेमेरी ज़मीनी मां तैस हिस्से मां देब्बी, ज़ै याकूबे शेकेमेरे बाजी हमोरेरे मट्ठे करां 100 चैंदरे सिक्‍कन मां घिन्नोरो थियो; एल्हेरेलेइ तै यूसुफेरी औलादरो अपना हिस्सो भोइ जेव।✝

33 ते हारूनेरू मट्ठू एलीआजर भी मेरि जेवं; ते तै एप्रैमेरे पहाड़ी मुल्खे मां तैस पहाड़े पुड़ दब्बो जेव, ज़ैस जो तैसेरे मट्ठे पीनहासेरे नंव्वे पुड़ गिबत्पीनहास ज़ोतन ते तै तैड़ी दब्बो जेवरो थियो।