Neemias 4

यहूदी केरे दुश्मन बगावत केरतन

1 ज़ैखन सम्बल्‍लते शुनू, ज़ै सामरियारो हाकिम थियो कि यहूदी शहरपनाहरी मरम्मत केरि राहोरेन, तैखन तैस बड़ी बुरी लग्गी, ते यहूदी लोकां केरो मज़ाक बनाने लगो। 2 तै अपने लोकां ते सामरियारे सेनारे सामने एन ज़ोने लगो, "तैना कमज़ोर यहूदी कुन केरनू चातन? कुन तैना तैन कम एपनी ताकती सेइं केरि सकेले? कुन तैना अपनि ठार मज़बूत केरेले? कुन तैना अज़ बलिदान केरेले? कुन तैना अपनु कम अज़्ज़े खतम केरेले? कुन मित्तरे ढेरे मां फुकोरे घोड़ फिरी नंव्वे सिरे बनाले?" 3 तैसेरे ड्लखोरां अम्मोनी तोबियाह थियो, ते तै ज़ोने लगो, "ज़ैन किछ तैना बनाने लगोरेन, अगर तैस पुड़ कोई गिद च़ैढ़ी गाए, त तैन, तैन केरि बनेवरी घोड़ां केरी शहरपनाह बिछ़ोड़ेलो।"