1 ज़ै गरीब ईमानदैरी सेइं च़लते,
तै तैस बेवकूफे करां रोड़ोए ज़ै टैरी गल्लां ज़ोते।
2 मैन्हेरू बगैर ज्ञाने इच्छा केरनि रोड़ू नईं,
ते ज़ै जल्दी दौड़ते तै टेपलोइ गाते।
3 बेवकूफरे वजाई सेइं मैन्हेरी बत टारी भोतीए,
ते तै मने-मने मां यहोवा सेइं नफरत केरने लगते।
4 अमीरेरे त बड़े दोस्त भोतन,
पन गरीबेरे दोस्त तैस करां अलग भोइ गातन।
5 झूठो गवाह बेकसूर न ठहरे,
ते ज़ै झूठ ज़ोते, तै न बच़ेलो।
6 खुल्ले दिले सेइं देनेबाले मैन्हु बड़े लोक मनातन,
ते दान देनेबाले मड़देरो दोस्त हर कोई बनते।
7 ज़ैखन गरीबेरे सब ढ्ला तैस सेइं बैर रखतन,
त पक्कू आहे कि तैसेरे दोस्त तैस करां दूर भोइ गान।
तै गल्लां केरतां तैन केरो पीछो केरते, पन तैन्न न मैल्हे।
8 ज़ै अक्ल हासिल केरते, तै अपने प्राणे प्यार केरनेबालो ठहराते;
ते ज़ै समझ़ रखते तैसेरू भलू भोते।
9 झूठो गवाह बेकसूर न ठहरे,
ते ज़ै झूठ ज़ोते, तै नाश भोते।
10 ज़ैखन आरामे मां रानू बेवकूफे शोभे न,
त हाकिमन पुड़ गुलामेरू राज़ केरनू केन्च़रे शोभे!
11 ज़ै मैन्हु अक्ली सेइं च़लते तै च़िरे सेइं क्रोध केरते,
ते पाप बिसरनो तैस शोभते।
12 राज़ेरी सरक शेरेरे गरज़नेरी ज़ेरिए,
पन तैसेरी खुशी घासे पुड़ ओशरी ज़ेरि भोतीए।
13 बेवकूफ मट्ठू बाजी केरे लेई मुसीबते,
ते लड़ाई केरनेबाली कौन्श हमेशा ट्लिशड़ने बाले पैनेरी ज़ेरिए।
14 घर ते दौलत दादे पड़दादां केरे हिस्से सेइं,
पन अक्लमन्द कौन्श यहोवारे तरफां मैलतीए।
15 आलसे सेइं गिरकी निड्ल एइतीए,
ते ज़ै मैन्हु आलसे सेइं कम केरते, तै नियन्नो रहते।
16 ज़ै परमेशरेरे हुक्मे मन्ते, तै अपने प्राणां केरि हिफाज़त केरते,
पन ज़ै परमेशरेरे बत्तां केरे बारे मां बे फिक्र रहते, तै मेरि गाते।
17 ज़ै गरीबे पुड़ अनुग्रह केरते, तै यहोवा ओधार देते,
ते तैस अपने इस कम्मेरो फल मैल्हेलो।
18 ज़ांतगर उमीदे तांतगर अपने मट्ठे झ़िड़क दे,
ज़ैनी बुझ़तां तैस मैरी न छ़ड।
19 ज़ै बड़ो सेरकोते, तैस सज़ाह झ़ैल्लने दे;
किजोकि अगर तू तैस बच़ास, त बार-बार बच़ानू पेलू।
20 सलाह शुन, ते शिक्षा कबूल केर,
ताके तू अपने आखरी मां अक्लमन्द ठहरस।
21 मैन्हेरे मने मां बड़े खियाल भोतन,
पन ज़ै योजना यहोवारी भोतीए, तैए कायम रहतीए।
22 मैन्हु मां वफादारी सेभना करां रोड़ो गुणे,
ते गरीब मैन्हु झूठ ज़ोनेबाले करां रोड़ोए।
23 यहोवारो डर मन्ने सेइं ज़िन्दगी बद्धतीए;
ते तैसेरो डर मन्ने बालो ठिकानो मैलतां सुखी रहते;
तैस पुड़ मुसीबत नईं पेने बाली।
24 आलसी अपनो हथ थैली मां छ़डते,
पन अपने ऐशी तगर ड्लाछ़ोड़ो न ने।
25 मज़ाक बनानेबालन सज़ाह दे, इस सेइं सादो मैन्हु समझ़दार भोइ गालो;
ते समझ़दार मैन्हु डांट, तैखन तै जादे ज्ञान हासिल केरेलो।
26 ज़ैन मट्ठू अपने बाजी उज़ाड़ते, ते अपनि अम्मा नशानते,
तैन निन्दा ते शरमरी वजा भोल्हु।
27 हे मेरे मट्ठा, अगर तू शिक्षा शुन्नी शारस,
त तू ज्ञानेरी गल्लन सेइं टेपलोइ गालो।
28 झूठो गवाह न्याय मज़ाके मां उडारते,
ते बुरे लोकन बुराई केरनी बड़ी रोड़ी लगतीए।
29 मज़ाक बनाने बालेरे लेई सज़ाह ठहराई गातीए,
ते बेवकूफां केरे पिठरे लेई कोड़े भोतन।