ज्ञानेरी कीमत
1 हे मेरे मट्ठा, अगर तू मेरी गल्लन कबूल केरस,
ते मेरे हुक्मन अपने दिले मां रख्खस,
2 ते अक्लरी गल ध्याने सेइं शुनस,
ते समझ़री गल मन लेइतां सोचस;
3 अगर तू अक्ल ते समझ़रे लेई बड़े ज़ोरे सेइं फरियाद केरस,
4 ते तैस चैंदरो ज़ेरो तोपस,
ते छ़पोरे खज़ानेरे ज़ेरे तैसेरी तोपी मां लगोरो रास;
5 त तू यहोवारे डरे समझ़ेलो,
ते परमेशरेरू ज्ञान तीं मैल्हेलू।
6 किजोकि अक्ल यहोवा देते;
ते ज्ञान ते समझ़री गल्लां तैसेरे ऐशी मरां निसतिन।
7 तै सिद्धे लोकां केरे लेई रोड़ी अक्ल रखते;
ज़ैना ईमानदैरी सेइं च़लतन, तैन केरे लेई तै ढालरो ज़ेरो ठहरते।
8 तै न्याय केरनेबालां केरि हेर-गेश केरते,
ते अपने भक्तां केरे बत्तां केरि हिफाज़त केरते।
9 तैखन तू धर्म ते न्याय ते ईमानदारी,
मतलब सब रोड़ी चाल सेमझ़ी सकेलो;
10 किजोकि अक्ल त तेरे दिले मां दाखल भोल्ही,
ते ज्ञान तेरे प्राणे सुख देने बालू भोल्हु;
11 समझ़दारी तीं सुरक्षित रखेली;
ते समझ़ तेरी हिफाज़त केरनेबाली भोल्ही;
12 ताके तैना तीं बुरैइारे बत्ती करां,
ते उलट-फेरेरी गल्लां ज़ोनेबालन करां बच़ैली,
13 ज़ैना सच़्च़ेरी बत शारतन,
ताके आंधरे बत्ती मां च़ेलि सकन;
14 ज़ैना बुराई केरने सेइं खुश भोतन,
ते दुष्ट मैन्हेरी उलट-फेरेरी गल्लन मां मघन रहतन;
15 ज़ैन केरे चाल च़लन टारे-टिन्चे भोतन
ते ज़ैन केरि बत्तां बुरी आन।
16 अक्ल ते ज़मीर तीं बखली कौन्शी करां बच़ाले,
ज़ै मिट्ठी-मिट्ठी गल्लां केरतीए,
17 ज़ै अपने जुवैनरे साथी शारतीए,
ते ज़ै अपने परमेशरेरे करारे बिसरी गाचे।
18 तैसेरू घर मौतरे ढलाने पुड़े,
ते तैसारी बत्तां मरोरां केरे दरमियान पुज़ैतिन;
19 ज़ैना तैस कां गातन, तैन मरां कोई भी वापस एज्जी न सके;
ते न तैन ज़िन्दगरी बत मैल्हे।
20 एल्हेरेलेइ तू भले मैन्हु केरे बत्तन मां च़ल,
ताके धर्मी लोकां केरि बत्तन ट्लेइतां रख्खस।
21 किजोकि धर्मी लोक मुल्खे मां बस्सोरे राले,
ते सच़्च़े लोक तैस मां बनोरे राले।
22 दुष्ट लोक तैस मुल्खे मरां नाश भोल्हे,
ते धोखेबाज़ तैस मरां ढ्लूड़े गाले।