1 बुरे लोकां केरे बारे मां जलन न केरां,

ते न तैन केरे साथेरी इच्छा रेखां;

2 किजोकि तैना ज़ुलम सोचते रहतन,

ते तैन केरे ज़बानरां दुष्टेरी गल्‍लां निसतिन।

3 घर अक्ली सेइं बनते,

ते समझ़रे ज़िरिये बस्सोरू रहते।

4 ज्ञानेरे ज़िरिये कोठी हर किसमेरे बड़े कीमती

ते खूबसूरत चीज़न सेइं भेरि गैतिन।

5 बहादर मड़द ताकतबर भोते,

पन ज्ञानी मैन्हु ताकतबर मड़दे करां बड़ो रोड़ोए।

6 एल्हेरेलेइ ज़ैखन तू जंग केरस, तैखन योजनाई सेइं केरां,

ज़ींत त बड़े सलहकारां केरे ज़िरिये हासिल भोतीए।

7 अक्ल एत्रे उच्‍चे पुड़े कि बेवकूफ तैस हासिल न केरि सकन;

तै सभाई मां* अपनु आशी खोल्‍ली न सके।

8 ज़ै सोचने विचार केरने सेइं बुराई केरते,

तैस जो लोक दुष्ट ज़ोतन।

9 बेवकूफेरो खियाल भी पापे,

ते मज़ाक बनानेबाले सेइं मैन्हु नफरत केरतन।

10 अगर तू आफतरे मौके हिम्मत शारस,

त तेरी शक्ति बड़ी घटे।

11 ज़ैना मारनेरे लेई दीले गातन तैन्न छुटा;

ते ज़ैना मारे गानेबालेन तैन्न रोक।

12 अगर तू ज़ोस, कि हेर अवं इस ज़ानतो न थियो,

त कुन मनेरो परखने बालो परमेशर इस न समझ़े?

ते कुन तेरे प्राणां केरि हिफाज़त केरनेबालो परमेशर इस न ज़ाने?

ते कुन तै हर एक्‍की मैन्हेरे कम्मेरो फल तैस न देलो?

13 हे मेरे मट्ठा तू माछ़ी खा, किजोकि तैन रोड़ूए,

ते मैछ़ेरो कश भी, किजोकि तै तेरे ऐशी मां मिट्ठो लग्गेलो।

14 एन्च़रां सेइं अक्ल भी तीं तेरही मिट्ठी लग्गेली;

अगर तू तैस हासिल केरस त आखरी मां तैसेरो फल भी मैल्हेलो, ते तेरी उमीद न ट्लुटेली।

15 तू दुष्ट मैन्हेरो ज़ेरो धर्मी मैन्हेरे तेम्बु बरबाद केरनेरे लेई छ़ेपतां मारनेरे लेई न बिश;

ते तैसेरी आरामेरी ठार न उज़ड़ेली;

16 किजोकि धर्मी चाहे सत फेरेईं बिछ़ड़े फिर भी खड़ो भोते;

पन दुष्ट लोक मुसीबती मां झ़ेड़तां बिछ़ड़ोरे रहतन।

17 ज़ैखन तेरो दुश्मन बिछ़ड़े तैखन तू खुश न भोइयां,

ते ज़ैखन तै ठोकर खाए, तैखन तेरो मन मघन न भोए।

18 कोन्च एरू न भोए कि यहोवा एन हेरतां खुश न भोए

ते अपनि सरक दुश्मने पुड़ां हटाए।

19 कुकर्म केरनेबालां केरे वजाई सेइं न कुढ,

दुष्ट लोकां केरे वजाई सेइं जलन न केर;

20 किजोकि बुरे मैन्हु आखरी मां

किछ फल न मैल्हेलो, दुष्टां केरो दीयो हिशाव गालो।

21 हे मेरे मट्ठा, यहोवा ते राज़ो दूईयां केरो डर मन्नो;

ते तैन केरे खलाफ बगावत केरनेबालन सेइं नईं मिलनू;

22 किजोकि तैन पुड़ आफत अचानक एज्जेली,

ते परमेशर ते राज़े दूईयां केरे पासे एजनेबाली आफत कौन ज़ानते?

23 अक्लमन्दा केरे वचन इना भी आन।

न्याय मां तरफदारी केरनि, कोन्ची भी तरीके सेइं ठीक नईं।

24 ज़ै दुष्टे सेइं ज़ोते कि तू बेकसूर आस,

तैस त हर समाजेरे लोक लानत देतन ते कौमां-कौमां केरे लोक तैस सेइं नफरत केरेले;

25 पन ज़ैना लोक दुष्टी डांटतन तैन केरू भलू भोते,

ते रोड़े करां रोड़ो आशिर्वाद तैन पुड़ एइते।

26 ज़ै सिद्धो जुवाब देते,

तै ओठन फुम्मड़ी देते।

27 अपनु बेइरियोवं कम-काज़ ठीक केरनू,

ते अपने लेई ऊडार भी तियार केरनू;

तैसेरे बाद अपनु घर बनानू।

28 बगैर कोन्ची वजाई सेइं अपने पड़ोसेरे खलाफ गवाही नईं देनी,

ते न तै टपलानो।

29 न ज़ो, "ज़ेरू तैने मीं सेइं कियूं तेरहु अवं भी तैस सेइं केरेलो;

ते तैस तैसेरे कम्मेरे मुताबिक बदलो देइलो।"

30 अवं आलसी मैन्हेरे उडारे करां

ते बेअक्ल मैन्हेरे दाछ़री बागी मेइं भोइतां गातो थियो,

31 त कुन हेरू, कि तैड़ी सेभी पासन कंटन बाले बुट भेरि जेवरेन;

ते तै शढ्ली सेइं ढक्‍को जेव,

ते तैसेरे घोड़ां केरो बाड़ झ़ड़ोरोए।

32 तैखन मीं लावं ते तैस पुड़ ध्याने सेइं खियाल कियो;

हाँ मीं हेरतां शिक्षा हासिल की।

33 थोड़ी ज़ेरि निड्ल, अक होरि डिगरी,

थोड़े च़िरे हथ्थे पुड़ हथ रेखतां लेटनू,

34 तैखन तेरी गरीबी डैकेरी ज़ेरि,

ते तेरी घटी हथियार-बन्देरी ज़ेरि एज्जेली।