होरि हदायतां
1 हे मेरे मट्ठा, अगर तू अपने पड़ोसेरे ज़मानतरो ज़िमेवार भोवरो भोस,
ते तैस बखलेरे लेई कसम खेइतां जुवाब दह भोवरो भोस,
2 त तू अपने कसमरे गल्लन मां फसेलो,
ते अपने ज़बानेरे गल्लन सेइं ट्लाव गालो।
3 इस हाले मां, हे मेरे मट्ठा अक कम केर
ते अपने आपे बच़ा, किजोकि तू अपने पड़ोसेरे हथ्थे मां पेवरोस हुनी गा,
ते अपने आज़ाद भोनेरे लेई तैस कां झुकतां तैस कां बिनती केर।
4 तू न त एपनी एछ़्छ़न मां निड्ल,
ते न अपने पुंठन पुड़ डिगरी एजने दे;
5 ते अपने आपे हिरनरे ज़ेरे शिकार केरनेबालेरे हथ्थे करां,
ते च़ुड़ोली केरे ज़ेरे शिकार केरनेबालेरे हथ्थे मरां छुटा।
आलसी मैन्हेरी बेवकूफी
6 हे आलसी, बिंदलन कां गा;
तैन केरे कम्मे पुड़ ध्यान दे, ते अक्लमन्द भोइ गा।
7 ज़ैन केरे लेई न त कोई हाकिम भोए
न प्रधान, ते न कोई हुकूमत केरनेबालो,
8 फिरी भी तैना अपने खाने जो धुप्परे दिहाड़न मां अकोट्ठू केरतिन,
ते फसल कटनेरे वक्ते अपनि खानेरी चीज़ां अकोट्ठी केरतिन।
9 हे आलसी, तू किताली तगर झ़ुलतो रालो?
तेरी निड्ल कैखन खुलेली?
10 थोड़ी ज़ेरि निड्ल, अक होरि डिगरी,
थोड़ू होरू छैती पुड़ हथ रेखतां झ़ुलतां रानू6:10 झ़ुलतां रानू इन आलसी मैन्हेरे नकामी हिराते,
11 तैखन तेरी गरीबी बत्तरे लुटेरेरी ज़ेरि
ते तेरी घटी हथियार-बन्देरी ज़ेरि एज्जेली।
दुष्ट मैन्हु
12 नीच़ ते अनर्थ केरनेबाले मैन्हु हेरा,
तै टारी-टिन्ची गल्लां बकतो फिरते,
13 तै अपने एछ़्छ़न झपकाते ते पव्वे हिलाते,
ते अपनि एंगलोयन सेइं इशारो केरते,
14 तैसेरे मने मां उलट-फेरेरी गल्लां रैतिन, तै लगातार बुराई बनातो रहते
ते लड़ाई-झगड़ो पैदा केरते।
15 इस वजाई सेइं तैस पुड़ अचानक मुसीबत एज्जेली,
तै पल भरे मां एरहो नाश भोइ गालो, कि बच़नेरो कोई इंतज़ाम न रालो।
16 शा गल्लन सेइं यहोवा बैर रखते,
ते सत आन ज़ैन सेइं तैस नफरते:
17 मतलब घमण्डे सेइं च़ड़ोरी एछ़्छ़ी, झूठ ज़ोनेबाली ज़िभ,
ते बेकसूरेरे खून बगाने बाले हथ,
18 बेकार खियाल बनानेबालो मन,
बुराई केरने जो तेज़ दौड़ने बाले पव,
19 झूठ ज़ोने बालो गवाह
ते ढ्लां केरे दरमियाने मां लड़ाई पैदा केरनेबालो मैन्हु।
व्यभिचार केरने करां होशियार रानू
20 हे मेरे मट्ठा, अपने बाजी केरो हुक्म मन्न,
ते अपनि अम्मरी शिक्षा न शार।
21 तैन्न अपने दिले मां हमेशा ड्लन्ठ बेंद्धतां रख;
ते अपने गलेरो हार बना।
22 तै तेरे च़लते वक्ते तेरी अगवाई,
ते झ़ुलते वक्त तेरी हिफाज़त,
ते बींझ़ते वक्ते तीं शिक्षा देली।
23 प्रभुएरो हुक्म त दीयोए ते शिक्षा लौ,
ते अनुशासनेरे लेई दित्ती गानेबाली डांट ज़िन्दगरी बत्ते,
24 तैना तीं बदचलन कौन्शी करां
ते व्यभिचार केरनेबाली मिट्ठी-मिट्ठी गल्लन करां बच़ाली।
25 तैसेरी खूबसूरती हेरतां अपने मने मां तैसेरी खुवैइश न केर;
तै तीं अपने पुंठन सेइं न पसाए;
26 किजोकि वेश्यागमनेरे वजाई सेइं मैन्हु रोट्टरे टुक्डां6:26 रोट्टरे टुक्डां एक्की वेश्यारी लागत एक्की रोट्टरे कीमती ज़ेत्री भोतीए। केरो भिखारी भोइ गाते,
पन बदचलन कौन्श कीमती ज़िन्दगरो शिकार केरतीए।
27 कुन भोइ सकते कि कोई अपने छैती पुड़ अग रख्खे;
ते तैसेरे लिगड़ां न फुकोन?
28 कुन भोइ सकते कि कोई मूरन पुड़ च़ले,
ते तैसेरे पव न फुकोन?
29 ज़ै बेखली कौन्शी कां गाते, तैसेरी हालत एरी आहे;
बल्के ज़ै कोई तैस सेइं हुरेलो तै सज़ाही करां न बच़ेलो।
30 ज़ै च़ोर ढ्लुखरे मारे अपनु पेट भरनेरे लेई च़ोरी केरे,
तैस त लोक घटिया न ज़ानन;
31 फिरी भी अगर तै ट्लाव गाए, त तैस सत गुणा भेरतां देनू पेलू;
बल्के अपने घरेरी सारी दौलत देनी पेली।
32 ज़ै मैन्हु व्यभिचार केरते तै बेअक्ले;
ज़ै एरू केरते, तै अपने प्राणां केरो नाश केरते।
33 तैस ज़खमी ते बेइज़्ज़त भोनू पेलू,
ते तैसेरी बदनामी कधी न मिटेली।
34 किजोकि जलनी सेइं मड़द बड़ो सेरकोते,
ते ज़ैखन तै बदलो नेलो तैखन कोई दया न हिरालो।
35 तै मुआवज़े मां किछ न नेलो,
ते चाहे तू तैस बड़ू किछ देस, तांभी तै न मन्नेलो।