1 Kɛɛŋ tɔ mɛlem mɛ dwoo yenga, wɔ gwaa, boa zɛtɔ́ pɛ ɛvit. Bɛ natɔ́ ɛ́ nɛ bɛmul nɛ bɛmɛnanas bɛ nasa ɛ. 2 Bɛ kabee tin ɛ́, ɛkok ɛ nadiilaa ɛvit nɛ yɛ ɛ moo ɛ́ mbiŋela ba ɛtsetaɛpe nɛ ɛvit. 3 Dáa bɛ kani tɔ ɛvit ɛ, bɛ nabɛ ɛ́ ààkabela muu ɛ Ghɛŋ Yezu. 4 Esiiza bɔɔ nadi ɛ́, ye moo mbɛs. É di’enek, bot ɛbá eezɛtuula bɛ, nɛ ekaad e na kas-kas. 5 Boa ɛ́ boosil mis pɛ si nɛ bwoo. Bot binɔk eezɛke nɛ nɔɔ náá: «Étɛp yé bi di esaa mot di nɛ tsik ɔ tɔ myoŋ? 6 Nyɛ tokapɛ wak, nyɛ eezegom. Siizaka sa nyɛ nalɛɛ bin é sok bi nɛ nɔɔ nadi pɛ Ghalile ɛ: 7 "Ye goka ɛ́ náá, bot ɛ mesyem mɛt Sɛɛŋɛlɛ Mɔn Mot, bem nyɛ é mɛlaaba. Bhii mɛlu mɛlɛl, da nyɛ ɛ́ gom."»

8 Tin, bɛ eezɛtaala sa Yezu nalii nɛ nɔɔ ɛ. 9 Bhii tak, bɛ eezɛdus pɛ ɛvit, sik pɛ dɛl, kɛbaŋa bɛdjekel kam nɛ ngɔt nalik ɔ, zɛnɔɔ bɛdhiiti bɛdjekel djas. 10 Boa ɛ tak nabɛ ɛ́ Maali moma dɛl ɛ Makdala, Zan zɛnɔɔ Maali nyɛɛg ɛ Zak. Bɛdhiiti boa nadi bɛ nɛ bɛnɔɔ ɔ, nabaazozɛlɛɛ bot ɛ lwoma etɛp binek ɛ́ tyee wat nɛ boa nazɛlɛɛ sok ɔ. 11 Deenek, bɛ nabɛ ɛ́ ààdyeebamyaal tɛp tak, bɔɔ nadi egek ɛ́ náá, etɛp ee boa binɔk nadi elɛɛ bɛ ɛ, ye nabɛ ɛ́ etsal. 12 Tin, Pyɛɛd zokazɛwyɛl piya, sum kaab, tɔ́ pɛ ɛvit. Kuma nyɛ nakum é di tak ɛ, nyɛ eezɛmalal, gwyák tɔ ɛvit, ààbee muu. Nyɛ nazobee ɛ́ bɔɔ epes ekaad e na puu bɛ napil nyɛ tɔ tak ɛ. Bhii tak, nyɛ eezɛnɔɔ nyel, sik pɛ ndjaa é djoka kɔkɔ mbi sa nyɛ bee ɛ.

13 É dwoo tak wat, bɛdjekel ɛbá nadi etɔ́ pɛ dɛl Emayus, dɛl ɛ tak nadi etseta nɛ Yeluzalɛm ɛ́ tyee ba mɛwala mɛmbá yii goŋ mɛko. 14 Bot ɛ tak nadi esɔs etɛp djas nadhaŋ ɛ. 15 Dáa bɛ nadi kuku kyeed é ɛtaŋal nɛ ɛsɔs ɛ, wɔ gwaa, Yezu nyɛ ɛmet zokazɛtiila pɛ yɔɔ, nyɛ eezɛni é lɔɔg’ɔɔ. Bɛ moo tin ekɛ sama wat. 16 Bɛ nadi ebee nyɛ, tin, ye nabɛ ɛ́ nɛ sa wat nadipal bɛ mis, étɛp bɛ needi ààgwyak nyɛ ɛ. 17 É di’enek, Yezu eezɛdji bɛ náá: «Bi kolii yé deenek gba-gba?» É di’enek, bɛ eezɛtyaa, mɛnyel nɛ ghoŋ tɔ elyem.

18 Ngɔt pak’ɔɔ, mot nadi edjóoaa Keleopas ɔ zokazɛke nɛ nɛ náá: «Pɛ kɔ dɛl ɛ Yeluzalɛm djas, mot di ààgu etɛp ee sael penek tɔ mɛlu mak ɛ, yɛ ɛ́ wɔy wɔ ɛmet!» 19 Yezu eezɛdji bɛ náá: «Haaa ɛyé sael penek?» Bɛ eezɛbɔɔza nɛ nɛ náá: «Sa nasael dum nɛ Yezu mot dɛl Nazalɛt ɛ! Nyɛ nabɛ ɛ́ ngoolel-Mɛkpa ɛ Zɛɛb nɛ mɛbwala ɛbuɛpe. Nyɛ nadi elyaal mɛbwala mɛ é mis ɛ Zɛɛb nɛ é mis mɛ bot ɛ́, tɔ mɛsa mɛ, nɛ tɔ etɛp ee nyɛ nadi elii-lii ɛ. 20 Bot ɛ di kɔ elo eboo bɛghaa-Zɛɛb bina ɔ, nɛ ekukuma bina naaka Yezu étɛp bɛ neepɛ́ɛ nyɛ epɛ́ɛ e ɛsyee, da bhii tak, nyɛ ɛ́ kɛbemaa é mɛlaaba. 21 Bis nadi ɛ́ nɛ ɛbwaalel náá, nyɛ nabɛ ɛ́ mot nawaazɛpɛk bɔn ɛ Yisalaɛl é bhel ɔ. Saabɛgɔs ɛ́ náá, ye moo mos ɛ́ mɛlu mɛlɛl etɛp binek djas nazesael ɛ. 22 Bɛdhiiti boa tɔ ɛdhuu ɛ les eesa bis sa ɛdjoka. Ye bɛ ɛ́ bɛ eetɔ́ pɛ ɛvit tɔ ghooghom mɛlem. 23 Deenek, bɛ ààpabee muu ɛ Yezu. Bɛ kazyɛ zɛlɛɛ bis ɛ́ náá, efofop naatuula bɛ, da lɛɛ nɛ nɔɔ náá, Yezu ɛ́ nɛ tsik! 24 Bɛdhiiti pak’es zokatɔ́ pɛ ɛvit, bɛ kabela esonok ɛ́ dáa boa binɔk nazolɛɛ ɛ. Tin, bɛ nakadi ɛ́ ààbee Yezu.»

25 É di’enek, wɔ gwaa, Yezu zɛke nɛ nɔɔ náá: «Bi tok nɛ etsoŋ, etɛɛ náá, ɛlyel ɛ bin nɛ ɛmyaal etɛp djas ee bɛngoolel ɛ Mɛkpa ɛ Zɛɛb nalɛɛ ɛ! 26 Ye nabɛ ɛ́ ààgoka náá, Mɛsia zuk é, da bhii tak nyɛ ɛ́ kani tɔ duma yɛ?» 27 Bhii tak, nyɛ moo tin ekaada bɛ etɛp ee djas nalɛɛaa dum nɛ nɛ tɔ Ekwyala ɛ. Nyɛ nakan ɛ́, tɔ etsi ɛ Moiiz, zɛnɔɔ Ekwyala e bɛdhiiti bɛngoolel ɛ Mɛkpa ɛ Zɛɛb.

28 Dáa bɛ nadi, bɛ moo kunaa nɛ dɛl ɛ bɛ nadi etɔ́ ɛ, Yezu eezɛsa tyee náá, nyɛ nadi edhaa yɛ. 29 Tin, bɛ eezɛbee nyɛ, bɔɔ nɛ nɛ náá: «Pookosulal sama nɛ nes wak, etɛɛ náá, dwoo eezesila. Ɛgwyitok moo aagwyiidela.» Tin, nyɛ eezɛmyaal ɛsulal é di wat bɛ nɛ bɛnɔɔ. 30 Deenek, bɛ eezɛdisi kɔ mesa bɛ nɛ bɛnɔɔ. Bhii tak Yezu eezɛnɔɔ mapa, ghaapɛɛ Zɛɛb, nyɛ eezɛpyak, nɔɔ yɛ, djɛ bɛ. 31 É di’enek, mis mɔɔ eezɛbɛŋel, bɛ eezɛgwyak Yezu. Tin, wɔ gwaa nyɛ zɛdiib bɛ é mis. 32 Bɛ moo tin esɔs pak’ɔɔ náá: «Elyem bina di ɛ́ tɔɔɔ nɛ mɛmyaala gba-gba, é sok nyɛ di ekaada mena sa Ekwyala nadi elɛɛ ɛ.»

33 É di’enek wat, wɔ gwaa, bɛ zɛwyɛl ngbat, sik pɛ Yeluzalɛm. Bɛ eezɛbela bɛdjekel kam nɛ ngɔt é di wat bɛ nɛ bɛdhiiti bot ɛ lɔɔg’ɔɔ, 34 é keke náá: «Yɛ ɛ́ tsɛɛtsɛ náá, Ghɛŋ eegom bhis ɛsyee! Simɔŋ bɛ ɛ́, nyɛ eebee nyɛ!» 35 Tin, bɛdjekel bɛbá binɔk eezɛni ebaŋa bɛ dáa ye nadhaa nɛ nɔɔ pɛ bɛ nadus ɛ, nɛ dáa bɛ nakagwyak Yezu é sok nyɛ napyak mapa ɛ.

36 Dwoo tak wat bikoko, dáa bɛdjekel nadi bɛ dinaa esɔs pak’ɔɔ ɛ, Yezu nyɛ ɛmet eezɛtuula tɔ lɔɔ. Nyɛy nɛ nɔɔ náá: «Egwyem di nɛ nen!» 37 Tin, bɛdjekel djas moo epwak, bɛ moo ɛ́ nɛ bwoo. Nɛ tsɛɛtsɛ, bɛ nagu ɛ́ náá, bɛ eebee dim, ghuna yɛ ɛ́ Yezu. 38 Yezu kake nɛ nɔɔ ɛ́ náá: «Étɛp yé bi di epwak? Étɛp yé bi di nɛ mɛso tɔ elyem? 39 Gwyákeka mɛmbɔ mam, nɛ mɛko mam! Nɛ tsɛɛtsɛ yɛ ɛ́ mam, bwooka mɛ, da bi ɛ́ gwyák mɛ! Dim tok nɛ epuud nɛ egwyes dáa mam, dáa bi di bee’aak.» 40 Nyɛ eezɛke nɛ nɔɔ deenek, nyɛ eezɛlyaal bɛ mɛmbɔ nɛ mɛko mɛ. 41 Tin, dáa bɛdjekel nadi tɔ mɛmyaala nɛ ɛdjoka ɛ, bɛ nadi ɛ́, bɛ dinaa ààmyaal ɛnyɔɛpe náá, Yezu eegom. É di’enek, wɔ gwaa, Yezu zɛdji bɛ náá: «Bi ɛ́ nɛ edee e dek wak é?» 42 Tin, bɛ eezɛdjɛ nyɛ pes su ndika. 43 Wɔ gwaa, Yezu zɛnɔɔ yɛ náá, dɛ é mis mɔɔ.

44 Bhii tak, nyɛ eezɛke nɛ nɔɔ náá: «É sok mena nadika mena dinaa é di wat ɛ, mɛ nabɛ ɛ́, mɛ naalɛɛ bin náá: "Etɛp djas di kwyala kɔ ɛsu ɛ lam tɔ etsi ɛ Moiiz nɛ tɔ bɛmɛkana mɛ bɛngoolel ɛ Mɛkpa ɛ Zɛɛb nɛ tɔ mɛkana mɛ Mɛdjeeb ɛ́ waasael djas."» 45 Yezu ɛ́ boozɛdjɛ bɛ etsoŋ, étɛp bɛ neemɛt ɛnyɔɛpe mɛkana ɛ Zɛɛb. 46 Nyɛy nɛ nɔɔ náá: «Beeka sa zekwyalel ɛ́: Ye goka ɛ́ Mɛsia zuk, da nyɛ ɛ́ gom mɛlu mɛlɛl bhis ɛsyee. 47 Nɛ din ɛ lɛ, ye goka ɛ́ náá, bɛ goola nɛ bot ɛ membyak djas Mbɛɛ Bhaadal kana pɛ Yeluzalɛm, bɛ lɛɛ bot náá, bɛ liig elyem. Tin, Zɛɛb ɛ́ waapel mesyem mɔɔ. 48 Biyɔ ɛ́ kwaadi bɛtyaasɛs esesɛɛ ee bi zebee ɛ djas. 49 Bhii tak, mam ɛmet ɛ́ waadhis bin sa Saagam nakɛk ɛ. Yɛ kabɛ biyɔ bɛmet ɔɔ, dika tɔ ghaada, étɛp ɛbwood náá, Zɛɛb djɛ bin ghwyil aadus pɛ tɔ gwoo ɛ.»

50 Bhii tak, Yezu eewyis bɛ nɛ bɛdjekel bɛ tɔ ghaada, nyɛ eezɛtɔ́ nɛ nɔɔ é ngwoob dɛl Bhetani. É di’enek, nyɛ ɛ́ booben mɛmbɔ pɛ ɛko, sɛɛ bɛ mɛtel. 51 É sok nyɛ nadi esɛɛ bɛ mɛtel ɛ, nyɛ eezɛbɛka nɛ nɔɔ, byet tɔ gwoo.

52 É di’enek, bɛdjekel ɛ́ booduwal nyɛ, bula pɛ Yeluzalɛm tɔ boo mɛmyaala. 53 Bɛ nakadidi ɛ́ tɔ kok Ndjaa-ebuwa mɛlu djas, étɛp ɛduwal ɛ Zɛɛb.