1 Bhii tak, Yezu eezɛtɔ́ kɛgoola bot Mbɛɛ Bhaadal Ɛyoŋ ɛ Zɛɛb pɛ tɔ eghaada nɛ kɔ bɔɔ mɛl, bɛ nɛ bɛdjekel bɛ kam nɛ bɛbá, 2 zɛnɔɔ bɛdhiiti boa nyɛ nawyisal embee esisim tɔ lɔɔ ɔ, nɛ bot ɛ mɛbɛ nyɛ natsik ɛ. Ye nabɛ ɛ́ Maali di djóoaa Maali moma dɛl Makdala ɔ, moma na embee esisim etɛn nɛ ebá nasɔaa tɔ lɛ ɔ, 3 Zan, mwaa Kuuza, ngɔt tɔ lɔɔg ekukuma di sa mɛsa tɔ ndjaa mɛkoozi Eelood ɔ, Suuzan, nɛ bɛtɛ nɛ bɛdhiiti boa nadi ekwyee Yezu nɛ bɛdjekel bɛ nɛ esa e bɔɔ met ɔ.

4 Zukamwaa nɛ mot nadus mɛl nɛ mɛl ɔ, naazɛsaala é bhaaz ɛ Yezu. Wɔ gwaa, Yezu zɛkan kana yak: 5 «Dhiiti mot ngɔt zokazɛtɔ́, kɛmwam mɛbhek tɔ pyeeb’ɛ. Tyee nyɛ nadi emwam ɛ, dhiiti kyee bhek eezɛkwyit é ze. Bhii tak, enen ɛ zɛdɛ yɛ. 6 Dhiiti kyee bhek kakwyit ɛ́, kɔ bɔs di nɛ bat ɛkok ɛ. Tyee bhek’enek nakwyit ɛ, yɛ ɛ́ boozɛsyee, etɛɛ náá, é di tak, bɔs nadi ɛ́ ghas. 7 Dhiiti yak kyee bhek kazɛkwyit ɛ́ tɔ engwyinini. Bhek tak eezɛkwyil lɔɔg wat nɛ engwyinini. Dikel engwyinini e tak ɛ́ boozɛgó yɛ. 8 Tin, dhiiti kyee bhek naazɛkwyit é mbɛɛ bɔs. Tyee yɛ nawyee ɛ́, bhek nɛ bhek naadjɛ bhum bɛdhet ɛbuɛpe.» Bhii Yezu nasilal kana yenek ɛ, nyɛ eezɛke náá: «Gwakeka ɛnyɔɛpe, bi ɛ di nɛ mɛlɔ mɛ ɛgwak ɔɔ.»

9 Bɛdjekel ɛ Yezu zokazɛdji nyɛ ɛsuk ɛ kana tak. 10 Wɔ gwaa, nyɛ zɛbɔɔza nɛ nɔɔ náá: «Biyɔ, bi eezedjɛaa etsoŋ e ɛgu ɛsuk ɛ Ɛyoŋ ɛ Zɛɛb. Yɛ bɛ bɛsɔ bin ɔɔ, bɛ gwak yɛ ɛ tɔ ekana. Deenek,

"Bɛ ɛ́ nɛ ghwyil ɛgwyák nɛ mis, ààbee.

Bɛ ɛ́ nɛ ghwyil ɛgwak nɛ mɛlɔ,

ààpiibal sa di kwyɛl ɛlɛɛ ɛ."»

11 «Gwakeka ɛsuk ɛ kana tak: Bhek ɛ́ Mɛkpa ɛ Zɛɛb. 12 Mɛbhek mɛ nakwyit é ngwoob gba ɛ, yɛ ɛ́ dáa bot ɛ di egwak Mɛkpa ɛ Zɛɛb, da dim mot mɛkɔŋ ɛ́ zɛdis bɛ yɛ tɔ ebhum e elyem ɛ, étɛp ɛkaab náá, bɛ ɛ́ zɛkɛdum koŋ nɛ Zɛɛb, da bɛ ɛ́ tsak. 13 Mɛbhek nakwyit kɔ bɔs di nɛ bat ɛkok ɛ́ dáa bot ɛ di egwak Mɛkpa ɛ Zɛɛb, da bɛ ɛ́ dja yɛ nɛ mɛmyaala. Ghuna bɛ ààbet náá, ye tyaa "zik". Bɛ dyeebamyaal yɛ ɛ, é ba mɔɔ ɛwala batsa, kasɛka ɛ́, é di mɛbhowal aakatuula ɔ, bɛ eekat ɛdum koŋ nɛ Zɛɛb. 14 Bhek nakwyit tɔ engwyinini ɛ, yɛ ɛ́ dáa mbi bot ɛ di egwak Mɛkpa ɛ Zɛɛb ɔ, bhii tak, bɛ kawa lyem ɛ́ tɔ ɛsiiza esa e bɔs’ak, nɛ ekum nɛ mɛnyɔ mɛ tsik bɔs’ak. Bɛ tok nɛ ghwyil ɛdjɛ tɛtɛ bhum. 15 Bhek kwyit kɔ mbɛɛ bɔs ɔ kwyɛl ɛlyaal ɛ, bot ɛ di egwak Mɛkpa ɛ Zɛɛb, da bɛ ɛ́ wa lyem é ɛbaal ɛ yɛ, bhii tak, bɛ ɛ́ kɛ mbɛɛ kyeed ɔ, tin, bɛ waadjɛ mbɛɛ bhum.»

16 «Mot ɛ́ nɛ ghwyil ɛtuub lama, da nyɛ ɛ́ butal yɛ nɛ mɔɔ bhe, nɛghu ɛnɔɔ yɛ, da wa pɛ si goŋ é? Ye nɛɛgaa ɛ́, pɛ kɔ tɛɛg etɛɛ náá, bot ɛ di ni tɔ ndjaŋ ɔ, needi tɔ gwyɛ. 17 Esa ee di tɔ sɔ ɛ djas aadi ɛ́, wyis é gwyɛ é mwos dwoo. Esa e mɛsɔ djas aadi ɛ́, nyen é gwyɛ. 18 Dika nɛ etsoŋ dum nɛ etɛp djas bi di egwak ɛ! Etɛɛ náá, mot aadi nɛ ba bim sonok ɔ, bɛ waabil nyɛ dhiiti. Tin, mot aadi ààbɛ nɛ sonok ɔ, bɛ aadis nyɛ ba bim esa ee nyɛ di nɛ yɛ ɛ.»

19 Nyɛɛg ɛ Yezu nɛ bɔn-nyɛɛg zokazyɛ, zɛbela Yezu. Bɛ eezɛtyaa pɛ kel etɛɛ náá, ze ɛdhaa étɛp bɛ neekɛboma nɛ Yezu nadi ɛ́, ɛkɔɔlaɛpe étɛp mɛbu mɛ bot. 20 Deenek, bɛ eezɛlɛɛ Yezu náá: «Nyoog nɛ bɔn-nyoog ɛ́ metetel pɛ kel, bɛ ɛpekwyɛl ɛboma nɛ nɔ.» 21 Wɔ gwaa, Yezu zɛbɔɔza nɛ bot djas náá: «Nyaagam nɛ mɔn-nyaagam ɛ́ bot ɛ di egwak Mɛkpa ɛ Zɛɛb, da looba nɛ yɛ ɔ.»

22 Dhiiti dwoo, Yezu eezɛni tɔ boo elɛɛd bɛ nɛ bɛdjekel bɛ. Bhii tak nyɛ eezɛke nɛ nɔɔ náá: «Djhoosɛɛka, tɔ́ pɛ yii kyiid boo soob na djato-djato.» Bhii tak bɛ eezɛtɔ́. 23 Dáa bɛ nadi ekɛ tɔ elɛɛd ɛ, gɔ́ eezɛbe Yezu. Kasɛka ɛ́, boo ghuu ɛlyelɛpe eezɛkan ɛpupal kɔ dii. Mɛpupal mɛ ghuu tak eeghɛɛ ɛbhyeeb ɛ mɛdii kɛghɛɛg yɛ é elɛɛd, elɛɛd moo tin eni mɛdii. Mɛdii mɛ tak ɛkɛɛ sa aalwoodal-lwoodelak elɛɛd, bɛ moo tin pak tsik nɛ ɛsyee. 24 Bɛdjekel ɛ Yezu eezɛtiila pɛ daa lɛ, bɛ eezɛdjem nyɛ nɛ etsim: «Ghɛŋ, Ghɛŋ, mena ɛ́ di esik’aak!» Tin, Yezu eezɛdjem. Bhii tak, nyɛ eezɛbhɛm ghuu nɛ ɛbhyeeb. É di’enek, ghuu eezɛsila, bhwak moo tin kup. 25 Bhii tak, Yezu eezɛke nɛ bɛdjekel bɛ náá: «Ɛmyaal ɛ len ɛ́ wo?»

Ye nabɛ ɛ́ boo bwoo naamɛt bɛ, bɛ naadyeebadjoka dhaa nyel. Bɛ moo tin edjinel pak’ɔɔ náá: «Nwyak ɛ́ nwyaa kwaambi mot di náá, dɔɔ nɛ ghuu nɛ mɛdii ɛpegwak nyɛ?»

26 Yezu nɛ bɛdjekel bɛ eezɛkum pɛ kyee dik Gheelaasa di di egwyákel nɛ kyee dik Ghalile ɛ. 27 Dáa Yezu nadi esul tɔ elɛɛd ɛ, dhiiti mot dɛl ɛ tak zokazyɛ, zɛboma nɛ nɛ. Mot tak nabɛ ɛ́ nɛ embee esisim nadi dhedhek nyɛ ɔ. Nyɛ nabɛ ɛ́ ààbɛ nɛ ekaad é nyel, ààkadidi tɔ ndjaa. Nyɛ nakadidi ɛ́ tɔ mɛvit. 28 Dáa nyɛ nabee Yezu ɛ, wɔ gwaa, nyɛ zɛbo tsim. Nyɛ eezɛkwyit mɛboŋ si mɛko mɛ. Nyɛ eezɛbo tsim, nyɛy nɛ nɛ, náá: «Mena ɛ́ nɛ yaa tɛp, Yezu, Mɔn ɛ Zɛɛb Mɛkaake? Mɛ ɛpedjaala nɛ nɔ, nàtwak mɛ!» 29 Yezu eezɛke nɛ mbee sisim náá, nyɛ wyis tɔ lɛ, etɛɛ náá, ye nabɛ ɛ́, mbee sisim tak eezeloobe di tɔ lɛ. Nyɛ nadi ekɔlaa mɛmbɔ nɛ mɛko nɛ eghwooz étɛp nyɛ neemɛtaa é di wat. Mot tak nabebwak yɛ ɛ bwakak. Tin, mbee sisim tak nawoobal nyɛ, kyeed nyɛ tɔ bal. 30 Yezu zokazɛdji nyɛ náá: «Din ɛ lɔ ɛ́ ɛyé?» Nyɛ eezɛbɔɔza nɛ nɛ náá: «Yam din ɛ́ "Mɛkɔm-mɛkɔm"», etɛɛ náá, bɛtɛ nɛ embee esisim naani tɔ lɛ. 31 Tin, embee esisim nadi edjaala nɛ Yezu náá, nyɛ nàkyeed bɛ tɔ guk di ààbɛ nɛ ɛsik ɛ*. 32 É di tak, ye nabɛ ɛ́ nɛ boo ɛsaŋ ɛ bɛghwyee nadi egɔɔ kɔ mɛtsok menek ɔ. Embee esisim eezɛdjaala nɛ Yezu náá, nyɛ kyeed bɛ tɔ mɛnyel mɛ bɛghwyee binɔk. Yezu zokamyaal bɛ. 33 Tin, wɔ gwaa embee esisim zɛwyis tɔ mot’enɔk, ni tɔ ɛsaŋ ɛ bɛghwyee binɔk. Bɔɔ djas eezɛsul nɛ ekaab pɛ bɛ nadi kɔ ɛkalel ɛtsok ɛ. Wɔ gwaa bɛ zɛges, kɛghaaga tɔ dii, diida. Bɔɔ djas si na bhɛɛɛ.

34 Dáa bot ɛ nadi ebaal mɛsaa mɛ bɛghwyee binɔk nabee edjema binek djas ɛ, bɛ ɛ́ boozɛtsema nɛ ekaab, sik, kɛlɛɛ bot kɔ eghaada nɛ kɔ bɔɔ mɛl. 35 Bot zokawyis tɔ́ kɛbee sa nasɛ́ɛ ɛ. Bɛ eezɛkum pɛ kyee Yezu nadi ɛ́. Tin, bɛ eezɛbee mot na embee esisim mɛkɔm-mɛkɔm nawyis tɔ lɛ ɔ, ndiindel é ngwoob ɛ Yezu, nyɛy nɛ ekaad é nyel. Nyɛy nyel ɛnyɔɛpe. Wɔ gwaa, bwoo zɛmɛt bɔɔ djas. 36 Bot ɛ nabee edjema binek djas ɔ, moo tin ebaŋa dáa mot na embee esisim mɛkɔm-mɛkɔm natsak ɛ. 37 Tin, bot ɛ kyee dik’enek djas zokazɛdjaala nɛ Yezu náá, nyɛ dus kɔ kyee dik Gheelaasa, etɛɛ náá, ye naadyeebakpaa bɛ boo ɛkɛɛd.

Bhii tak, Yezu eezɛni tɔ elɛɛd, nɔɔ nyel’ɛ, sik. 38 Mot embee esisim nawyis tɔ lɛ ɔ ɛ́ booke nɛ nɛ náá: «Mɛ kwyɛl ɛ́, mena gyeeka lɔɔg wat.» Yezu ɛ́ boozɛswaal nyɛ. Nyɛ ɛ́ booke nɛ nɛ náá: 39 «Sika pɛ ndjaŋ’ɔ, da wɔ ɛ́ kɛlɛɛ enɛm nɛ embɛɛ ee Zɛɛb sa wɔ ɛ.» Mot’enɔk eezɛtɔ́, nyɛ moo tin ekɛtuud kɔ ghaada djas dáa Yezu natsik nyɛ ɛ́.

40 Dáa Yezu nabula pɛ yak kyiid dii ɛ, wɔ gwaa, zukamwaa nɛ mot baazɛboma nɛ nɛ, etɛɛ náá, bɛ nadi ebwood nyɛ. 41 Dhiiti mot, din ɛ lɛ nabɛ ɛ́ Zayilus. Nyɛ nadi ɛ́, kukuma ndjaa mendjaala mɛ eYuda. Nyɛ eezɛkwyit mɛboŋ si mɛko ɛ Yezu, é djaala nɛ nɛ, nyɛ zyɛ pɛ ndjaŋ’ɛ, 42 etɛɛ náá, nyɛ nabɛ ɛ́ nɛ sim ɛsyes ɛ lɛ ngɔt, mɔn membu kam nɛ ebá nadi ebɛ́ ɛkpaŋɛpe pak tsik nɛ ɛsyee ɔ.

Dáa Yezu nadi etɔ́ ɛ, zukamwaa nɛ mot nadi edu nyɛ, bak eghuŋa nyɛ é nyel, bak tak etiidal nyɛ. 43 Ghuna tɔ ɛdhuu ɛ bot binɔk, ye nabɛ ɛ́ nɛ dhiiti moma, ghiya nadi ekekɛk nyɛ é nyel boa, ààbɛ nɛ ɛtsek ɔ. Ɛbɛ́ ɛ tak naasa nɛ nɛ tyee membu kam nɛ ebá. Nyɛ naasilal epata bɛ djas tɔ mendjaa mɛ mɛgwoma ɛbuɛpe, ɛbɛ́ ààsi. Ye nabɛ ààbɛ nɛ mot nakwak ɛgwom ɛbɛ́ ɛ tak. 44 Nyɛ eezɛdu Yezu bhii koŋ, zyɛ, zɛmɛt kyee ɛghɔ ɛ kaad’ɛ wat. Mɛta nyɛ nazomɛt ɛ, é di tak wat, ghiya eezɛtsek. 45 Yezu eezɛdji náá: «Ɛzɛ mɛt mɛ?» Wɔ gwaa, bot djas kɛla, Pyɛɛd eezɛke náá: «Ghɛŋ, beea kwaambi zukamwaa nɛ mot di etiidal wɔ ekyee djas’aak.» 46 Deenek, Yezu eezɛke náá: «Tsɛɛtsɛ mot eekwyɛt mɛ, etɛɛ náá, mɛ eegwyak náá, dhiiti pes mɛbwala eewyis tɔ lam.» 47 Dáa moma tak nagu náá, nyɛ eepanaa ɛ, moma tak eezɛtiila, nyɛ moo pwak nɛ bwoo. Bhii tak, nyɛ eezɛkwyit mɛboŋ si, si mɛko ɛ Yezu. Nyɛ eezɛmyam é mis mɛ bot djas, tin, nyɛ moo elɛɛ nɛ bot djas étɛp yé nyɛ namɛt kaad ɛ Yezu ɛ, nɛ dáa nyɛ nakatsak é di tak wat ɛ. 48 Wɔ gwaa, Yezu eezɛke nɛ nɛ náá: «Ɛsyes ɛ lam, ɛdum ɛ koŋ ɛ lɔ nɛ Zɛɛb eetsik wɔ. Tɔ́a tɔ egwyem.»

49 Tinaak, Yezu dinaa elii, ngoola-ngoola ngɔt eezɛdus pɛ ndjaŋ ɛ kukuma ndjaa mendjaala mɛ eYuda, zɛlɛɛ nyɛ náá: «Ɛsyes ɛ lɔ eezepɛka. Nàkabaadhek lyoel.» 50 Yezu nabɛ ààbis sa bɛ nadi elii ɛ. Nyɛ ɛ́ boozɛke nɛ Zayilus náá: «Nàbem ba. Duma koŋ nɛ Zɛɛb, nyɛ waatsak!» 51 Dáa nyɛ nakum pɛ ndjaŋ ɛ, nyɛ eezɛlu bot djas náá, bɛ nàni tɔ ndjaa. Nyɛ nazomyaal ɛ́, bɛdjekel bɛ, Pyɛɛd, Zaŋ nɛ Zak, zɛnɔɔ sɛɛg nɛ nyɛɛg mɔn. 52 Bot djas, metetel nɛ mɛgwyɛ, nɛ etaŋal nɛ etsim. É di’enek Yezu ɛ́ booke nɛ nɔɔ náá: «Nàdjeka. Mɔn ààpagwyɛ. Nyɛ ɛ́ é gɔ́.» 53 Wɔ gwaa, bot gɔ nyɛ etɛɛ náá, bɛ nadi egu náá, mɔn naazegwyɛ. 54 Nyɛ eezɛmɛt mɔn é mbɔ, nyɛ eezɛben gwood. Nyɛy nɛ nɛ náá: «Mɔn’am, wyɛla!» 55 É di tak wat, mɔn’enɔk eezɛgom, nyɛ eezɛwyɛl. Bhii tak, nyɛ ɛ́ boolwom bɛ náá, bɛ djɛ mɔn tak edee e dek. 56 Tin, ye nabɛ ɛ́, sɛɛg nɛ nyɛɛg naadyeebadjoka ɛlyelɛpe. Yezu eezɛlyak bɛ náá, bɛ nàlɛɛ bot sa nasael ɛ.