1 Yezu eezɛsɛɛg bɛdjekel bɛ kam nɛ bɛbá, nyɛ eezɛdjɛ bɛ ghwyil nɛ eghɛŋ e ɛsɔ embee esisim nɛ ɛtsik ɛ bot ɛ mɛbɛ́. 2 Bhii tak nyɛ eezɛlwom bɛ, bɛ kɛgoola Mbɛɛ Bhaadal Ɛyoŋ ɛ Zɛɛb, nɛ ɛtsik ɛ membel. 3 Nyɛ eezɛdjɛ bɛ etsi náá: «Sa mot àànɔɔ sonok wat, nyɛ neetɔ́ nɛ yɛ mɛdjoŋ. Sa mot àànɔɔ sek, àànɔɔ ɛkoo, àànɔɔ mapa, kɛyaka nɛ epata tɔ mengwyɛ men. Sa mot ààdi nɛ ekuwa ebá. 4 Tɔ edi djas bot aamyaal náá, bi sulal ɔ, dika tɔ ndjaa tak, kɛkum dwoo bi aadus tin ɛ. 5 Mɛl djas bot aapɛɛ náá, bi nàsulal pɛ daa lɔɔ ɛ, kpaaka yebɔ, da bi ɛ́ kut bɛ piib mɛko men. Yɛ aadi ɛ́, tyee mwana étɛp embee esesɛɛ bɔɔ.» 6 Bɛdjekel eezɛtɔ́ pɛ mɛl djas, kɛlɛɛ bot Mbɛɛ Bhaadal, nɛ ɛtsik ɛ bɛtɛ nɛ membel é edi djas.

7 Tin, Eelood mot nadi mɛkoozi kɔ kyee dik Ghalile ɔ, naagwak menduk mɛ etɛp binek djas. Nyɛ nabɛ ɛ́ ààkagu sa nyɛ gek ɛ, etɛɛ náá, bɛdhiiti bot nadyeebake ɛ́ náá: «Zaŋ Nduuel-bot nagwyɛ ɔ, naazegom.» 8 Bak náá: «Yɛ ɛ́ ngoolel-Mɛkpa ɛ Zɛɛb, Eli, eebaatuula!» Yak kyee bot náá: «Yɛ ɛ́ ngoolel-Mɛkpa ɛ Zɛɛb na mwa ɛ zegom!» 9 Eelood ɛ́ boozɛke náá: «Ye nabɛ ɛ́ mam ɛmet naazelwom náá, bɛ tsak Zaŋ Nduuel-bot. Haaa yenɔk ɛ́ nwyaa mot? Mot mɛ di egwak bot elii etɛp bak ko ɛsu ɛ lɛ’aak ɛ́ zɛ?» Nyɛ nadi esaa nyɛ neebee Yezu.

10 Bot ɛ lwoma zokazɛbula pɛ daa Yezu, bɛ moo tin ebaŋa nyɛ esesɛɛ ee bɛ nasa ɛ. Yezu ɛ́ boozɛdul bɛdjekel bɛ, tɔ́ nɛ nɔɔ é ngwoob dhiiti ghaada di edjóoaa Bhɛtsaida ɛ. 11 Ghuna bot ɛbuɛpe naagu ze bɛ nadi tɔ́ ɛ, bɛ ɛ́ boozɛdu bɛ. Yezu zokazɛboma nɛ nɔɔ. Bhii tak, nyɛ moo tin elyo bɛ dum nɛ Ɛyoŋ ɛ Zɛɛb, nɛ ɛtsik ɛ bot ɛ nadi ekwos ɛtsak ɔ. 12 Dáa dwoo nabɛ ye moo esila ɛ, bɛdjekel bɛ kam nɛ bɛbá ɛ́ boozɛtiila pɛ daa lɛ. Bɔɔ nɛ nɛ náá: «Swaala bot bak, bɛ tɔ́ pɛ kɔ mɛl nɛ pɛ tɔ epɛt ee di pak nɛ wak ɛ, etɛɛ náá, penek bɛ waakɛbela di ndjɛk nɛ edee e dek, etɛɛ náá, menaka wak ɛ́ tɔ bal.» 13 É di’enek, Yezu eezɛbɔɔza nɛ nɔɔ náá: «Djɛka bɛ edee biyɔ bɛmet!» Bɛ eezɛbaake nɛ Yezu náá: «Bis zokalik ɛ́, nɛ emapa etɛn, zɛnɔɔ bɛsu ɛbá. Wɔ kwyɛl bilak ɛ́ náá, bis kɛbɔm edee étɛp bot bak djas é?» 14 É di’enek, mɛtaŋ mɛ bot naakum tyee botom bɛmil ɛtɛn (5 000). Tin, Yezu ɛ́ boozɛlɛɛ bɛdjekel bɛ náá: «Dilka bot djas mendiindil, zɛɛga bot mɛkam-mɛtɛn (50) e di wat.» 15 Bɛdjekel ɛ́ boozɛsa dáa Yezu nake ɛ. Bɛ eezɛdil bɛ si. 16 Bhii tak, Yezu eezɛnɔɔ emapa etɛn nɛ bɛsu ɛbá binek, nyɛ eezɛben mis pɛ ɛko, zɛghaapɛɛ Zɛɛb étɛp edee binek. Nyɛ eezɛpyak mapa, nɔɔ, djɛ bɛdjekel bɛ, bɛ kaa bot djas. 17 Mot nɛ mot naadɛ, djil. Bɛdjekel zokabula nɛ mɛbhwaa kam nɛ ebá yii mɛbhubhwak.

18 Dhiiti dwoo, dáa Yezu nadi é djaala nɛ Zɛɛb é dhiiti sum di ɛ, bɛdjekel nadi ɛ́, bɛ nɛ nɛ. Nyɛ eezɛdji bɛ náá: «Mɛdhuu mɛ bot ke náá, mam ɛ́ zɛ?» 19 Bɛ eezɛbɔɔza nɛ nɛ náá: «Bak ke ɛ́ náá, wɔ ɛ́ Zaŋ Nduuel-bot. Bɛdhiiti náá, wɔ ɛ́ ngoolel-Mɛkpa ɛ Zɛɛb Eli. Bɛdhiiti pe kabaake ɛ́ náá: Wɔ ɛ́ ngɔt tɔ bɛngoolel ɛ Mɛkpa ɛ Zɛɛb na mwa zegom ɔ.» 20 Yezu eezɛdji bɛ náá: «Yɛ kabɛ biyɔ ɔɔ, bi ke náá, mam ɛ́ zɛ?» Pyɛɛd eezɛbɔɔza nɛ nɛ náá: «Wɔ ɛ́ Mɛsia Zɛɛb nadhis ɔ.» 21 Yezu eezɛdul bɛ mɛlɔ ɛlyelɛpe, nyɛ eezɛke nɛ nɔɔ náá, sa bɛ ààlɛɛ bot.

22 Bhii tak, nyɛ eebaazɛbil náá: «Ye goka ɛ́ Sɛɛŋɛlɛ Mɔn Mot zukaa ɛbuɛpe. Bɛpaa, nɛ eboo bɛghaa-Zɛɛb, zɛnɔɔ bɛghaŋ ɛ mɛkana mɛ etsi ɛ́ waabhina nyɛ. Nyɛ waagóaa. Mɛlu mɛlɛl bhis ɛsyee ɛ lɛ, nyɛ waagom.»

23 Bhii tak, Yezu eezɛlii nɛ bɔɔ djas náá: «Yɛ bɛ náá, mot ngɔt ɛpekwyɛl ɛdu ɛ mɛ ɔɔ, nyɛ bet ɛkwyɛɛg ɛ nyel’ɛ, da nyɛ ɛ́ bɛp mɛlaaba mɛ mɛlu djas, da nyɛ ɛ́ du mɛ. 24 Etɛɛ náá, mot ɛ di ekwyɛl ɛtsik nyel’ɛ ɔɔ, nyɛ aanàkwaabela tsik, mot ɛ myaal ɛsu ɛ tsik nyel’ɛ étɛp’am ɔɔ, nyɛ waabela tsik. 25 Yɛ ɛ́ tɛtɛ yé, mot bela mɛvu mɛ bɔs’ak djas, da nyɛ ɛ́ gel nyel’ɛ met, nɛghu ɛpul ɛ nyel’ɛ? 26 Mot aagwak sen étɛp’am nɛ étɛp mɛkpa mam ɔ, mam Sɛɛŋɛlɛ Mɔn Mot ɛ́ waagwak sen nɛ nɛ dwoo mɛ aazyɛ tɔ duma yam ɛ, nɛ tɔ duma Saagam nɛ efofop na dɛɛ ɛ. 27 Mɛ lɛɛ bin nɛ tsɛɛtsɛ ɛ́ náá, tɔ sama bot ɛ di wak’aak, bɛdhiiti aanàkwaagwyɛ, bɔɔ ààbee Ɛyoŋ ɛ Zɛɛb.»

28 Ye naasa tyee yenga wat bhii nyɛ naalii deenek ɛ́, Yezu eezɛnɔɔ Pyɛɛd, nɛ Zaŋ, zɛnɔɔ Zak, nyɛ eezɛbyet kɔ dhiiti ɛtsok étɛp ɛdjaala nɛ Zɛɛb. 29 É sok Yezu nadi edjaala ɛ, bhwoob’ɛ zokaswoola, ekaad bɛ moo puu, ɛkasɛpe dáa ngwyes bhi. 30 Kasɛka tin ɛ́, bot ɛbá é bhaaz’ɛ, bɔɔ elɛɛ elɛŋ nɛ Yezu. Ye nabɛ ɛ́ Moiiz bɛ nɛ Eli. 31 Bɛ eezɛtuula kuku mɛkas ɛ Zɛɛb. Bɛ nɛ Yezu nadi elii dum nɛ tyee nyɛ aasilal lwomel’ɛ ɛ, nɛ dáa nyɛ aakɛgwyɛ pɛ Yeluzalɛm ɛ. 32 Tinaak, Pyɛɛd nɛ bot ɛ lɔɔg’ɛ eezɛduma é gɔ́, syaaaz. Dáa bɛ nakadjem ɛ, bɛ eezɛbee mɛkas ɛ Yezu nɛ bot ɛbá bɛ nɛ bɛnɔɔ nadi ɔ. 33 É di nadi náá, bot binɔk moo elik Yezu ɔ, Pyɛɛd eezɛke nɛ nɛ náá: «Ghɛŋ, ye goka ɛ́ náá, mena di wak. Djhoosumka epɛt elɛl: Wat yɔ, dhiiti yɛ Moiiz, yak wat kadi ɛ́ yɛ Eli.» Tinaak, nyɛ nadi ɛ́, ààgu sa nyɛ nadi eke ɛ. 34 É di nyɛ nadi elii deenek ɔ, eguud eezɛsul, zɛbutal bɛ. Bɛdjekel ɛ́ boozɛgwak bwoo é ɛbee dáa eguud di ebutal bɛ ɛ. 35 Tɔ eguud binek, gwood zokagék náá: «Nwyak ɛ́ Mɔn’am mɛ nazetɔ ɔ. Gwakeka nyɛ.» 36 Bhii gwood nazegék ɛ, ye nakalik ɛ́, Yezu nyɛ ɛmet. Bɛdjekel ɛ́ boozɛsyel tɛp tak, é ghɛŋ tak, bɛ nabɛ ɛ́ ààbaŋa bot etɛp ee bɛ nabee ɛ.

37 É yak ɛlu Yezu bɛ nɛ bɛdjekel ɛlɛl binɔk moo wyeed ɛtsok ɛlenek, wɔ gwaa zukamwaa nɛ mot zɛboma nɛ nɛ. 38 Tɔ ɛdhuu ɛ bot binɔk, mot ngɔt moo tin etsim: «Lyoel, mɛ ɛpedjaala nɛ nɔ, kɛla mis kɔ mɔn’am. Yɛ ɛ́ sim mɔn’am! 39 Etɛɛ náá, mbee sisim wat nɛ dyeebamɛt nyɛ, é di tak wat nyɛ ɛpekyeeb, bhii tak, ye kadheeg nyɛ ɛ́ ɛlyelɛpe, é di tak wat, mɛwyil moo ewyis é nuub mɔn. Mbee sisim tak ɛpezuk nyɛ ɛlyelɛpe, ɛdus ɛ lɛ tin nɛ lyel. 40 Ye bɛ ɛ́, mɛ eedjala nɛ bɛdjekel bɔ náá, bɛ sɔ mbee sisim tak. Bɛ ààpakwak yɛ.» 41 Yezu eezɛke nɛ nɔɔ náá: «Biyɔ bɛmbee ɛ bot, bot ɛ di ààdum koŋ nɛ Zɛɛb ɔ! Mɛlu mɛdhen kalik nɛ nam é ɛdi tɔ len? Baabela náá, mɛlu mɛdhen mɛ di egoka nɛ ɛmaad bin? Dha mɛ nɛ mɔn’ɔ wak.» 42 Dáa mɔn tak nazokunaa nɛ Yezu ɛ, wɔ gwaa, mbee sisim zɛghɛɛg nyɛ si. Bhii tak ye moo zɛdheeg mɔn’enɔk ɛlyelɛpe na bhuku-bhuku. Tin, Yezu eezɛbhɛm mbee sisim tak, mɔn eezɛtsak. Bhii tak Yezu eezɛbulal nyɛ é mɛmbɔ mɛ sɛɛg. 43 Ye nabɛ ɛ́ bot naadyeebadjoka mɛbwala mɛ Zɛɛb tin.

Dáa ye nabɛ náá, mot nɛ mot nabɛ ɛ́, nyɛ dinaa edjoka nɛ ɛsɔs etɛp djas Yezu nadi esa ɛ, Yezu ɛ́ boolɛɛ nɛ bɛdjekel bɛ náá: 44 «Bɛɛka mɛlɔ men ɛnyɔɛpe étɛp bi neebaal sa mɛ aalɛɛ bin ɛ: Ye kalik ɛ́ batsa Sɛɛŋɛlɛ Mɔn Mot neekaaa é mɛmbɔ mɛ bot.» 45 É di’enek, bɛdjekel nabɛ ɛ́, ààmɛt lo etɛp ee nyɛ nadi elɛɛ bɛ ɛ, etɛɛ náá, ɛsuk ɛ tak nadi bɛ ɛ́ syela étɛp bɛ needi ààmɛt yɛ. Bɛ nadi ɛ́ nɛ bwoo ɛ dji ɛ́ Yezu tɛp’enek.

46 Bɛdjekel moo tin ebe mɛso pak’ɔɔ étɛp bɛ neegu tɔ sama yɔɔ, ɛzɛ di dhil mot. 47 Yezu eezɛgu sa nadi edhaa pak’ɔɔ ɛ, wɔ gwaa, nyɛ zɛnɔɔ mɔɔ dhyeeb, nɛɛg nyɛ é ngwoob’ɛ. 48 Nyɛy nɛ nɔɔ náá: «Mot ɛ́ myaal mɔn’ak kɔ ɛsu ɛ kwyɛl nyɛ di nɛ yɛ nɛ nam ɔɔ, nyɛ myaal ɛ́ mam. Tin bela náá, mot ɛ myaal mɛ ɔɔ, nyɛ myaal ɛ́, mot nadhis mɛ ɔ. Etɛɛ náá, mot di mɔɔ dhyeeb pak biyɔ djas ɔ, yɛ ɛ́ nyɛy ɛ di boo-mot.»

49 Zaŋ eezɛke nɛ Yezu náá: «Ghɛŋ, bis eebee dhiiti mot esɔ embee esisim nɛ din ɛ lɔ. Bis eelyak nyɛ, etɛɛ náá, nyɛ ààkɛ lɔɔg wat mena nɛ bɛnɔɔ.» 50 Tin, Yezu eezɛbɔɔza nɛ nɔɔ náá: «Sa mot ààlyak nyɛ, etɛɛ náá, mot di ààbhina bin ɔ, yenɔk ɛ́ mot’en.»

51 Dáa ɛlu ɛ nabɛ náá, nyɛ neebyet tɔ gwoo ɛ, nadi yɛ eezekunaa ɛ, Yezu ɛ́ boozɛke nɛ lyem’ɛ wat náá: Nyɛ ɛpetɔ́ pɛ Yeluzalɛm. 52 Nyɛ ɛ́ bookyeed engoola-ngoola mɛbhaadal pɛ sok. Engoola-ngoola eezɛtɔ́, bɛ eezɛni tɔ dhiiti dɛl pɛ kyee dik Samaali étɛp bɛ neekoobal nyɛ di, nɛ esesɛɛ djas. 53 Tin, bot ɛ dɛl zokabyen náá, nyɛ nàsulal kɔ dɛl ɛ tak, etɛɛ náá, nyɛ nadi etɔ́ pɛ kyee dik Yeluzalɛm. 54 Dáa Zak nɛ Zaŋ bɛdjekel bɛ nagwak deenek ɛ́, bɛ ɛ́ boozɛke náá: «Ghɛŋ, wɔ ɛpekwyɛl náá, bis djóo du, dus tɔ gwoo étɛp ye neezɛdik bɛ?»

55 Yezu eezɛliig mis, bhɛm bɛ. Bhii tak, nyɛ moo edul bɛ mɛlɔ. 56 Bɛ eezɛtɔ́ pɛ dhiiti dɛl.

57 Yezu bɛ nɛ bot ɛ nadi egyee nɛ nɛ ɔ gba-gba kuku kyeed, wɔ gwaa, dhiiti mot zokake nɛ nɛ náá: «Mɛ ɛpekwyɛl ɛdu ɛ́ wɔ é mɛze djas wɔ aadi etɔ́ ɛ.» 58 Yezu zokazɛbɔɔza nɛ nɛ náá: «Bɛbhɛk ɛ́ nɛ eku, enen ɛ́ nɛ mɛk. Kabela náá, Sɛɛŋɛlɛ Mɔn Mot, nyɛ tok nɛ zeza nɛ di ɛdjaasi nɛ ɛwala.»

59 Nyɛ eezɛke nɛ nwyak dhiiti mot náá: «Dua mɛ.» Mot’enɔk eezɛbɔɔza nɛ nɛ náá: «Ghɛŋ, pookobet mɛ, mɛ pookokɛdel Saagam.» 60 Yezu eezɛbɔɔza nɛ nɛ náá: «Beta bot ɛ zegwyɛ ɔ bɛ del myoŋ mɛ bot bɔɔ. Yɛ bɛ wɔy ɔɔ, tɔ́a, kɛlyaal bot Ɛyoŋ ɛ Zɛɛb.» 61 Nwyak dhiiti mot eebaake yɛ náá: «Ghɛŋ, mɛ waadu wɔ. Pookobet náá, mɛ kɛ ɛmwana nɛ bot ɛ mɛbyel mam.» 62 Yezu eezɛbɔɔza nɛ nɛ náá: «Mot ɛ zemɛt awata, da nyɛ ɛ́ baake náá, nyɛ bulal mis, gwyák pɛ bhis ɔɔ, yenɔk tak ààpakɔa nɛ Ɛyoŋ ɛ Zɛɛb.»