1 Yezu naazɛdjóo bɛdjekel bɛ kam nɛ bɛbá. Bhii tak, nyɛ eezɛdjɛ bɛ eghɛŋ ɛsɔ embee esisim nɛ ɛtsik ɛ́ bot ɛ mɛbɛ́, zɛnɔɔ bot ɛ nadi nɛ edjam ɔ. 2 Beeka min mɛ bot ɛ lwoma kam nɛ bɛbá tak é: Mot mɛkɛn ɛ́ Simɔŋ nagetaa din Pyɛɛd ɔ, nɛ dhyeeb Andele, Zak bɛ nɛ dhyeeb Zaŋ bɔɔ bɛbá nabɛ ɛ́ bɔn ɛ Zɛbɛdɛ, 3 Filip nɛ Bhaatelemi, Toma zɛnɔɔ Matye nɔŋel epata e lapo, baazɛnɔɔ Zak mɔn Alfe, wɔ kabela ɛ́ Tade, 4 Simɔŋ mot di tɔ ɛdhuu ɛ bot ɛ nadi edjóoaa eZɛlɔt ɔ, zɛnɔɔ Yudas Iskaliɔt mot naka Yezu gha ɔ.

5 Yezu zokazɛlwom bɛdjekel bɛ kam nɛ bɛbá étɛp ɛsa mɛsa mɛ. Nyɛy nɛ nɔɔ náá: «Bi ɛ́ kookyee mɛl mɛ bot ɛ di ààbɛ bot ɛ mbyak eYuda ɔ. Sa bi ààni pɛ tɔ eghaada e bot ɛ Samaali. 6 Bi goka nɛ ɛtɔ́ ɛ́, pɛ daa bot ɛ mbyak Yisalaɛl di dáa ebhata ee nazewo ze ɔ. 7 Ze ɛ ze, gheegoolaka nɛ bot náá: "Ɛyoŋ ɛ di tɔ gwoo ɛ moo ɛ́ ɛkunaaɛpe!" 8 Tsikeka bot ɛ mɛbɛ́, gomalka bot ɛ zegwyɛ ɔ, tsikeka bot mɛbɛ́ mɛ ezezam ezezam bɔɔ, sɔka embee esisim. Esa ee bi bela ààbɔm-bɔmak ɛ, djɛka bot yɛ yii toto. 9 Nànɔɔka elɔɔd, àànɔɔ epata, ààbaanɔɔ-nɔŋak dɔɔ nɛ meea étɛp ɛwa tɔ mengwyɛ da tɔ́ nɛ yɛ. 10 Nànɔɔka mɛkoo mɛ di tɔ́aa nɛ yɛ mɛdjoŋ ɛ, nànɔɔka dhiiti kuwa, nànɔɔka edhiiti ekoko, nànɔɔka sek, étɛp ɛtɔ́ mɛdjoŋ nɛ yɛ, etɛɛ náá, mot di esa mɛsa ɔ goka ɛ́ nyɛ bela sa dek.

11 Bi ɛ kum kɔ dhiiti mɔɔ dɛl nɛghu kɔ ghaada ɔɔ, saaka mot di nɛ ghwyil ɛmyaal bin náá, bi sulal pɛ daa lɛ ɔ. Dika pɛ daa mot’enɔk, bi dus tin ɛ, yɛ bɛ bi moo twol kɔ dɛl ɛ tak ɔɔ. 12 Bi ɛ́ ni tɔ ndjaa mot ɔɔ, keka náá: "Bis eeswos bin ooo." 13 Yɛ bɛ náá, bot ɛ ndjaa tak eemyaal bin ɔɔ, tin, egwyem bin di nɛ nɔɔ. Tin, bɛ pɛɛ náá, bi nàsulal tɔ mendjaa mɔɔ ɔɔ, betka egwyem bin sik nɛ nen. 14 Yɛ bɛ náá, kɔ dhiiti dɛl nɛghu tɔ dhiiti ndjaa, bɛ eepɛɛ náá, bi nàsulal ɔɔ, bɛ byen ɛgwak bin ɔɔ, wyiska yebɔ kɔ dɛl ɛ́ tak, nɛghu tɔ ndjaa tak, da bi ɛ́ kut piib mɛko men. 15 Mɛ lɛɛ bin ɛ́ etɛp etsɛɛtsɛ náá, dwoo Zɛɛb aazɛpɛ́ɛ bot ɛ, dɛl ɛlenek aapɛ́ɛaa ɛ́ ɛlyelɛpe dhaa-dhaŋak epɛ́ɛ bot ɛ ghaada Sodɔm nɛ yii Ghomɔɔd.»

16 «Gwakeka! Mɛ kyeed bin tin ɛ́ dáa ebhata kuku eben. Dika nɛ etsoŋ dáa bɛnyɔ, da bi ɛ́ di bot ɛ edɛɛ dáa mɛgum. 17 Dika bɛtsoŋ ɛ bot, etɛɛ náá, bot ɛ́ waakɛpit bin sok bhwoob boo zɛɛga bɛtetɛp eYuda, bi ɛ́ waabiaa nɛ eghwyɛs tɔ mendjaa mɛ mendjaala mɛ eYuda. 18 Kɔ ɛsu ɛ lam, bi ɛ́ waakɛtaŋal pɛ daa ekukuma nɛ bɛmɛkoozi, zɛnɔɔ pɛ daa bot ɛ di ààbɛ bot ɛ mbyak eYuda ɔ, étɛp bi needi bɛtyaasɛs ɛ etɛp ee bi nazebee ɛ. 19 É sok bɛ aatɔ́ nɛ nen sok bhwoob boo zɛɛga bɛtetɛp eYuda ɛ, sa mot ààbem ba étɛp mɛkpa aawyis tɔ enuub bin nɛ dáa bi aataŋal ɛ. Mɛkpa mɛ taŋal ɛ́ waadjɛaa bin é di’enek wat. 20 Etɛɛ náá, ye tok biyɔ aakalii tin. Yɛ ɛ́ Sisim Sɛɛg’en ɛ aataŋal é di’enek.»

21 «Bɔn-nyɛɛg ngɔt ɛ waakɛkael pak’ɔɔ é ɛsaŋ ɛ́ náá, mɔn-nyɛɛg’ɔɔ neegóaa, dɔɔ nɛ bɛsɛɛg ɛ bɔn aazobaasa ɛ́ deenek nɛ bɔn bɔɔ. Bɔn ɛ́ waapit bɛbyael bɔɔ, bɔɔ kɛmɛtaa, kwyɛ ndjɛ sɔs, góaa. 22 Bot djas ɛ́ waabhina bin, étɛp din ɛ lam. Tin, bot ɛ aawa zii kɛkum pɛ ɛsik ɔ, bɛ waabela tsik. 23 É sok bi aadi kɔ dhiiti ghaada ɛ, bot ɛ ghaada tak ɛ di esa bin esa e ekokok nɛ etɛp ɛpes nɛ mezuk ɔɔ, kaabka, da bi ɛ́ tɔ́ pɛ dɛl ɛ sis. Mɛ lɛɛ bin ɛ́ etɛp e tsɛɛtsɛ náá, bi aanàkwaasilal ɛkɛ kɔ mɛl mɛ di kɔ kyee dik Yisalaɛl ɔ djas, ɛsok nɛ náá, Sɛɛŋɛlɛ Mɔn Mot zyɛ.

24 Ye tok nɛ djekel ngɔt di edhaa mot di elyo nyɛ ɔ. Ye tok nɛ mot-mɛsa di edhaa kukuma yɛ. 25 Djekel goka ɛ́, nyɛ di dáa lyoel yɛ, da mot-mɛsa ɛ́ di dáa kukuma yɛ. Kwyii nakuma mɛbyel ɛ́ koodjóoaa Bɛlzebul, "Aah" gwyata nɛ bot ɛ mɛbyel mɛ! Bɛ aazoleleeaa ɛ́ leeak.»

26 «Étɛp tak ɛ di náá, sa mot ààkaab bɛmbee ɛ bot binɔk. Dhiiti dwoo ɛ́ tak, dwoo di náá, esesɛɛ djas di syela ɛ́ waawyis é gwyɛ ɛ. Esesɛɛ djas di tɔ syaab ɛ waaguaa. 27 Tɛp mɛ di elɛɛ bin tɔ ghooghom ɛ, lɛɛka yɛ popoopwon é mwos dwoo. Etɛp ee bi nadi enyiiŋelaa tɔ ɛlɔ ɛ, tuudka yɛ ɛlyelɛpe kɔ emii e mendjaa. 28 Nàkaabka sa di egó epuud ɛ, etɛɛ náá, bɛ aanàkwaagó sisim. Bi goka ɛ́ nɛ ɛkaab ɛ Zɛɛb mot di nɛ ghwyil ɛgó sisim nɛ epuud tɔ du na kɔm-kɔm ɔ. 29 Tin, bɔɔ enen ebá tok wak ebɔmsaa nɛ ba mɔɔ falanga wat é? Bela náá, ngɔt pak’ɔɔ tok nɛ ghwyil ɛkwyit é bɔs, Sɛɛg’en ɛ di ààmyaal ɔɔ. 30 Deenek, bhoo e elo bin ɛ́ elaŋa. 31 Sa mot ààdi nɛ bwoo, etɛɛ náá, é mis ɛ Zɛɛb, bi ɛ́ nɛ boo mɛtaŋ, dhaa bɔɔ enen!»

32 «Mot aamyaal popoopwon é mis mɛ bot djas náá, nyɛ ɛ́ djekel’am ɔɔ, mam pe, mɛ waamyaal nyɛ é mis mɛ Saagam di tɔ gwoo ɔ náá, nyɛ ɛ́ ngbam. 33 Bela náá, mot aakɛla popoopwon é mis mɛ bot djas náá, nyɛ tok djekel’am ɔɔ, mam pe, mɛ waakɛla nyɛ é mis mɛ Saagam di tɔ gwoo ɔ náá, mɛ ààgu nyɛ!»

34 «Nàgekeka náá, mɛ nazyɛ kɔ ɛko ɛ bɔs ɛ́, étɛp ɛzɛwa egwyem tɔ bot. Mɛ nabɛ ɛ́ ààzyɛ, zɛwa egwyem nɛ ɛgwakel tɔ bot. Mɛ nazyɛ ɛ́ zɛkus ɛghuub nɛ ɛzɛbɛk ɛ bot. 35 Mɛ nazyɛ ɛ́ zɛwa membɛk pak sɛɛg nɛ mɔn mɔɔ motom, pak nyɛɛg nɛ mɔn mɔɔ moma, pak nakɔla nɛ bhɛɛbel. 36 Bot ɛ mɛbhuka men aadi ɛ́, bot ɛ mɛbyel men met. 37 Mot di ekwyɛl mot ngɔt pak sɛɛg nɛ nyɛɛg dhaa mɛ ɔɔ, mot tak ààkɔa nɛ nam. Mot di ekwyɛl mɔn’ɛ mɔɔ moma, nɛghu mɔn’ɛ mɔɔ motom dhaa mɛ ɔɔ, mot tak ààkɔa nɛ nam. 38 Mot ɛ di ààbɛp mɛlaaba mɛ, da nyɛ ɛ́ du mɛ ɔɔ, mot tak ààkɔa nɛ nam. 39 Mot aakwyɛl ɛkwyɛɛg tsik’ɛ dhaa mɛ ɔɔ, nyɛ waasu tsik’ɛ. Mot aakakwyɛl ɛsu tsik’ɛ étɛp ɛdu ɛ mɛ ɔɔ, nyɛ waabela tsik.»

40 «Mot aamyaal náá, bi sulal tɔ ndjaŋ’ɛ ɔɔ, nyɛ myaal ɛ́ mam. Mot aamyaal mɛ tɔ ndjaŋ’ɛ ɔɔ, nyɛ myaal ɛ́ mot nadhis mɛ ɔ. 41 Mot aamyaal ngoolel-Mɛkpa ɛ Zɛɛb tɔ ndjaŋ’ɛ, da dil nyɛ náá, nyɛ ɛ́ ngoolel-Mɛkpa ɛ Zɛɛb ɔɔ, nyɛ waabela efute ee di egyee nɛ ngoolel-Mɛkpa ɛ Zɛɛb ɛ. Mot di emyaal mot epiki, etɛɛ náá, nyɛ ɛ́ mot epiki ɔɔ, nyɛ waabela efute mot epiki di gyee nɛ yɛ ɛ. 42 Mɛ lɛɛ bin ɛ́ etɛp e tsɛɛtsɛ náá, mot aadjɛ dhiiti ba mɔɔ djekel’am ngɔt ba mɔɔ bɛɛlɛ mɛdii, etɛɛ náá, nyɛ ɛ́ djekel’am ɔɔ, nyɛ waabela efute bɛ.»