Mateus 14

Ɛsyee ɛ Zaŋ Nduuel-bot

1 É ghɛŋ tak, Eelood mot nadi mɛkoozi kɔ Yeluzalɛm ɔ, zokagwak menduk ɛ Yezu. 2 Nyɛ ɛ́ boozɛke nɛ bot ɛ mɛsa mɛ náá: «Yɛ ɛ́ Zaŋ Nduuel-bot ɛ baagom-gomak é! Yɛ ɛ́ étɛp tak ɛ nyɛ di nɛ ghwyil ɛsa bɛtɛ nɛ yenek endem e mɛbwala.»

3 Nɛ tsɛɛtsɛ, ye nabɛ ɛ́ mɛkoozi Eelood naalwom náá, bɛ mɛt Zaŋ, da bɛ ɛ́ kɔl nyɛ nɛ eghwooz. Bhii tak, bɛ naakɛwa nyɛ é membok. Ye nabɛ ɛ́ étɛp Eeloodhiaad, mwaa tel Filip, 4 etɛɛ náá, Zaŋ naake nɛ Eelood náá: «Dum nɛ etsi ɛ Moiiz*14.4 etsi ɛ Moiiz mot nabɛ ɛ́ ààgoka nɛ ɛba mwaa mɔn nyɛɛg, mɔn nyɛɛg dinaa ààgwyɛ., yɛ ààgoka náá, wɔ dɛk Eeloodhiaad mwaa tel’ɔ!» 5 Étɛp tak ɛ Eelood nakadi esaa dáa nyɛ aasa étɛp nyɛ neegó Zaŋ. Nyɛ nadi ekaab ɛdhuu ɛ bot ɛ mbyak eYuda, etɛɛ náá, bɔɔ djas nakeke ɛ́ náá, Zaŋ Nduuel-bot nabɛ ɛ́ ngoolel-Mɛkpa ɛ Zɛɛb.

6 Tinaak, é dwoo ɛbyoŋ ɛ Eelood di eduwal ɛbyel ɛlɛɛ ɛ, ɛsyes ɛ Eeloodhiaad naabɔl é mis mɛ bɛdjoŋ ɛ nadjóoaa é ɛbyoŋ ɔ. Eelood naadyeebamyaala nɛ ko zɛŋ ɛsyes ɛ tak. 7 Tin, mɛkoozi Eelood ɛ́ booke nɛ ɛsyes ɛ mɔɔ moma yenɔk náá: «Myoŋ nɛ mɛsoŋ mam! Waaba esa ee lyem’ɔ kwyɛl ɛ djas, mɛ waadjɛ wɔ!» 8 Ɛsyes ɛlenɔk zokazɛwaab sa nyɛɛg nalɛɛ nyɛ ɛ. Nyɛy náá: «Mɛ kwyɛl ɛ́, wɔ djɛ mɛ nenak yak lo ɛ Zaŋ Nduuel-bot kɛla kɔ pɛt kongo na pyaaz!» 9 Wɔ gwaa, ye sa Mɛkoozi Eelood nyel wɔyɔŋ nɛ ghoŋ. Tin, nyɛ nabɛ ɛ́ ààkabɛ nɛ tyee nyɛ pɛɛ, etɛɛ náá, nyɛ naazetuwal myoŋ nɛ mɛsoŋ mɛ é mis mɛ bɛdjoŋ. Nyɛ ɛ́ boozɛlɛɛ nɛ bot bɛ náá, bɛ djɛ nyɛ sa nyɛ waab ɛ. 10 Tin, nyɛ eezɛlwom dhiiti mot étɛp nyɛ neekɛtsaal lo ɛ Zaŋ Nduuel-bot pɛ nyɛ nadi tɔ membok ɛ. 11 Wɔ gwaa, bɛ zokazyɛ nɛ lo ɛ Zaŋ kɔ pɛt kongo na pyaaz, bɛ eezɛdjɛ ɛsyes ɛ mɔɔ moma yenɔk. Tin, ɛsyes ɛ tak ɛ́ boonɔɔ yɛ, kɛdjɛ nɛ nyɛɛg. 12 Tin, bɛdjekel ɛ Zaŋ ɛ́ boozɛnɔɔ muu’ɛ, kɛdel. Bhii tak, bɛ ɛ́ boozɛtɔ́ kɛbaŋa Yezu etɛp djas nadhaŋ ɛ.

Yezu eedjɛ bot bɛmil ɛtɛn edee

13 Dáa Yezu nagwak etɛp binek djas ɛ, nyɛ ɛ́ boodus tin, nyɛ eezɛni tɔ elɛɛd, tɔ́, kɛsaa di ɛwala pɛ bot aadi ààbee nyɛ ɛ. Ghuna ɛdhuu ɛ bot naagu ze nyɛ natɔ́ ɛ, wɔ gwaa, zukamwaa nɛ mot nadus pɛ mɛl mɛ nadi é mengwoob tin ɔ, zokazɛdu nyɛ nɛ mɛko mbaka-mbaka nɛ dii. 14 Dáa Yezu nasul tɔ elɛɛd ɛ, nyɛ kabee ɛ́ ɛdhuu ɛ bot binɔk, ye nabɛ ɛ́, ghoŋ naasa nyɛ ɛlyelɛpe. Nyɛ moo tin etsik membel mɔɔ. 15 Dáa bɛ nabee náá, dwoo moo ɛ́ bikoko ɛ, bɛdjekel ɛ́ boozɛtiila pɛ daa lɛ. Bɔɔ nɛ nɛ náá: «Dwoo eezeleega, tɔ kakoŋ’ak, ye tok nɛ bɔɔ mɛl. Swaala bot bak étɛp bɛ neekɛsaa edee pɛ bɔɔ mɛl mɛ di é mengwoob’aak.» 16 Yezu ɛ́ boozɛbɔɔza nɛ nɔɔ náá: «Yɛ ààgoka náá, bɛ swaalaaa, djɛka bɛ edee biyɔ bɛmet!» 17 Tin, bɛ ɛ́ boozɛke nɛ Yezu náá: «Zuka nɛ sa bis di nɛ yɛ wak ɛ, yɛ ɛ́ etsim e emapa etɛn nɛ bɛsu ɛbá.»

18 Yezu ɛ́ boozɛke nɛ nɔɔ náá: «Dhaka nɛ yɛ wak.» 19 É di’enek, nyɛ ɛ́ boozɛke nɛ mɛdhuu mɛ bot ɛ nadi tin ɔ náá, bɛ disi mendiindil kɔ bɔɔ eka e na bes. Bhii tak, Yezu ɛ́ boozɛnɔɔ emapa etɛn nɛ bɛsu ɛbá binek, nyɛ eezɛben mis pɛ ɛko, ghaapɛɛ Zɛɛb. Nyɛ eezɛpyak emapa, nɔɔ, djɛ bɛdjekel bɛ. Bɛdjekel ɛ́ boozɛnɔɔ yɛ, kaa, djɛ ɛdhuu ɛ bot ɛ nadi tin ɔ. 20 Mot nɛ mot naadɛ, djil. Wɔ gwaa, bɛdjekel baabula nɛ mɛbhubhwak mɛ ebil e emapa nɛ bɛsu ɛ nalik ɛ, ye naalwoodal mɛbhwaa kam nɛ ebá. 21 Bot ɛ nadɛ emapa nɛ bɛsu binek ɔ, nabɛ ɛ́ tyee botom bɛmil ɛtɛn (5 000), ààkalaa mɛtaŋ mɛ boa nɛ bɔɔ dhyeeb.

Yezu eezɛkɛ kɔ dii

22 Batsa bhii tak, Yezu eezɛlwom bɛdjekel bɛ náá, bɛ ni tɔ elɛɛd, tsaal, tɔ́ pɛ yii kyiid boo soob na djato-djato. Tin, nyɛ eezɛlik étɛp ɛswaal ɛ́ zukamwaa nɛ bot binɔk pɛ mendjaa mɔɔ. 23 Bhii nyɛ nazeswaal bɛ ɛ, nyɛ ɛ́ boo zɛbyet kɔ ɛtsok étɛp ɛkɛdjaala Zɛɛb. Dáa dwoo nabɛ náá, yɛ eezesila ɛ, nyɛ nakalik tin ɛ́ nyɛ ɛmet. 24 Elɛɛd nabɛ ɛ́ ye moo ɛtsetaɛpe nɛ ɛboŋ. Wɔ gwaa, boo ghuu zɛpupal kɔ dii, tin, bhuuge moo tin enyuŋa é elɛɛd, etɛɛ náá, pup nadi ebulal bɛ elɛɛd pɛ bhis. 25 Ɛwala ɛ mɛsik é pum, wɔ gwaa Yezu zɛsul kɔ dii, nyɛ moo tin edu bɛdjekel bɛ. Nyɛ nadi ekɛ ɛ́ nɛ mɛko mɛ kɔ dii. 26 Dáa bɛdjekel bɛ nabee nyɛ ekɛ kɔ dii ɛ, bwoo naasa bɛ ɛlyelɛpe. Bɔɔ náá: «Nwyak ɛ́ dim!» Bɛ moo nɛ bɛbebwol etsim. 27 Batsa deenek, Yezu eezɛdjóo bɛ. Nyɛy náá: «Nàbemka ba, saka mɛghaaz, yɛ ɛ́ mam.»

28 Dáa Pyɛɛd nabee deenek ɛ́, nyɛ ɛ́ boozɛke nɛ Yezu náá: «Ghɛŋ, yɛ bɛ náá, yɛ ɛ́ tsɛɛtsɛ náá, yɛ ɛ́ wɔy ɔɔ, kea náá, mɛ kɛ kɔ dii, zyɛ pɛ wɔ di’enek.» 29 Yezu ɛ́ boozɛke nɛ nɛ náá: «Dha!» Tin, Pyɛɛd ɛ́ boozɛwyis tɔ elɛɛd, sul kɔ dii. É di’enek, Pyɛɛd moo ekɛ kɔ dii nɛ mɛko mɛ, etɔ́ pɛ kyee Yezu nadi ɛ́. 30 Tinaak, dáa nyɛ nabee náá, ghuu naalyel pyep ɛ, wɔ gwaa bwoo zɛsa nyɛ. É di tak wat, nyɛ moo diida tɔ dii, nyɛ ɛ́ boozɛtsim ɛlyelɛpe náá: «Ghɛŋ, tsika mɛ!» 31 É di tak wat, Yezu ɛ́ boozɛsɛɛb mbɔ, wɔ gwaa, nyɛ zokamɛt Pyɛɛd, nyɛ ɛ́ booke nɛ nɛ náá: «Étɛp yé wɔ be mɛso? Ɛmyaal ɛ lɔ ààdyeebabɔk.» 32 Bhii tak, bɔɔ djas bɛbá eezɛgo tɔ boo elɛɛd. Tin, ghuu yenek eezɛsila. 33 É di’enek, bɛdjekel ɛ nadi tɔ elɛɛd ɔ, zokazyɛ, zɛkwyit mɛboŋ si mɛko ɛ Yezu. Bɔɔ nɛ nɛ náá: «Yɛ ɛ́ tsɛɛtsɛ náá, wɔ ɛ́ Mɔn ɛ Zɛɛb!»

Tsik membel pɛ kyee dik Ghenezalɛt

34 Bhii bɛ nasɛɛ dii ɛ, bɛ ɛ́ boozɛtɔ́ pɛ kyee dik Ghenezaalɛt. 35 Dáa bɛ nakum é di’enek ɛ, wɔ gwaa, bot ɛ dɛl ɛ tak zokazɛgwyak Yezu. Tin, lɛŋ ɛ ɛkum ɛ Yezu zokadjala mɛl djas, wɔ gwaa, bɛ zokazyɛ nɛ membel djas bɛ nadi nɛ nɔɔ ɛ. 36 Bot ɛ tak ɛ́ boozɛdjaala nɛ Yezu náá, nyɛ bet membel djas, bɔɔ bɛmet zokee-keeak ɛlɔ ɛ ndjookuwa yɛ. Tin, bot djas namɛt nyɛ ɔ nabɛ ɛ́ bɛ naatsak.