1 Dáa Yezu nadi ewyis tɔ kok Ndjaa-ebuwa ɛ, bɛdjekel eezɛtiila pɛ daa lɛ, étɛp bɛ neelyaal nyɛ zumal Ndjaa-ebuwa. 2 Tin, Yezu eezɛlii nɛ nɔɔ, nyɛy nɛ nɔɔ náá: «Bi ɛpebee esa djas di tin ɛ? Mɛ lɛɛ bin ɛ́ etɛp e tsɛɛtsɛ náá, yɛ aanàkabaalik é di yak ɛkok ɛ wat kɛla kɔ sɔ ɛkok é ndjaa bi di bee’aak. Etɛɛ náá, djas aadi ɛ́, bik, waazel, see é bɔs.»

3 Yezu eezɛdisi kɔ ɛtsok ɛ pyeeb oliv, bɛdjekel eezɛtiila é ngwoob’ɛ. Bɔɔ nɛ nɛ náá: «Lɛɛa bis esesɛɛ binek aasael den? Lyaala bis endem e bis aagu náá, wɔ moo kɔ nɛ ɛbula nɛ náá, bɔs moo ɛ́ kɔ ɛsi ɛ.» 4 Yezu eezɛbɔɔza nɛ nɔɔ náá: «Dika nɛ etsoŋ, sa mot ààkɔɔ bin. 5 Etɛɛ náá, bɛtɛ nɛ bot ɛ́ waazyɛ nɛ din ɛ lam. Bɛ waalɛɛ bin náá: "Yɛ ɛ́ mam ɛ di Klisto!" Bɛ waasa náá, bot ɛbuɛpe kat ɛdum koŋ nɛ Zɛɛb. 6 Bi ɛ́ waagwak bot elii etɛp e mɛɛb é ngwoob’en nɛ menduk mɛ mɛɛb mɛ di pɛ ɛtseta ɛ. Sa mot ààbem ba etɛɛ náá, ye goka ɛ́, esesɛɛ binek sɛ́ɛ. Tin, guka náá, yenek tok mɛsi mɛ bɔs. 7 Dhiiti mbyak ɛ́ waaghɛɛ, kɛlumla dɛɛb nɛ yak mbyak. Dhiiti ɛyoŋ ɛ́ waakɛghɛɛ, kɛlumla dɛɛb nɛ yak ɛyoŋ. É bɛdhiiti edi, bɔs ɛ́ waakuu, pwom edee ɛ́ waani kɔ mɛl. 8 Mɛzel menek djas aadi ɛ́ dáa endem e mɛkɛn ɛsuula ɛbyel ɛ mɔn. 9 Bot ɛ́ waakɛpit bin, étɛp bi neezukaa. Tin bot ɛ́ waagó bin. Membyak djas ɛ́ waabhina bin kɔ ɛsu ɛ lam. 10 É sok’enek, bot ɛbuɛpe ɛ́ waakat ɛdum ɛ koŋ nɛ Zɛɛb. Bot ɛ́ waapitel pak’ɔɔ. Bɛdhiiti ɛ́ waabhina bɛsɔ bɔɔ. 11 Bɛtɛ nɛ bɛngoolel ɛ Mɛkpa ɛ Zɛɛb yii mɛkɔŋ ɛ́ waatuula, bɛ waakɔɔ bot ɛbuɛpe. 12 Dáa ye di náá, embee esa ɛ́ waazɛdhaa tɔ elyem e bot ɛ, kwyɛl tɔ elyem e bot ɛbuɛpe ɛ́ waatyaala. 13 Tin, mot aakɛ nɛ ɛwa zii, kɛkum pɛ ɛsik ɔ, nyɛ waabela tsik. 14 Mbɛɛ Bhaadal dum nɛ Ɛyoŋ ɛ Zɛɛb aadi ɛ́ egoolel kɔ ɛko ɛ bɔs nɛ tɔ membyak djas, étɛp bot djas di ààgu Zɛɛb ɔ neegwak yɛ. Bhii tak ɛ ɛsi ɛ bɔs aakakum.»

15 «É ghɛŋ bi aabee "etɛp e ɛpes nɛ puluk", yii ngoolel-Mɛkpa ɛ Zɛɛb Dhanyɛl nalɛɛ ɛ, yɛ eezebe di tɔ Di na Dɛɛ ɔ, ye goka ɛ́ bot ɛ di egu ɛlaa mɛkana ɔ tiibal ɛnyɔɛpe! 16 Étɛp tak ɛ di náá, bot aadi pɛ kyee dik Yude ɔ, kan kaab, tɔ́ pɛ tɔ mɛtsok. 17 Mot aadi kɔ mii ndjaŋ ɔ nàbaasul pɛ si zɛni tɔ ndjaa étɛp ɛkɛnɔɔ sonok. 18 Mot aadi tɔ pyeeb ɔ, nàbaasik pɛ dɛl, kɛnɔɔ ndjookuwa yɛ. 19 Haaa kpaa-ghoŋ dwoo lenek nɛ boa aadi nɛ mɛbum ɔ, zɛnɔɔ boa aadi nɛ bɔn edɛ mɛbel dwoo lɛɛg ɔ! 20 Djaalaka nɛ Zɛɛb étɛp, bi ɛ́ zɛkɛwyis ekaab é mbu kwol, nɛghu é dwoo saba! 21 Etɛɛ náá, é ɛwala tak aadi ɛ́ ɛwala mezuk, mezuk mɛ wat di náá, ye dinaa ààpabeeaa, kana bɔs nakusel ɛ, kɛyaka nɛ dwoo pan mos’ak. Yɛ aanàkwaakabaabɛ nɛ mbi mezuk deenek. 22 Zɛɛb ɛpedi ààsa náá, mɛlu mɛ tak di ààdyeebabɔya ɔ, pe ye tok nɛ mot aatsak. Yɛ ɛ́ kɔ ɛsu ɛ bot ɛ nyɛ nazesɛ́ɛ ɔ, mɛlu mɛ mezuk menek di ba bim. 23 Dhiiti mot ɛ lɛɛ bin náá: "Beeka Mɛsia di wak é!" nɛghu nyɛ kalɛɛ bin ɛ́ náá: "Mɛsia ɛ́ poon!" ɔɔ, sa mot ààmyaal nyɛ. 24 Etɛɛ náá, bɛmɛsia mɛ etsal nɛ bɛngoolel ɛ Mɛkpa ɛ Zɛɛb yii mɛkɔŋ ɛ́ waatuula ɛbuɛpe. Bɛ waasa etɛp e mɛbwala nɛ bɛmɛvyɛkɛlɛ ɛbuɛpe étɛp bɛ neekɔɔ bot, dɔɔ nɛ bot ɛ Zɛɛb nazesɛ́ɛ ɔ. 25 Gwakeka, mɛ dul bin mɛlɔ ɛsok nɛ esesɛɛ binek kum tɔ len.

26 Yɛ bɛ náá, bɛ lɛɛ bin ɛ́ náá: "Beeka, nyɛ ɛ́ pɛ tɔ bal!" ɔɔ, nàtɔ́ka. Nɛghu bɛ kalɛɛ bin ɛ́ náá: "Beeka, nyɛ eesɔwa wak!" Sa mot ààmyaal, nyɛ tok tin. 27 Dáa ngwyes bhi di ekas tɔ gwoo ɛ, dus pɛ ɛdjem ɛ dwoo, kɛtɔ́ pɛ ɛbil ɛ dwoo ɛ, Sɛɛŋɛlɛ Mɔn Mot aazyɛ ɛ́ deenek. 28 Enen ee di edjóoaa mɛbɛk * ɛ di ekii tɔ gwoo ɔ, keka náá, muu tit ɛ́ tin.»

29 «Ààbɔya batsa bhii ɛwala ɛ mezuk menek aadhaŋ ɛ, bi ɛ́ waabee náá, gwyes ɛ́ waagwyiid suuut, ngɔn aanàkabaakas, ekwyikwyen ɛ́ waadus tɔ gwoo, bil si, esa e mɛbwala djas di tɔ gwoo ɛ waadheegel. 30 Tin, ndem ɛ Sɛɛŋɛlɛ Mɔn Mot ɛ́ waanyen tɔ gwoo. Membyak djas di kɔ bɔs ɛ, yɛ aadi ɛ́, tɔ etsim nɛ mɛgwyɛ. Tin, bɛ waabee Sɛɛŋɛlɛ Mɔn Mot esul tɔ eguud e gwoo nɛ bɛtɛ nɛ mɛbwala nɛ duma. 31 Boo tɔŋ ɛ́ waalɔɔel. Tin, nyɛ waalwom efofop pɛ é edum e bɔs djas, bɛ neekɛsɛɛg bot djas Zɛɛb nazesɛ́ɛ ɔ, kana pɛ yak edum e gwoo, kɛyaka nɛ pɛ yak edum.»

32 «Nɔɔka etsoŋ nɛ kana yak, dum nɛ le fiigh. Yɛ bɛ náá, elɛɛ bɛ moo zɛbula ebes ɔɔ, eka moo baakwyil é tak ɔɔ, guka náá, mbu gwyes moo kunaa. 33 Yɛ ɛ́ tyee wat nɛ biyɔ, é sok bi aabee endem binek moo nyen ɛ, guka náá, ɛbula ɛ Sɛɛŋɛlɛ Mɔn Mot moo zɛkunaa. Nyɛ moo ɛ́ é ngwoob ɛbɛ ɛ ndjaŋ’en. 34 Mɛ lɛɛ bin ɛ́ etɛp e tsɛɛtsɛ náá, bot ɛ kɔkɔ membu mak aanàkwaagwyɛ djas esonok bak ààsael. 35 Gwoo nɛ bɔs ɛ́ waadum, yɛ kabɛ Mɛkpa ɛ Zɛɛb ɔɔ, yɛ aalik ɛ́ kɔm-kɔm sii nɛ kɔm.»

36 «Yɛ kabɛ dum nɛ dwoo nɛ ɛwala ɛ esesɛɛ binek aasael ɛ, ye tok nɛ mot ngɔt di egu, ààkobɛ-bɛak efofop tɔ gwoo, dɔɔ nɛ Mɔn ɛ Zɛɛb pe ààgu dwoo tak. Yɛ ɛ́ Sɛɛg nyɛ ɛmet ɛ di gu. 37 Ɛbula ɛ Sɛɛŋɛlɛ Mɔn Mot aadi ɛ́, dáa sa nasael é ghɛŋ ɛ Noe ɛ. 38 Etɛɛ náá, é ghɛŋ tak, ɛsok nɛ boo bhyoŋ nɛ zyɛ, bot nadi ɛ́, tɔ mɛmyaala, edɛ edee, edɛ mɛnyok, eba boa, ekyeed mɛsyes mɔɔ é mɛba, kɛkum dwoo Noe nani tɔ mɛsuwa ɛ. 39 Bot nabɛ ɛ́ ààbis, kɛkum dwoo boo bhyoŋ nazɛsilal bɔɔ djas na bhɛɛɛ ɛ. Yɛ aabaadi ɛ́, deenek dwoo Sɛɛŋɛlɛ Mɔn Mot aabula ɛ. 40 É ghɛŋ tak ɛ́ di náá, bot ɛbá ɛ́ waadi tɔ pyeeb, ngɔt ɛ́ waanɔŋaa, nwyak ngɔt ɛ́ waalik. 41 Boa ɛbá ɛ́ waadi edum bhum tɔ bwak wat, ngɔt ɛ́ waanɔŋaa, nwyak ngɔt ɛ́ waalik.

42 Dika nɛ etsoŋ! Bɛɛka mis etɛɛ náá, bi ààgu dwoo Ghɛŋ’en aaboobula ɛ́. 43 Gwakeka sa mɛ di elɛɛ ɛ, yɛ bɛ náá, nakuma ndjaŋ ɛpedi egu ɛwala ɛ pum mot djii aazyɛ zɛdjii tɔ ndjaŋ’ɛ ɔɔ, pe nyɛ aanàkwaadja gɔ́, étɛp nyɛ neelu mot djii yenɔk, nyɛ nàni tɔ ndjaŋ’ɛ. 44 Yɛ ɛ́ mɛ di elɛɛ bin náá, bi bɛɛ mis, nàpeebaka, etɛɛ náá, Sɛɛŋɛlɛ Mɔn Mot aatuula ɛ́ é ɛwala bi aadi ààgek náá nyɛ aatuula ɛ.»

45 «Ɛzɛ di mot-mɛsa na sosoob nɛ etsoŋ? Yɛ ɛ́ mot-mɛsa kukuma yɛ djɛ nyɛ mɛsa mɛ ɛbaal ɛ bɛsɔ nɛ ɛdjɛ bɛ edee bɔɔ é ɛwala bɛ di egoka nɛ ɛdɛ ɛ. 46 Mɛnyɔ nɛ mot-mɛsa menɔk, mot kukuma yɛ aabula zɛbela nyɛ, nyɛy esa mɛsa mɛ menek ɔ. 47 Mɛ lɛɛ bin ɛ́ etɛp e tsɛɛtsɛ náá: kukuma yenɔk ɛ́ waadjɛ mot-mɛsa menɔk esa bɛ djas nyɛ baal. 48 Yɛ di mbee mot-mɛsa ɔ, nyɛ aake náá: "Kukuma aanàkwaaleebula." 49 Deenek, nyɛ aadi ɛ́ ezuk bɛsɔ di esa mɛsa bɛ nɛ bɛnɔɔ ɔ, nɛ ɛkɛdedɛ bɛmɛnyok bɛ nɛ bot ɛ zegel mɛnyel mɔɔ tɔ mɛnyok ɔ. 50 Tin, kukuma yɛ aabula ɛ́ é dwoo nyɛ aadi epel náá, nyɛ aanàkwaazyɛ ɛ, é ɛwala mot-mɛsa di ààgu ɛ. 51 Kukuma yenɔk ɛ́ waasɔ mot-mɛsa menɔk. Da nyɛ ɛ́ lyaal nyɛ kyet bɛ di esa nɛ bot ɛ mɛdjhaaz pɛ ɛko, bhimis pɛ si ɛ. Bhii tak, nyɛ ɛ́ zɛzyegal nyɛ pɛ kel pɛ bot ɛ di edje mɛgwyɛ nɛ ɛkwaal ɛ mɛtsok di ɔ.»