1 Bɔn-nyɛɛg, bi nɛ gu ɛnyɔɛpe sa mɛ di ekwyɛl ɛlɛɛ bin ɛ, etɛɛ náá, bi nɛ gu etsi. Bi nɛ gu náá, etsi bela ghwyil kɔ mot ɛ, é sok di náá mot dinaa nɛ tsik ɛ. 2 Djhoopookonɔɔka geka moma ɛba: etsi ɛba ke ɛ́ náá, moma di bhaada nɛ ngom ɛ, é sok ngom di, nyɛ dinaa nɛ tsik ɛ. Tin, yɛ kabɛ náá, ngom eegwyɛ ɔɔ, nyɛ tokapɛ si bhel etsi e ɛba. 3 Nyɛ bela dhiiti motom sis ngom dinaa nɛ tsik’ɔɔ, nyɛ aakadjóoaa ɛ́ moma mɛzɔ. Tin, ngom ɛ gwyɛ ɔɔ, nyɛ moo ɛ́ pɛka si bhel etsi e ɛba. Deenek, nyɛ ɛ́ nɛ ghwyil ɛdi mwaa dhiiti mot ààbɛ náá, nyɛ sa ɛ́ ɛzɔ. 4 Yɛ ɛ́ tyee wat nɛ biyɔ bɔn-nyɛɛg bam, dum nɛ etsi, bi moo ɛ́ bi eezegwyɛ etɛɛ náá, bi ɛ́ mot ngɔt nɛ nyel ɛ Klisto. É di’enek, bi moo ɛ́ bot ɛ mot sis, mot nazegom pak myoŋ étɛp mena neesaka esa ee di enyɔ é mis ɛ Zɛɛb ɛ. 5 Etɛɛ náá, é ghɛŋ mena nadika mena dinaa ekɛka tɔ mɛkwosak mɛ epuud ɛ, etsi nadi esa náá, embee mɛkwosak mɛ esyem sa mɛsa tɔ mɛnyel mena. Etɛɛ náá, ye needul mena tɔ ɛsyee. 6 Nenak mena moo ɛ́ pɛka si bhel etsi, etɛɛ náá, mena naazegwyɛka kɔ ɛsu ɛ sa nadi esa náá, mena dika é ekwom ɛ. Menaka ɛ́ nɛ ghwyil ɛkabaasa mɛsa mɛ Zɛɛb tyee sis, é ze Sisim na Dɛɛ, ààkabaabɛ dáa ye nadi esesael é ghɛŋ sok é ze etsi ɛ.

7 É di’enek, bot aakake tin dáa? Etsi ɛ esyem é? Yɛ aanàkwaasael deenek! Etɛɛ náá, yɛ ɛ́ dum nɛ etsi ɛ mɛ di egu sa di syem ɛ. Deenek, yɛ ɛpedi ɛ́ di náá tsi nabɛ ɛ́ ààlɛɛ náá: «Sa wɔ ààwyeeb sa mot✝» ɔɔ, pe mɛ nabɛ ɛ́ ààgu syem di edjóoaa engwyeebel ɛ. 8 Tin, mesyem pyet ɛ́ kɔ mɛtiŋ, étɛp ɛsa náá, membi mɛ embee mɛkwosak djas neebyel tɔ lam. Etɛɛ náá, etsi ɛpedi ààbɛ ɔɔ, pe syem ɛ́ sa wat di náá yɛ eezegwyɛ ɛ. 9 É ghɛŋ na mwa, é sok etsi nadi ààbɛ ɛ, mɛ nadi ɛ́ nɛ tsik. Dáa mɛtiŋ nakazyɛ ɛ, syem eebela di. 10 Mam eezegwyɛ: Mɛtiŋ sa nabɛ náá, bot tsak nɛ ye ɛ, ye nakadul mam ɛ́ pɛ ze ɛsyee. 11 Etɛɛ náá, mesyem eebela ze ɛkɔɔ ɛ́ mɛ. Nyɛ kɔɔ mɛ ɛ́ dum nɛ mɛtiŋ. Yɛ ɛ́ kɔ ɛsu ɛ mɛtiŋ mɛ tak ɛ mɛ zegwyɛ’aak.

12 Deenek, etsi ɛ́ dɛɛ, tin mɛtiŋ ɛ́ dɛɛ, epiki nɛ ɛnyɔ. 13 Mɛtiŋ, sa nadi náá yɛ ɛ́ mbɛɛ sonok ɛ, ye moo nɛ nam mos ɛ́ ɛsyee? Yɛ aanàkwaasael deenek! Yɛ ɛ́ mesyem ɛ nakus tɛp tak. Syem eelyaal nɛ tsɛɛtsɛ sa nyɛ di ɛ. Mesyem pyet ɛ́ kɔ sa di ɛnyɔɛpe ɛ, étɛp ye neegó mɛ. Yɛ ɛ́ deenek ɛ́ mɛtiŋ nasa náá, mena guka náá, mesyem ɛ́ mbee sonok dhaa tyɛ.

14 Mena nɛ guka náá, etsi ɛ́ etɛp Sisim. Tin, mam ɛ́ mot epuud, mɛ naazebɔmsaa tyee kwom mesyem. 15 Mɛ ààgu sa mɛ di esa ɛ, etɛɛ náá, mɛ ààsa sa lyem’am di ekwos ɛ. Tin, mɛ sa ɛ́, sa mɛ di ebhina ɛ. 16 Nɛ tsɛɛtsɛ yɛ bɛ náá, mɛ sa ɛ́ sa lyem’am di ààkwyɛl ɔɔ, mɛ eemyaal náá, etsi nɛ nyɔ. 17 Nenak, ye tok mam di esa deenek, yɛ ɛ́ syem di tɔ lam ɛ di esa deenek. 18 Etɛɛ náá, mɛ nɛ gu náá, ye tok nɛ sa mɛnyɔ di tɔ lam, mɛ lii deenek ɛ́, dum nɛ epuud bam. Nɛ tsɛɛtsɛ, ɛkwosak ɛsa sa di enyɔ ɛ́ tɔ lam, tin, mɛ ààbela ghwyil ɛsa yɛ. 19 Etɛɛ náá, mɛ ààsa enɛm esa ee mɛ di ekwyɛl ɛsa ɛ, tin, mɛ sa ɛ́ etɛp ɛbiyo ee mɛ di ààkwyɛl ɛsa ɛ. 20 Yɛ bɛ náá, mɛ sa ɛ́ sa lyem’am di ààkwyɛl ɔɔ, ye tok mam di esa deenek. Yɛ ɛ́ syem di tɔ lam ɛ di esa deenek.

21 Tin, mam mot di ekwyɛl ɛsa enɛm esa ɔ, mɛ nɛ dyeebabee náá, mɛ zobela ghwyil ɛ́ yii ɛsa embee mɛsa. 22 Bela náá, tɔ bum lyem’am, mɛ nɛ dyeebamyaala nɛ etsi ɛ Zɛɛb. 23 É di’enek, mɛ ɛpebee náá, pɛ tɔ nyel’am, yɛ ɛ́ nɛ dhiiti etsi sis di tɔ zyaala nɛ etsi ee esiiza bam. Etsi tak ɛ di esa náá, mɛ di kwom etsi e mesyem di tɔ lam ɛ. 24 Haaa kpaa-ghoŋ nɛ nam! Ɛzɛ aapɛk mɛ nɛ nyel’ak di edul mɛ pɛ ze ɛsyee ɛ? 25 Djhoobulalka bhɔɔ nɛ Zɛɛb kɔ ɛsu ɛ Yezu Klisto Ghɛŋ’enaka!

Deenek, mɛ ɛ́ tɔ mɛsa mɛ etsi e Zɛɛb kɔ ɛsu ɛ esiiza bam. Tin, tɔ egwyes epuud, mɛ ɛ́ kwom etsi e mesyem.