1 Sa mɛ aalɛɛ ɛ, yɛ ɛ́ etsɛɛtsɛ, mɛ ààlɛɛ etsal, etɛɛ náá, mɛ ɛ́ mot ɛ Klisto. Sisim na Dɛɛ ɛpelyaal tɔ esiiza bam náá, mɛ lɛɛ ɛ́ sa di tsɛɛtsɛ ɛ. 2 Lyem’am ɛ́ nɛ boo ghoŋ dhaa tyɛ, nɛ pel wat di náá, yɛ ààsi ɛ. 3 Nɛ tsɛɛtsɛ, ɛkwosak ɛ lam ɛ́ náá, mam ɛmet bela ekɛlok ɛ Zɛɛb, mɛ neebɛka nɛ Klisto, étɛp ɛtsik ɛ́ bɔn-nyɛɛg bam, bot ɛ mbyak’am. 4 Bɔn-nyɛɛg bam tak ɛ́, bot ɛ mbyak Yisalaɛl. Zɛɛb naasa náá, bɛ di bɔn bɛ, nyɛ naalyaal bɛ duma yɛ. Nyɛ naasa ɛbhɛŋ nɛ nɔɔ, nyɛ naadjɛ bɛ etsi. Nyɛ naalyaal bɛ dáa bɛ di egoka nɛ ɛduwal nyɛ ɛ, nyɛ naadjɛ bɛ ekɛk. 5 Bɛ nadi ɛ́ bɔn bɛdha ɛ bɛbhaab ɛ Zɛɛb naloozesɛ́ɛ ɔ. Dɔɔ nɛ Klisto pe, nyɛ nabyel ɛ́ tɔ lɔɔg bɛdha ɛ bɛbhaab ɛ bot ɛ membyak menek, dáa bot djas di egoka nɛ ɛbyel ɛ. Nyɛy mot di Zɛɛb kɔ esonok djas ɔ, beta náá, duu di nɛ nɛ kɔm-kɔm sii nɛ kɔm. Amɛn.

6 Yɛ ààkwyɛl ɛlɛɛ náá, Mɛkpa ɛ Zɛɛb ààkaval. Etɛɛ náá, ye tok bot di kɔ kyee dik Yisalaɛl djas ɔ, di bɔn bɛdha ɛ bhaab, mot nadi edjóoaa Yisalaɛl ɔ. 7 Deenek, bɔn Abalaam djas tok bɔn nadus tɔ mɔ’ɛ ɔ, etɛɛ náá, Zɛɛb nalɛɛ nɛ Abalaam ɛ́ náá: «Yɛ ɛ́ dum nɛ Izak ɛ wɔ aabela bɛdha mɛ nakɛk wɔ ɛ✝.» 8 Ye kwyɛl ɛlɛɛ náá, ye tok bɔn di ebyel dáa bot di ezyɛ nɛ ɛbyel ɔ di bɔn ɛ Zɛɛb, yɛ ɛ́ bɔn nabyel dáa Zɛɛb nakɛk ɔ di ebeea dáa bɛtɛtɛ bɛdha. 9 Etɛɛ náá, mɛkpa mɛ ekɛk e Zɛɛb nalɛɛ ɛ́ náá: «É ɛwala bot di’ak, é mbu di ezyɛ yenek, mɛ aabula wak, mɛ aabela ɛ́, Saala eezebya mɔn motom✝.»

10 Yɛ ààpasik tin, djhoobaataalaka nɛ Lebeka, mɛwas mɛ nabɛ ɛ́ bɔn sɛɛg ngɔt, sɛɛg’ɔɔ nabɛ ɛ́ Izak bhaab’enaka. 11 Zɛɛb nalii nɛ Lebeka ɛ esok mɛwas mɛ bɛbá binɔk nadi bɛ dinaa ààbyel ɛ. Ye nabɛ ɛ́ bɔn dinaa ààsa enɛm esa, ààsa ɛbiyo. Yɛ bɛ náá, Zɛɛb nalii nɛ Lebeka deenek ɔɔ, yɛ ɛ́ étɛp ekɛk bɛ needi kɔm-kɔm. 12 Ekɛk e tak sael ɛ́ tɔ ɛkwosak ɛ lɛ, nɛ ndjóoel nyɛ di edjóo bot ɛ, ààbɛ kɔ ɛsu ɛ mɛsa mɛ bot di esa ɛ. Tin, nyɛ nake nɛ Lebeka ɛ́ náá: «Mɔn mɛgwyak mɔ aadi ɛ́ mot-mɛsa mɛ mɔn aabɔɔba nyɛ ɔ✝.» 13 Dáa Ekwyala di elɛɛ ɛ́ náá:

«Mɛ eekwyɛl Zakɔɔb, mɛ eebyen Ezau✝» ɛ.

14 É di’enek, mena aakake tin dáa? Zɛɛb tok piki? Yɛ aanàkwaasael deenek! 15 Tin, nyɛ eezɛke nɛ Moiiz náá: «Mɛ waagek ghoŋ nɛ mot lyem’am aakwyɛl náá mɛ gek nyɛ ghoŋ ɔ, nɛghu ɛsa enɛm nɛ embɛɛ nɛ mot di náá lyem’am aakwyɛl náá, mɛ sa enɛm nɛ embɛɛ ɔ✝.» 16 Deenek, ye tok ɛkwosak ɛ mot, ààkobɛ-bɛak nɛ ghwyil mot, yɛ ɛ́ nɛ ɛkwosak ɛ boo lyem ghoŋ Zɛɛb nyɛy ɛmet. 17 Zɛɛb nalɛɛ nɛ mɛkoozi mɛ dik Eziptɛ tɔ Ekwyala ɛ́ náá: «Mɛ nasa náá, wɔ di mɛkoozi ɛ́, etɛɛ náá, dum nɛ nɔ, mɛ neelyaal mɛbwala mam, étɛp din ɛ lam neegék kɔ ɛko ɛ bɔs djas✝.» 18 Deenek, Zɛɛb nɛ gek ghoŋ nɛ mot lyem’ɛ di ekwyɛl náá nyɛ gek nyɛ ghoŋ ɔ, é sok nyɛ di ekwyɛl ɛ, nyɛ nɛ sa náá, mot lyel lyem.

19 Wɔ ɛ́ nɛ ghwyil ɛke nɛ nam náá: «Étɛp yé, Zɛɛb di ebaadul mena mɛlɔ? Deenek, ɛzɛ aakoodi nɛ ghwyil ɛmaad sonok, yɛ bɛ náá, yɛ ɛ́ ɛkwosak ɛ lɛ ɔɔ?» 20 Wɔy, wɔy ɛ́ yɔ zɛ, wɔy mot epuud, étɛp wɔ neesuu mɛso nɛ Zɛɛb? Bhe dyak nɛ dji mot namɛ yɛ ɔ náá: «Étɛp yé wɔ mɛ mɛ dáak é✝?» 21 Mot di emɛ mɛbhe mɛ dyak ɔ, nyɛ ɛ́ nɛ ghwyil ɛmɛ sa nyɛ di ekwyɛl ɛ nɛ pɔtɔ dyak. Deenek, nɛ pɔtɔ dyak tak wat, nyɛ ɛ́ nɛ ghwyil ɛmɛ mɛbhe mɛ dyak étɛp mɛbyoŋ mɛ bot ɛ ghoŋ nɛghu, bɛdhiiti étɛp bɛ neebebe mɛlu djas✝.

22 Tin, Zɛɛb nadi ekwyɛl ɛlyaal ɛbuk ɛ lɛ ɛ, nɛ mɛbwala mɛ. Bela náá, nyɛ naadyeebamaad lyem kɔ ɛsu ɛ bot ɛ nadi egoka nɛ ɛbuk ɛ lɛ ɔ, bot ɛ nadi egoka nɛ ɛsyee ɔ. 23 Tin, nyɛ nabaakwyɛl ɛlyaal ɛ́ dáa mɛkas mɛ di eval nɛ bɛdhiiti bot ɛ, bot ɛ nyɛ di nɛ boo lyem ghoŋ nɛ nɔɔ ɔ, bot ɛ nyɛ naloozesɛ́ɛ, étɛp bɛ neebela di tɔ mɛkas mɛ ɔ. 24 Bot ɛ tak ɛ́ menabɛlka, menabɛlka bot ɛ nyɛ nadjóo ɔ, ààkabɛ tɔ sama eYuda nɛ eYuda, yɛ ɛ́, dɔɔ nɛ tɔ sama bot ɛ membyak mɛ sis. 25 Yɛ ɛ́ dáa nyɛ nalɛɛ tɔ mɛkana mɛ ngoolel-mɛkpa Oze ɛ:

«Bot ɛ nabɛ náá, bɛ tok bot ɛ mbyak’am ɔ,

mɛ aakadjóo bɛ ɛ́, "bot ɛ mbyak’am".

Bot ɛ mbyak mɛ nadi ààkwyɛl ɔ,

mɛ aakadjóo bɛ ɛ́, "bot ɛ mɛ di ekwyɛl ɔ"✝.

26 Tin, é di bɛ nake nɛ nɔɔ náá: "Bi tok bot ɛ mbyak’am ɔ,"

bɛ aakadjóoaa ɛ́, "bɔn ɛ Zɛɛb di nɛ tsik ɔ"✝.»

27 Deenek, ngoolel-mɛkpa Ezayi pɛ yɛ kyee, nyɛ nadi etuud dum nɛ bot ɛ mbyak Yisalaɛl ɛ́ náá: «Ye nakoozodi náá, bot ɛ mbyak Yisalaɛl nadi ɛ́ ɛbuɛpe dáa bɛsyɛ é ngwoob boo dii mɛsɔn, yɛ ɛ́ ba bim bot pak bot aalik ɔ, bɔɔ aakwaabela tsik, 28 etɛɛ náá, sa Ghɛŋ nake náá, nyɛ aasa ɛ, nyɛ waasa yɛ djas ghal-ghal kɔ ɛko ɛ bɔs✝.» 29 Yɛ ɛ́ dáa Ezayi nazeloolɛɛ ɛ:

«Yɛ ɛpedi ɛ́ ààdi náá, Ghɛŋ Sabhaɔt* nabɛ ɛ́ ààlik mena ba bɛdha ɔɔ,

pe bot moo ɛ́ dáa ghaada Sodɔm,

Pe bot ɛ́ tyee wat nɛ ghaada Ghomɔɔd✝.»

30 Mena aakeka dáa? Bot ɛ di ààbɛ bot ɛ mbyak eYuda ɔ, bɛ nabɛ ɛ́ ààdi esaa náá, bɛ di bot ɛ epiki é mis ɛ Zɛɛb. Tin, Zɛɛb naabee bɛ dáa bot ɛ epiki kɔ ɛsu ɛ ɛdum ɛ koŋ ɛ lɔɔ nɛ Zɛɛb. 31 Bela náá, bot ɛ mbyak Yisalaɛl, bot ɛ nadi esaa náá, bɛ di bot ɛ epiki é mis ɛ Zɛɛb dáa Etsi di elɛɛ ɛ, bɛ nabɛ ɛ́ ààbela yɛ. 32 Bɛ nadi ààbela yɛ étɛp yé? Etɛɛ náá, bɛ nabɛ ɛ́ ààdi esaa náá, bɛ di bot ɛ epiki é mis ɛ Zɛɛb kɔ ɛsu ɛ ɛdum ɛ koŋ ɛ lɔɔ nɛ nɛ. Bɛ nadi egek ɛ́ náá, bɛ aadi ɛ́ epiki bot, dum nɛ mɛsa mɔɔ. Bɛ eekɔa é «ɛkok ɛ di esa náá, bot bema ɛbɛk ɛ». 33 Ekwyala lɛɛ ɛ́ náá:

«Beeka, mɛ eewa tɔ ghaada Siyɔn,

ɛkok ɛ di esa náá, bot bema ɛbɛk ɛ,

bat ɛkok di ekwyesal bot ɛ.

Tin, mot di edum koŋ nɛ ɛkok ɛ tak ɔ,

nyɛ aanàkwaadhuselaa✝.»