1 Gwakeka mɛ, biyɔ bot ɛ mɛvu, djeka, simka, etɛɛ náá, mezuk ɛ́ waazyɛ kɔ len! 2 Mɛvu men eezepulel, bɛsɛs eezegɔɔ bin ekaad. 3 Elɔɔd bin nɛ epata bin moo ɛ́ nɛ emaa. Emaa e tak ɛ́ waagɔɔ bin mɛnyel nɛ ɛbaapit bin, yɛ waadik bin dáa du. Bɔs moo ɛ́ pɛ mɛsik, biyɔ bot ɛ di ekwom bɛtɛ nɛ mɛvu ɔ! 4 Bi eebyen ɛdjɛ bot ɛ mɛsa mɛ epyeeb bin efute bɔɔ. Deenek, bɛ ɛpetsim, guka náá, etsim e bot ɛ mɛsa mɛ tak eekum tɔ mɛlɔ ɛ Zɛɛb, Ghɛŋ Sabhaɔt. 5 Pɛ kɔ bɔs, bi di ɛ́ tɔ mɛnyɔ nɛ mɛvu, mɛnyel men moo ɛ́ nɛ mɛdɛl dáa bɛtit ɛ di kɛtsakaa ɛ. 6 Bi naazekwyesal bot ɛ epiki ndjɛ sɔs nɛ ɛgó bɛ. Bɛ ààpakopapela-papelak, bɛ naadjɛ bin mɛnyel.

7 Bɔn-nyɛɛg bam, dika nɛ zii nɛ bhwood kɛkum dwoo Ghɛŋ aabula ɛ. Beeka dáa mbɛel mɛbhek di nɛ ɛbwaalel é ɛbwood náá, bɛbhi pookokan ɛnee nɛ ɛsi, étɛp bɔs needjɛ nyɛ mbɛɛ mɛbhek ɛ. 8 Tin, ye goka ɛ́, bi di tɔ zii nɛ bhwood, nɛ mɛghaaz etɛɛ náá, ɛzyɛ ɛ́ Ghɛŋ eezekunaa.

9 Bɔn-nyɛɛg bam, nàlɛkaka pak’en, Zɛɛb ɛzɛkɛpɛ́ɛ bin. Tetɛp moo aakum, nyɛ moo ɛ́, é ɛniel ɛ ndjaa. 10 Bɔn-nyɛɛg bam, taalaka nɛ etɛp bɛngoolel ɛ Mɛkpa ɛ Zɛɛb nalii kɔ ɛsu ɛ Ghɛŋ ɛ: bɛ di nɛ nen dáa geka ɛmaad ɛ lyem nɛ esosoob tɔ mezuk. 11 Mena djóoka bɛ bot ɛ mɛmyaala ɛ́ etɛɛ náá, bɛ naadyeebapyet. Bi naagwak sesa ɛ Zɔɔb, dáa nyɛ namaad mezuk tɔ zii é bhwood ɛ. Bi nɛ gu dáa Ghɛŋ nasa nyɛ enɛm nɛ embɛɛ bhii tak ɛ. Tin, Ghɛŋ nɛ nyɔ, nyɛ nɛ gek bot ɛ di tɔ mezuk ɔ ghoŋ.

12 Bɔn-nyɛɛg bam, guka náá, sa mot ààtuwal myoŋ nɛ mɛsoŋ mɛ kɔ esa ee di tɔ gwoo, nɛghu kɔ bɔs ɛ. Tin, ààkotuwal yɛ dhiiti mbi ɛtuwal. Deenek, bi aazomyaal ɛ «heee», yɛ bɛ náá yɛ tsɛɛtsɛ ɔɔ. Nɛghu «ààbɛ», yɛ bɛ náá, ye tok deenek ɔɔ, étɛp ɛkaab náá, bi ɛ́ zɛkɛbela ndjɛ sɔs é mis ɛ Zɛɛb.

13 Yɛ ɛ́ nɛ mot tɔ len di tɔ mezuk é? Nyɛ ni tɔ mendjaala. Yɛ ɛ́ nɛ mot tɔ len di nɛ mɛmyaala? Nyɛ tii mɛdjeeb mɛ Zɛɛb. 14 Mot ngɔt ɛpebɛ́ tɔ len é? Deenek, nyɛ djóo bɛpaa ɛ zɛɛga mendjaala, bɛ djaala étɛp nyɛ neetsak, da bɛ ɛ́ so nyɛ mul kɔ lo nɛ din ɛ Ghɛŋ. 15 Tin, mendjaala di esael tɔ ɛdum ɛ koŋ nɛ Ghɛŋ ɛ, yɛ ɛ́ nɛ ghwyil ɛtsik mot ɛbɛ́. Yɛ bɛ náá, mot tak naasa mesyem ɔɔ, Ghɛŋ ɛ́ waapel nyɛ. 16 Vaaka mesyem men pak’en, tin da bi ɛ́ djedjaala pak’en, étɛp bi neetsak. Mendjaala mɛ mot epiki ɛ́ nɛ boo mɛbwala dhaatsɛ.

17 Ngoolel-Mɛkpa ɛ Zɛɛb Eli, nazobɛ ɛ́ mot dáa menabɛlka. Nyɛ naadjaala ɛbuɛpe etɛɛ náá, bhi needi àànee. Mendjaala mɛ naazɛsa náá, bhi di àànɔ kɔ bɔs membu melɛl nɛ pes. 18 Bhii tak, nyɛ naabaazɛdjaala-djaala sis. Tin, gwoo naasil mɛdhii mɛ bhi, bhii tak, bɔs naazɛdjɛ mɛbhek.

19 Bɔn-nyɛɛg bam, mot ngɔt tɔ len ɛ bɛka nɛ etsɛɛtsɛ ɔɔ, ye goka ɛ́ náá, mot ngɔt bulal nyɛ é ze. 20 Guka náá: Mot di dis mot mesyem tɔ mbee ze nyɛ natɔ́ ɛ, nyɛ eedis nyɛ tɔ ɛsyee. É di’enek Zɛɛb ɛ́ waapel zukamwaa nɛ mesyem mɛ.