1 Dupã aestã eara unã sãrbãtoari a Iudeilor sh-Isusul s-alinã tu Ierusalem 2 Tu Ierusalem, ningã Poarta a oilor, easti unã hãmami tsi pi uvreieshti s-acljeami Betesda, sh-ari tsintsi purtitsi. 3 Tu aesti s-afla unã multsãmi mari di lãndzits; orghi, shcljiochi sh-paralizatsi,* Cã un anghil, cãtã vãrãoarã dipuna tu hãmami sh-mintea apa, sh-protlu tsi intra, dupã tsi apa eara mintit, s-vindica di tuti lãngoarili. 5 Aclo eara un om niputut di treidzãtsioptu di anji. 6 Isusul, vidzãnda atsel ashtirnut shi shtinda cã di multu chiro eara lãndzit, lji-dzãsi: "Vrei s-ti fats sãnãtos?" 7 Lãndzitlu lj-apãndisi: "Doamne, mini nu am om tsi cãndu s-minteashti apa, s-mi bagã tu hãmami. Sh-pãnã mi duc mini, un altã dipuni nãinti di mini." 8 Isusul lji dzãsi: "Scoalã-ti, ljea patlu a tãu sh-imnã!" 9 Omlu s-vindicã tu oara atsea, lo patlu a lui sh-imnã. (Atsea dzuã eara Sãmbãtã.) 10 Trã atsea mãrlji a Iudeilor lji dzãsirã atsilui tsi s-vindicã: "Easti Sãmbãtã, nu easti tu lege trã tini s-ljeai patlu a tãu!" 11 Elu lã apãndisi a lor: "Atsel tsi mi vindicã nji dzãsi: ‘Ljea patlu a tãu sh-imnã!’" 12 Atumtsea elji lu ntribarã: "Cai easti atsel cai ts-dzãsi: ‘Ljea patlu a tãu sh-imnã’?" 13 Ma atsel tsi eara vindicat nu lu shtia cai eara, cã Isusul eara dipãrtat namisa di lumea tsi eara tu atsel loc. 14 Deapoea Isusul lu aflã tu templu sh-lji dzãsi: "Ia, tini ti vindicash! Nu amãrtisea ma tra s-nu pats tsiva ma arãu." 15 Deapoea omlu s-dusi sh-lã spusi a Iudeilor cã Isusul eara atsel cai lu vindicã.

16 Trã aestã, Iudeilji apãrnjirã su avina Isusul, cã fãtsea aesti lucri Sãmbãta. 17 Ma Isusul lã apãndisi a lor: "Tatãl a meu ma lucreadzã pãnã tora, sh-mini ma lucredz." 18 Trã aestã mãrlji a Iudeilor cãfta sh-ma multu s-lu vãtãma, cã nu mash ncãlca Sãmbãta, ma sh-trã atsea tsi dzãtsea cã Dumnidzãlu eara Tatãl a lui, shi s-fãtsea isa cu Dumnidzãlu. 19 Atumtsea Isusul lã apãndãsi a lor: "Dealihea ma vã dzãc, cã Hiljilu nu poati s-facã tsiva di la nãsu, dicãt mash atsea tsi veadi cã fatsi Tatãl. Lucrili tsi fatsi Tatãl, li fatsi tutashã sh-Hiljilu. 20 Cã Tatãl lu va Hiljilu a lui sh-lji aspuni itsido tsi fatsi, sh-va lji aspunã fapti ma mãri di aesti, tsi voi s-vã ciudisits. 21 Ashãtsi cum Tatãl nyeadzã mortsãlji sh-lã da atsilor bana, tutashãtsi sh-Hiljilu da bana a cuitsido tsi va. 22 Cã Tatãl nu giudicã vãrã, ma tutã giudicarea lji-u deadi a Hiljilui, 23 tsi tuts s-lu tinjiseascã Hiljilu ashãtsi cum tinjisescu Tatãl. Cai nu lu tinjiseashti Hiljilu, nu tinjiseashti Tatãl, tsi lu ari pitricut. 24 Dealihea ma vã dzãc: Atsel tsi ascultã zborlu a meu sh-pistipseashti la atsel tsi mi ari pitricut, ari banã eternã, sh-elu nu yini la giudicari, ma ari tricut di la moarti tu banã. 25 Dealihea ma vã dzãc, ma yini oara, meti ari vinitã, cãndu mortsãlji va s-avdã boatsea a Hiljilui a Dumnidzãlui, shi atselji tsi u au avdzãtã va s-bãneadzã. 26 Cã, ashã cum Tatãl ari banã tu nãsu, ashãtsi lji u ari datã sh-a Hiljilui s-aibã banã tu nãsu. 27 Shi lji ari datã tutashã s-aibã puteari s-giudicã, cã easti Hiljilu a Omlui. 28 Nu vã ciudisits di aestã, cã ma yini oara tsi tuts atselji tsi suntu tu murmintsã va u avdã boatsea a lui. 29 Elji va s-easã di la murmintsã, sh-atselji tsi au faptã ghinetsi, s-nyeadzã trã bãnari, iarã-atselji tsi au faptã arali, s-nyeadzã trã giudicari. 30 Mini nu pot s-fac tsiva di la mini. Giudic dupã atsea tsi avdu sh-giudicata a mea easti ndreaptã, cã nu caftu s-fac vrearea a mea, ma vrearea a Tatãlui tsi mi ari pitricut.

31 Macã mini mãrtirsescu trã mini, mãrtiria a mea nu easti alihioasã. 32 Easti un altu tsi mãrtirseashti trã mini, sh-mini u shtiu cã mãrtiria tsi fatsi elu trã mini easti alihioasã. 33 Voi avets pitricut la Ioanul sh-elu mãrtirsi trã alihea. 34 Tora mini nu am ananghi trã mãrtirii di la vãrã om, ma li dzãc aesti tsi voi s-ascãpats. 35 Ioanul eara unã cãndilã tsi s-ardi sh-lunjineadzã, shi voi vrut s-hãrsits di putsãn chiro tu lunjina a lui. 36 Ma mini am mãrtirii ma mari di atsea a Ioanului. Faptili tsi Tatãl nji ari datã sã mplinescu, atseali fapti tsi mini ma fac, mãrtirsescu cã Tatãl mi ari pitricut. 37 Tatãl tsi mi pitricu, elu idyiul ari mãrtirsit trã mini. Voi nu u avets avdzãtã pute boatsea a lui sh-nitsi nu u avets vidzutã fatsa a lui, 38 shi nu lu avets zborlu a lui tsi s-bãneadzã la voi, cã voi nu pistipsits la atsel tsi elu ari pitricut. 39 Voi cãftats Scriturili cã minduits s-avets prit eali banã eternã. Scriturili suntu aesti tsi mãrtirsescu trã mini. 40 Ma voi nu vrets s-yinits la mini tsi s-avets banã. 41 Mini nu am ananghi trã mãrirea a oaminjlor. 42 Ma mini vã cunoscu, tsi nu avets vreari trã Dumnidzãlu tu ininjli a voastri. 43 Mini am vinitã tu numa a Tatãlui a meu, sh-voi nu mi aprucheats, ma s-yinea vãrã altu tu numa a lui, voi va lu aprucheat. 44 Cum putets s-pistipsits voi, tsi loats mãriri di un-alantu, sh-nu cãftats mãrirea tsi yini di la singurlu Dumnidzã? 45 S-nu minduits cã mini vã acuzescu la Tatãl. Easti Moisiul tsi vã acuzeashti, la cai voi aveat nãdãit. 46 Macã voi va lj-pistipsit dealihea a Moisiului, va mi pistipseatã sh-mini, cã elu ari scriatã trã mini. 47 Ma macã voi nu pistipsits la scriturili a lui, cum va s-pistipsits la zboarili a meali?"