1 Imbe nyi zhu ri ame Bulus, riwa wa chu wen no wen me he nji ri ndu Yeso Kristo, nga vayi mbu Sastanisu ngawen ri tre ri yi. 2 Me ngan mbe nyi ri no yi biyi wawa bi kabru ri hu Izhi ri Koranti Izhi kayi dzi ri gran ritu no yi he riri rimi Kristo Yeso, a yo yi ritu no yi he wa Tstsri ri wau Izhi ko kutan wari ri bre Bachi Yeso Kristo, Bachi mba nga wambu ngawen:

3 Me ibreno A ti mbu Izhi nga Bachi Yeso Kristo ri no yi dindi ti nga sisron.

4 Me sondu ri ngiri ri Izhi ritu mbi riwa a ti dindi ti ri yi dzu riwo Yeso Kristo. 5 Ritu riwa bi katu mbi kabru ri Kristo bi kpa kyawa wa dindi wawu. Ari no yi bi to tre ritu kyawa wa Yuu, nga bi ri he ri gbengbren ri to kya riwa Izhi la yi. 6 Ngye bibi riwa Izhi tsro yi ri tre riwa a layi ritu Kristo he kpunji. 7 Izhi no yi kongye riwa bi wa, ritu ngamba bi ran hon he ri de riwa Yuu ran, bi ri gben ri mbiye riwa bi to Bachi mbu Yeso Kristo ngari. 8 Ari no yi gbengbren hi ri kre wan, ritu bi ran he ri meme ti kyari ri vi riwa Bachi mbu Yeso Kristo ri kɨma ye. 9 Izhi he riwa ari ti kya riwa a tre dzi, wawu nye yo yi no yi kabru tu ri vren wan Yeso Kristo Bachi mbu.

10 Me ibreyi, miri vayi, rimi nde Bachi mbu Yeso Kristo no yi nyɨme ri ngambi wawu ri kya riwa bi tre nga rimɨrembi no he riri. Ran ga ngambi ran tsede bi ka katu mbi kabru, bi ri ki ri rimɨren riri. 11 Imiri vayi won mirimba ri miriron, wari ri ko Kuluwi wa lawen iri bi wanyu ri ngambi. 12 Ikya riwa me tre he ri, wari rimi mbi wa tre ri,<<Wawa wa he riwa Bulus;>>Wari wa ri tre ri,<<Wawa wa he riwa Apolo nye;>>Nga wari wa tre ri, <<Wawa wa he wa Kefas,>> Nganga, wari wa tre ri,<< Ki he wa Kristo.>>

13 Ko enron, wa ga Yeso ti kaan kan? Bulus nye kuu ri tumbi? Ka wa son yi tu ri ima ri nde won Bulus? 14 Me ngiri ri Izhi riwa me ran son njo mbi tu ri ima ran ara nji hari, wa Kirbus mba Gayus wawa nye me son wa tu ri ima, 15 Ritu ngamba injo ran tre ri wa son yi tu ri ima rimi nde wan ran. 16 Me taka ri me son nji wa ko Istifanus tu ri ima, ama kugon wanyi me ran to ko me bru son njo tu ri ima ngaran. 17 Kristo ran ti wen ndu ri me son njo tu ri ima ran. A ti wen ndu ye no wen ye la wa tre ri raro. A ran he tre ritu wiwiri nji ran, ritu no wa ran tsri kuu Kristo ritu konkron ran.

18 Tre konkron riwa wa kpan Yeso ritu wan a he tre kuklu ri wawa wa ti meme ti nga wa ri he ri nkon kuu, ama a he gbengbren Izhi nye ritu mbu, kita wawa wa kpata ri chuwo: 19 A he rimi mbe Izhi ri:

<<Me dzi wiwiri nji wa wiwiri.>>

20 Inji wa wiwiri wa he rɨme? Wawa wa tsro doka Musa wa he kutan? Izhi tsro ri wiwiri ri mgbumbrume nyi he mkpɨranchi. 21 Ritu Izhi rimi wiwiri wan a tre ri wa wiwiri wana to Izhi rimi wiwiri mba ran ari bi ri Izhi no kpa wawa wa kpa nyɨme ri tre wan riwa ki bla wari wa kpa ri a he tre kuklu. 22 nji Yahuda wa wa wari to kyawa wa de sisiri, nga Helunawa wa wa wari fe wiwiri, 23 ama kita ki tre tre ritu Kristo riwa wa kpan-u ritu konkron, tre Izhi he tita riwa a ra nkon ri nji Yahuda nga ran he kuklu ri wawa wana he nji Yahuda ran. 24 Ama Izhi chu nji wari no wa kpanyɨme riwu, warimba wa nji Yahuda nga wari wana he nji Yahuda ran wawa wa kpa nyime ri Izhi wato ri Kristo nye he mgbemgbe nkon riwa Izhi riwa ari kpa wa chu wo, nga wiwiri riwa Izhi. 25 Ama imkpran riwa Izhi a han wiwiri riwa nji, nga ika senkpa Izhi a han senkpan nji.

26 Imiri vayi taka kya riwa bi ran he riwa wa yo yi tsawen rimi mbi wa he ri wiwiri riwa nji, a ran he kigbu mbi nye bi he wa rinkon ritu nji ran, nga tsawen rimi mbi nye wa miri wa rinkon. 27 Ama Izhi ri chu kya riwa a he ri mgbumgbrume nyi ri a he mkpen, ritu no shan no ti wa. wiwiri Izhi ri chu kyawa wawa nji wato ri wana senkpa ritu no no wa senkpa shan. 28 Kyawa wawa nji wa ban wa wana he kyawa ran, wawa nye Izhi ri ban wa tindu ri wa. 29 Izhi ti kya nyi ritu no njo ran kpo ngawan kusi Izhi ran. 30 Izhi nye riwa a kayi kabru ri Kristo riwa a he rita wawu ri Izhi, ri ngamba nye, ndindi ti mbu, Tsitsri nga kpa ta chuwo. 31 Ritu bibi riwa a he ri ngan,<<No nji riwa ari kpo ngawan no kpo ngawan ri Bachi.